ເສດຖະກິດແຂວງວຽງຈັນຂະຫຍາຍຕົວຕໍ່ເນື່ອງ

     ໃນປີ 2017 ເສດຖະກິດຂອງແຂວງວຽງຈັນຂະຫຍາຍຕົວຕໍ່ເນື່ອງດ້ວຍຈັງຫວະທີ່ໝັ້ນທ່ຽງ, ໂຄງປະກອບເສດຖະກິດມີການຫັນປ່ຽນໄປຕາມທິດອຸດສາຫະກຳທັນສະໄໝໄປສູ່ອຸດສາຫະກຳ-ການບໍລິ ການເທື່ອລະກ້າວ, ລວມຍອດຜະລິດຕະພັນພາຍໃນ ຫຼື GDP ຂອງ ແຂວງວຽງຈັນບັນລຸໄດ້  8,21% ຊຶ່ງສ້າງມູນຄ່າເພີ່ມໄດ້ 6 ພັນຕື້ກວ່າກີບ, ສະເລ່ຍໃສ່ຫົວຄົນໄດ້ຜູ້ລະ 14 ລ້ານກວ່າກີບ.

 

     ທ່ານ  ດາວເຮືອງ ນັນທະວົງ ຮອງເຈົ້າແຂວງໆວຽງຈັນຕາງໜ້າ ໃຫ້ແກ່ອົງການປົກຄອງແຂວງໄດ້ ລາຍງານຕໍ່ກອງປະຊຸມສະໄໝສາ ມັນເທື່ອທີ 4 ຂອງສະພາປະຊາຊົນ ແຂວງວຽງຈັນ ຊຶ່ງຈັດຂຶ້ນໃນວັນ ທີ 16-19 ມັງກອນຜ່ານມາວ່າ:  ໃນປີ 2017 ຜ່ານມານັ້ນການພັດ ທະນາເສດຖະກິດ-ສັງຄົມແລະແຜນ ງົບປະມານຂອງແຂວງວຽງຈັນ ເຫັນວ່າ ເສດຖະກິດຂອງແຂວງມີ ການຂະຫຍາຍຕົວດ້ວຍຈັງຫວະທີ່ໝັ້ນທ່ຽງໂຄງປະກອບເສດຖະກິດ ໄດ້ຫັນປ່ຽນໄປຕາມທິດອຸດສາຫະ ກຳທັນສະໄໝໄປສູ່ອຸດສາຫະກຳ-ການບໍລິການເທື່ອລະກ້າວຄວາມທຸກຍາກຂອງປະຊາຊົນນັບມື້ຫຼຸດ ໜ້ອຍຖ້ອຍລົງ, ສະພາບການລົງທຶນ ຂອງລັດ ແລະເອກະຊົນທັງພາຍໃນ ແລະຕ່າງປະເທດໄດ້ເພີ່ມຂຶ້ນ, ລວມ ຍອດຜະລິດຕະພັນພາຍໃນ GDP ປະຕິບັດໄດ້  8,21%  ສ້າງມູນຄ່າ ເພີ່ມໄດ້ 6.426 ຕື້ກີບ, ສະເລ່ຍໃສ່ຫົວຄົນໄດ້ຜູ້ລະ14,43 ລ້ານກີບ.

     ການເກັບລາຍຮັບເຂົ້າງົບປະມານປະຕິບັດໄດ້ 201 ຕື້ກວ່າກີບ ເທົ່າກັບ 123,47% ຂອງແຜນການ, ດ້ານລາຍຈ່າຍປະຕິບັດໄດ້ 591 ຕື້ກວ່າກີບ ເທົ່າກັບ 94,83% ຂອງແຜນການປີ, ການຜະລິດເປັນ ສິນຄ້າຂອງຫົວໜ່ວຍທຸລະກິດ ແລະປະຊາຊົນໄດ້ເປັນຂະບວນຟົດຟື້ນອັນໄດ້ສ້າງລາຍຮັບໃຫ້ແກ່ຄອບຄົວ ເປັນຮູບປະທຳຫຼາຍກວ່າເກົ່າ, ພ້ອມນີ້ຂະບວນການປູກຝັງກໍ່ໄດ້ເປັນຂະບວນກວ້າງຂວາງເຊັ່ນ:ການປູກສາລີແຂງ, ສາລີຫວານ, ຜັກປອດສານພິດຢູ່ເມືອງທຸລະຄົມ, ການປູກເຂົ້າ, ມັນຕົ້ນ, ໝາກເດືອຍຢູ່ເມືອງໝື່ນ, ຊະນະຄາມ, ເມືອງເຟືອງ, ຫີນເຫີບ, ໝາກກ້ຽງນ້ອຍ, ໝາກນາວຢູ່ເມືອງວັງວຽງ.

     ດ້ານການລ້ຽງສັດກໍ່ມີການຂະຫຍາຍຕົວເພີ່ມຂຶ້ນເປັນຕົ້ນແມ່ນການລ້ຽງແບບເປັນຟາມຄື: ການລ້ຽງງົວ, ຄວາຍ, ໝູຊີ້ນ, ການລ້ຽງໄກ່ພັນ ໄຂ່ກໍ່ເປັນຂະບວນແພ່ຫຼາຍຢູ່ເມືອງໂພນໂຮງ ແລະທຸລະຄົມ, ດ້ານອຸດສາຫະກຳເກີດມີໂຮງຈັກໂຮງງານນັບມື້ເພີ່ມຂຶ້ນເປັນຕົ້ນແມ່ນໂຮງງານ ຊີມັງເມືອງຫີນເຫີບ, ໂຮງງານຜະລິດຢາງຢູ່ມືອງແກ້ວອຸດົມ, ໂຮງງານຜະລິດກະສິກຳຢູ່ເມືອງທຸລະຄົມ, ໂພນໂຮງ, ເມືອງໝື່ນ, ຊະນະຄາມ, ແລະຫີນເຫີບ.

     ຄຽງຄູ່ກັນນີ້ບັນດາພື້ນຖານໂຄງລ່າງຖະໜົນຫົນທາງກໍ່ໄດ້ຮັບການກໍ່ສ້າງ ແລະສ້ອມແປງເປັນຕົ້ນແມ່ນບັນດາໂຄງການກ່ຽວກັບການກໍ່ສ້າງເທສະບານແຂວງ, ນອກນັ້ນກໍ ຍັງໄດ້ເຊັນບົດບັນທຶກຄວາມເຂົ້າ ໃຈໃນການພັດທະນາເຂດຕາເວັນຕົກຂອງນ້ຳຊອງ, ເດີ່ນບິນເກົ່າເມືອງວັງວຽງ, ໜ້າເຂື່ອນນ້ຳງື່ມ 1 ເມືອງແກ້ວອຸດົມ ແລະເຂດເທສະບານ ແຂວງວຽງຈັນ.

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ

ຜູ້ໃຊ້ເຂົ້າສູ່ລະບົບ

ປະຕິທິນຂ່າວ “ເສດຖະກິດ-ສັງຄົມ”

« ກຸມພາ 2018 »
Mon Tue Wed Thu Fri Sat Sun
      1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28        
ໄປເທິງສຸດ