ສ່ວຍສາອາກອນເກັບລາຍຮັບໝົດປີໄດ້ 10 ພັນຕື້ກວ່າກີບ

     ຂະແໜງສ່ວຍສາອາກອນ ແມ່ນຂະແໜງການໜຶ່ງທີ່ເຄື່ອນໄຫວ ລວມສູນຕາມສາຍຕັ້ງເປັນເສນາທິການໃຫ້ກະຊວງການເງິນໃນການຈັດຕັ້ງປະຕິບັດການເກັບລາຍຮັບສ່ວຍສາອາກອນໃນຂອບເຂດທົ່ວປະເທດເຂົ້າງົບປະມານແຫ່ງລັດ 2017 ຜ່ານມາ ສາມາດຈັດຕັ້ງປະຕິບັດການເກັບລາຍຮັບໄດ້ທັງໝົດ 10.144 ຕື້ກວ່າກີບ ຫຼຸດແຜນ 871 ຕື້ກີບ ທີ່ວ່າງໄວ້ໝົດປີ 11.015 ຕື້ກີບ.

 

     ທ່ານ ກົງຄຳ ສິດທິວໍລະດາ ຮອງຫົວໜ້າກົມສ່ວຍສາອາກອນກ່າວ ບໍ່ດົນມານີ້ວ່າ: ການຈັດຕັ້ງປະຕິບັດການເກັບລາຍຮັບເຂົ້າງົບປະມານ ໃນປີ 2017  ຕາມແຜນລວມທັງໝົດ 11.015 ຕື້ກີບ ໃນນັ້ນກົມ ສ່ວຍສາອາກອນຮັບຜິດຊອບຈຳນວນ 6.813 ຕື້ກີບ, ບັນດາແຂວງ ແລະນະຄອນຫຼວງຮັບຜິດຊອບ 4.200 ຕື້ກວ່າກີບ, ຜ່ານການຈັດຕັ້ງປະຕິບັດຕົວຈິງທົ່ວປະເທດສາມາດເກັບໄດ້ທັງໝົດ 10.144 ຕື້ກວ່າກີບ ເທົ່າກັບ 92,10% ຂອງແຜນການ, ທຽບໃສ່ປີກ່ອນເພີ່ມຂຶ້ນ 18,39%.

     ຊຶ່ງກົມສ່ວຍສາອາກອນເກັບໄດ້ 6.374 ຕື້ກວ່າກີບ ເທົ່າກັບ 93,56% ປະກອບມີລາຍຮັບປົກ ກະຕິ 4.522 ຕື້ກວ່າກີບ ເທົ່າກັບ 96,42%, ລາຍຮັບຈາກບໍ່ຄຳ 60,55 ຕື້ກີບ, ລາຍຮັບບໍລິການ ແລະອື່ນໆ 1.791 ຕື້ກວ່າກີບ ເທົ່າກັບ 117,88%, ສ່ວນບັນດາແຂວງ ແລະນະຄອນຫຼວງເກັບໄດ້ 3.808 ຕື້ກວ່າກີບ  ເທົ່າກັບ 90,63% ຂອງແຜນການປີໃນນີ້ມີລາຍຮັບປົກກະຕິ 3.635 ຕື້ກວ່າກີບ ເທົ່າ 92,46% ແລະລາຍຮັບຈາກພາສີ ທີ່ດິນ 172,82 ຕື້ກີບ ເທົ່າກັບ 64%  ຂອງແຜນການປີ.

