ນັກທຸລະກິດ ຈີນ ເຂົ້າມາສຶກສາຄວາມເປັນໄປໄດ້ດ້ານການລົງທຶນທີ່ສະຫວັນນະເຂດ

     ໃນວັນທີ 26 ກັນຍາ 2017 ນັກລົງທຶນຈາກ ສປ ຈີນ, ຈຳນວນ 100 ກວ່າທ່ານ, ຊຶ່ງນຳໂດຍ ທ່ານ ດຣ. ຫຼຽນ ຮາຍຍັງ ປະທານສະຫະພັນການຄ້າສາກົນຈີນ, ພ້ອມດ້ວຍນັກທຸລະກິດ, ນັກລົງທຶນດ້ານ ຕ່າງໆໄດ້ເດີນທາງດ້ວຍເຄື່ອງບິນ ພິເສດມາແຂວງສະຫວັນນະເຂດ ເພື່ອມາສຶກສາຄວາມເປັນໄປໄດ້ດ້ານການຄ້າ-ການລົງທຶນ.

 

     ໃນການມາຄັ້ງນີ້ໄດ້ເຂົ້າຮ່ວມ ປະຊຸມສຳມະນາສົ່ງເສີມການຄ້າ, ການລົງທຶນໃນຫົວຂໍ້ທີ່ວ່າ: ໜຶ່ງແລວທາງ, ໜຶ່ງເສັ້ນທາງ, ເປີດປະຕູຄຳສູ່ການຄ້າ-ການລົງທຶນ ແລະແລກປ່ຽນວັດທະນະທຳ. ຊຶ່ງພິທີດັ່ງກ່າວ ໄດ້ຈັດຂຶ້ນຢູ່ຫ້ອງປະຊຸມໃຫຍ່ເຂດ ເສດຖະກິດພິເສດສະຫວັນ-ເຊໂນ, ໂດຍການເຂົ້າຮ່ວມເປັນປະທານ ຂອງທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ, ມີບັນດາພະແນກການອ້ອມຂ້າງແຂວງ, ນັກລົງທຶນທັງພາຍໃນ ແລະຕ່າງ ປະເທດຈາກເຂດເສດຖະກິດພິເສດ ໂດຍສະເພາະບໍລິສັດສະຫວັນຊີຕີຈຳກັດ ຊຶ່ງເປັນບໍລິສັດຜູ້ປະສານງານ ໃນຄັ້ງນີ້.

     ພາຍຫຼັງຊົມການສະແດງສິລະປະຈາກນ້ອງນ້ອຍໂຮງຮຽນຈຸງເຕັກສະຫວັນນະເຂດ, ໂອກາດດັ່ງກ່າວ ທ່ານ ສັນຕິພາບ ພົມວິຫານ ໃນນາມເຈົ້າພາບກໍ່ໄດ້ກ່າວຕ້ອນຮັບຄະນະຜູ້ແທນນັກທຸລະກິດຈາກ ສປ ຈີນ ຢ່າງເປັນທາງການ, ພ້ອມທັງຍົກໃຫ້ເຫັນການຮ່ວມມືຂອງສອງຊາດທີ່ມີຫຼາຍໂຄງການຮ່ວມມືໄດ້ຖືກຈັດຕັ້ງປະຕິບັດເປັນຕົ້ນໂຄງການສ້າງເສັ້ນທາງລົດໄຟ, ໂຄງການພັດທະນາພື້ນຖານໂຄງລ່າງ ແລະໂຄງການລົງທຶນອື່ນໆ ຊຶ່ງຖືວ່າເປັນໂຄງ ການລົງທຶນລາຍໃຫຍ່ອັນດັບຕົ້ນໆ ທີ່ລົງທຶນຢູ່ ສປປ ລາວ ກໍ່ຄືແຂວງສະຫວັນນະເຂດ. ຈາກນັ້ນ ທ່ານເຈົ້າແຂວງສະຫວັນນະເຂດຍັງໄດ້ເຊີນ ຊວນບັນດານັກທຸລະກິດຈົ່ງເຂົ້າມາສຶກສາກາລະໂອກາດການລົງທຶນຂອງ ແຂວງສະຫວັນນະເຂດ ແລະພ້ອມຈະໃຫ້ຄຳໝັ້ນສັນຍາຈະສະໜັບສະໜູນ  ແລະເອື້ອອຳນວຍຄວາມສະດວກໃຫ້ການລົງທຶນຂອງພວກທ່ານເດີນແມ່ນແລ່ນສະດວກ.

