ກອງທຶນບ້ານໂພນທັນມີເງິນໜູນ 300 ລ້ານກວ່າກີບ

     ກອງທຶນພັດທະນາບ້ານໂພນທັນ ເມືອງໄຊເສດຖາ ນະຄອນຫຼວງວຽງຈັນ ເປັນອີກກອງທຶນໜຶ່ງທີ່ມີການເຄື່ອນໄຫວດີໃນຕະຫຼອດ 10 ປີຜ່ານມາສາມາດສະສົມບົດຮຽນ ແລະປະສົບການຫຼາຍບັນຫາ ຊຶ່ງມາເຖິງຂະນະນີ້ແມ່ນບໍ່ມີໜີ້ທວງຍາກ ແລະມີຜູ້ຝາກ-ຜູ້ກູ້ສະໝໍ່າສະເໝີເປັນປົກກະຕິ.

 

     ຕໍ່ບັນຫາດັ່ງກ່າວ, ທ່ານນາງ ສົມເພັດ ເຂັມທອງ ປະທານໜ່ວຍສະຫະພັນແມ່ຍິງທັງເປັນປະທານກອງທຶນພັດທະນາບ້ານໂພນທັນໄດ້ກ່າວຕໍ່ຜູ້ສື່ຂ່າວທະນາຄານແຫ່ງ ສປປ ລາວ ໃນວັນທີ 16 ມັງກອນ ນີ້ວ່າ: ກອງທຶນພັດທະນາບ້ານໂພນ ທັນໄດ້ຮັບການສ້າງຕັ້ງ ແລະເຄື່ອນໄຫວມາໄດ້ 10 ປີ, ເບື້ອງຕົ້ນມີສະມາຊິກພຽງແຕ່ໜ້ອຍດຽວໂດຍມີວົງເງິນຝາກຂອງສະມາຊິກພາຍໃນບ້ານ 8 ລ້ານກວ່າກີບ ແຕ່ມາຮອດປະຈຸບັນແມ່ນມີສະມາຊິກ 100  ຄົນ ແລະມີເງິນຝາກ 300 ລ້ານກວ່າກີບ, ໃນນີ້ການຝາກເງິນຂອງສະມາຊິກ ໂດຍບໍ່ຈໍາແນກເພດຍິງ-ເພດຊາຍ ຊຶ່ງໃນແຕ່ລະເດືອນແມ່ນຝາກ 10.000 ກີບຂຶ້ນໄປ, ສະເລ່ຍແລ້ວໃນແຕ່ລະເດືອນກອງທຶນມີເງິນຝາກ ບໍ່ຫຼຸດ 12.000.000 ກີບ, ເດັ່ນ ກວ່າໝູ່ມີ 6-7 ຄອບຄົວທີ່ສາມາດ ນໍາເງິນມາຝາກຢ່າງຕໍ່ເນື່ອງໃນແຕ່ລະເດືອນ 200.000-300.000 ກີບຂຶ້ນໄປ ແລະໄດ້ຮັບເງິນປັນຜົນ ປີໜຶ່ງປະມານ 17.000.000 ກີບ ຂຶ້ນໄປ.

     ທ່ານປະທານກອງທຶນພັດທະນາ ບ້ານໂພນທັນຢືນຢັນຕື່ມວ່າ: ສໍາລັບການປ່ອຍກູ້ກໍໄດ້ປະຕິບັດຕາມ ລະບຽບກອງທຶນທຸກປະການ ໂດຍມີການປ່ອຍກູ້ໃນວົງເງິນ 3 ເທົ່າ ຂອງເງິນຝາກແຕ່ປີໜຶ່ງແມ່ນມີການກູ້ຜູ້ໜຶ່ງບໍ່ກາຍ 2 ຄັ້ງ ແລະດອກເບ້ຍບໍ່ເກີນ 3% ຕໍ່ເດືອນ, ໃນທີ່ຜ່ານມາ ໂດຍສະເພາະພາຍໃຕ້ການບໍລິຫານກອງທຶນພັດທະນາ ບ້ານໂພນທັນ ຊຸດປະຈຸບັນສາມາດຄວບຄຸມຄຸ້ມຄອງ ແລະບໍລິຫານກອງທຶນດ້ວຍ ດີສະເໝີມາຍ້ອນວ່າໄດ້ຮັບການຊີ້ນໍາຢ່າງໃກ້ຊິດຈາກຄະນະສະຫະພັນແມ່ຍິງເມືອງໄຊເສດຖາບວກກັບການເອົາໃຈໃສ່ນໍາພາຂອງຄະນະໜ່ວຍພັກ-ຄະນະບ້ານ ແລະອົງການປົກຄອງທີ່ກ່ຽວຂ້ອງຂອງບ້ານກໍຄືໄດ້ມີການຮ່ວມມືທີ່ດີລະຫວ່າງຄະນະບໍລິຫານ-ສະມາຊິກກອງທຶນໃນໄລຍະຜ່ານມາ; ນອກນີ້ກອງທຶນຍັງນໍາເອົາຍອດເງິນເຫຼືອຕ່າງໆຂອງກອງທຶນໄປຝາກໄວ້ຢູ່ທະນາຄານເພື່ອຄວາມປອດໄພ.

     ເມື່ອເບິ່ງວົງເງິນຂອງກອງທຶນ ພັດທະນາບ້ານໂພນທັນ ແມ່ນຍັງບໍ່ຫຼາຍເທົ່າທີ່ຄວນຖ້າທຽບໃສ່ປະຊາກອນຂອງບ້ານທີ່ມີພົນລະເມືອງ 1.000 ກວ່າຄົນ ຊຶ່ງສ່ວນໃຫຍ່ມີອາຊິີບບໍລິການ, ຄ້າຂາຍ ແລະເປັນພະນັກງານ, ແຕ່ເຖິງຢ່າງໃດກໍຕາມໃນໄລຍະຜ່ານມາຄະນະບໍລິຫານ-ສະມາຊິກກອງທຶນບ້ານໄດ້ມີການ ເຄື່ອນໄຫວຢ່າງຕັ້ງໜ້າສະແດງອອກ ບໍ່ມີໜີ້ສິນ, ຍອດເງິນຝາກນັບມື້ເພີ່ມ ຂຶ້ນ, ການບໍລິຫານມີຄວາມໂປ່ງໃສກາຍເປັນໜໍ່ແໜງ, ເປັນສະຖານທີ່ສຶກສາ ແລະຮຽນຮູ້ກ່ຽວກັບການອົດອອມ, ການນໍາໃຊ້ເງິນເພື່ອໃຫ້ເກີດປະໂຫຍດສູງສຸດຕໍ່ຄອບຄົວຕົນເອງ ແລະສັງຄົມ; ເຊື່ອໝັ້ນວ່າໃນອະນາຄົດອັນໃກ້ໆນີ້ຈະມີສະມາຊິກເພີ່ມຕື່ມຫຼາຍຂຶ້ນກວ່າເກົ່າ.

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ

ຜູ້ໃຊ້ເຂົ້າສູ່ລະບົບ

ປະຕິທິນຂ່າວ “ເສດຖະກິດ-ສັງຄົມ”

« ພຶດສະພາ 2018 »
Mon Tue Wed Thu Fri Sat Sun
  1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30 31      
ໄປເທິງສຸດ