     ນອກນັ້ນ ຖ້າຫາກຕົວເລກລາຍຮັບແຍກອອກເປັນ 17 ກຸ່ມທຸລະກິດ ໃນປີ 2017 ຄືການບໍລິການທົ່ວໄປ, ການຄ້າ, ການຢາ ແລະສາທາລະນະສຸກ,  ປະກັນໄພ, ທະນາຄານ ແລະຫຼັກຊັບ, ນ້ຳມັນເຊື້ອໄຟ, ພາຫະນະ, ໂຮງແຮມການບັນເທີງ ແລະທ່ອງທ່ຽວ, ໂທລະຄົມມະນາຄົມ, ການກໍ່ສ້າງ, ຕັດຫຍິບ, ການ ຜະລິດຊີມັງ,  ການຜະລິດທົ່ວໄປ, ໄຟຟ້າ ແລະເຂື່ອນ, ບໍ່ແຮ່, ພາກລັດ ແລະອົງການຈັດຕັ້ງ, ຫົວໜ່ວຍທຸ ລະກິດທີ່ບໍ່ໄດ້ຈັດກຸ່ມ, ສະເລ່ຍເຫັນ ວ່າການເກັບລາຍຮັບໄດ້ລື່ນແຜນ ເຊັນດຽວກັນກັບການແຍກເປັນແຕ່ ລະປະເພດອາກອນໃນນັ້ນມີ 13 ກຸ່ມໄດ້ລື່ນປີກ່ອນ ຊຶ່ງຂະແໜງພະລັງ ງານໄຟຟ້າເກັບໄດ້ລື່ນເຖິງ  63,30% ຮອງລົງມາກຸ່ມພາກລັດບໍລິຫານ 40,11% ແລະກຸ່ມບໍລິການທົ່ວໄປເກັບໄດ້ລື່ນແຜນ 32,48%.

     ແນວໃດກໍດີ ເຖິງວ່າການເກັບ ລາຍຮັບໃນປີ 2017 ຈະບັນລຸໄດ້ ພຽງ 92,10% ແຕ່ເມື່ອທຽບໃສ່ ປີກ່ອນເຫັນວ່າເພີ່ມຂຶ້ນ 18,39% ເນື່ອງຈາກມີການນໍາໃຊ້ເຄື່ອງມືທີ່ ທັນສະໄໝເຂົ້າຊ່ວຍວຽກງານການເກັບລາຍຮັບ, ທັງນີ້ ກໍມີຫຼາຍສາເຫດທີ່ເຮັດໃຫ້ການເກັບລາຍຮັບສ່ວຍສາອາກອນບໍ່ໄດ້ຕາມແຜນ ເປັນຕົ້ນພະນັກງານ, ນັກທຸລະກິດ ແລະສັງຄົມທົ່ວໄປບໍ່ຮັບຮູ້ບໍ່ເຂົ້າໃຈຕໍ່ລະບຽບກົດໝາຍຂອງຂະແໜງສ່ວຍສາອາກອນເພາະການໂຄສະນາເຜີຍແຜ່ບໍ່ທັນທົ່ວເຖິງ, ການເກັບ ອາກອນມູນຄ່າເພີ່ມການສົ່ງອອກ ແຮ່ທາດເຄິ່ງສຳເລັດຮູບບໍ່ສາມາດ ປະຕິບັດໄດ້, ຂໍ້ມູນຈາກການນຳເຂົ້າ, ຈາກພາຍໃນຍັງບໍ່ໄດ້ຮັບການສະໜອງໃຫ້ເປັນສ່ວນໃຫຍ່, ບາງບໍລິ ສັດໃຫ້ຂໍ້ມູນບໍ່ຄົບຖ້ວນບໍ່ຊັດເຈນ ແລະຊັກຊ້າ, ພະນັກງານບໍ່ມີການຫັນປ່ຽນຢ່າງຕັ້ງໜ້າຍັງຮັກສາ ແລະເຮັດຕາມຄອງເດີມ.

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ

ຜູ້ໃຊ້ເຂົ້າສູ່ລະບົບ

ປະຕິທິນຂ່າວ “ເສດຖະກິດ-ສັງຄົມ”

« ກຸມພາ 2018 »
Mon Tue Wed Thu Fri Sat Sun
      1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28        
ໄປເທິງສຸດ