     ທ່ານ ດຣ. ຫຼຽນ ຮາຍ ຍັງກໍ່ໄດ້ກ່າວສະແດງຄວາມຂອບໃຈມາຍັງການນຳພັກ-ລັດ ແລະພໍ່ແມ່ປະຊາຊົນທຸກຖ້ວນໜ້າທີ່ໃຫ້ການຕ້ອນຮັບຢ່າງອົບອຸ່ນ ແລະມີໄມຕີຈິດ, ມິດຕະພາບ, ມີຮອຍຍິ້ມທີ່ຈິງໃຈ. ເບິ່ງແລ້ວແຂວງສະຫວັນນະເຂດຍັງມີພື້ນທີ່ທີ່ຈະໃຫ້ລົງທຶນພ້ອມທັງຍັງມີຊັບພະຍາກອນທຳມະຊາດທີ່ອຸດົມສົມບູນເປັນສິ່ງເອື້ອອຳນວຍ, ເໝາະສົມແກ່ນັກລົງທຶນ, ຄິດວ່ານັກລົງທຶນຈະໄດ້ມີການສຶກສາລະອຽດໃນການລົງທຶນຢູ່ເຂດເສດຖະກິດພິເສດສະຫວັນ-ເຊໂນແຫ່ງນີ້.   

     ໃນການສຳມະນາບັນດານັກທຸລະກິດກໍ່ໄດ້ໃຫ້ຄວາມສົນໃຈ ແລະຊັກຖາມຂໍ້ຂ້ອງໃຈ ໂດຍສະເພາະໃນດ້ານການຈັດຕັ້ງປະຕິບັດ, ນະໂຍບາຍ ແລະປັດໄຈອື່ນໆ.

     ຈາກນັ້ນກໍ່ໄດ້ມີການເຊັນບົດບັນທຶກການຮ່ວມມືດ້ານວິຊາການ ແລະການສົ່ງເສີມການລົງທຶນໃນແຂວງສະຫວັນນະເຂດ, ໂດຍສະເພາະເຂດເສດຖະກິດພິເສດສະຫວັນ-ເຊໂນ, ໂດຍມີທ່ານ ທອງໃສ ໄຊຍະວົງຄຳດີ ຫົວໜ້າຄະນະບໍລິຫານເຂດ ເສດຖະກິດພິເສດສະຫວັນ-ເຊໂນ, ທ່ານ ດຣ. ຫຼຽນ ຮາຍຍັງ ປະທານສະຫະພັນການຄ້າສາກົນຈີນ ແລະທ່ານ ຊານໄຊ ປະທານ ບໍລິສັດສະຫວັນຊີຕີຈຳກັດ.

     ຕອນບ່າຍກໍ່ໄດ້ມີການເລາະຊົມ ຕົວເມືອງ, ຈຸດ A ເຂດກ້ອງຂົວ, ຈຸດ D ບ້ານສະຫວັນໃໝ່ ກິໂລແມັດທີ 9, ຊົມສະຫວັນຣີສອດ, ຊົມສິນຄ້າ ODOP ຂອງທີ່ລະລຶກຈາກສະຫວັນນະເຂດ, ຈາກນັ້ນຄະນະຜູ້ແທນ ດັ່ງກ່າວກໍ່ກັບຄືນນະຄອນຫຼວງວຽງຈັນ.

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ

ຜູ້ໃຊ້ເຂົ້າສູ່ລະບົບ

ປະຕິທິນຂ່າວ “ເສດຖະກິດ-ສັງຄົມ”

« ຕຸລາ 2017 »
Mon Tue Wed Thu Fri Sat Sun
            1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 31          
ໄປເທິງສຸດ