ເສດຖະກິດເມືອງຊຽງຮ່ອນ ຂະຫຍາຍຕົວໃນລະດັບ 17,11%

     ສະພາບເສດຖະກິດເມືອງຊຽງຮ່ອນ, ແຂວງໄຊຍະບູລີ ໃນປີຜ່ານມາຍັງສືບຕໍ່ຂະຫຍາຍຕົວຢ່າງຕໍ່ເນື່ອງ ແລະໝັ້ນທ່ຽງດ້ວຍຈັ່ງຫວະການຫັນປ່ຽນຈາກກະສິກຳແບບກຸ້ມຢູ່ກຸ້ມກິນມາເປັນການຜະລິດເປັນສິນຄ້າທີ່ມີໜໍ່ແໜງການຫັນເປັນອຸດສາຫະກຳ ແລະການບໍລິການຫຼາຍຂຶ້ນ, ດ້ວຍເຫດນີ້ຈຶ່ງ ເຮັດໃຫ້ເສດຖະກິດພາຍໃນເມືອງເຕີບໂຕໃນລະດັບ 17,11%.

 

     ອີງຕາມຂໍ້ມູນຈາກຫ້ອງການແຜນການ ແລະການລົງທຶນເມືອງຊຽງຮ່ອນໃຫ້ຮູ້ວ່າ: ໃນປີ 2017 ຜ່ານມາເສດຖະກິດຂອງເມືອງໄດ້ຮັບການພັດທະນາ ແລະຂະຫຍາຍຕົວຢ່າງຕໍ່ເນື່ອງສະເລ່ຍໃນລະດັບ 17,11% ປະຕິບັດລື່ນແຜນ 3,98%, ລວມຍອດຜະລິດຕະພັນພາຍໃນ (GDP) ບັນລຸໄດ້ 448,77 ຕື້ກີບ ທຽບໃສ່ແຜນການ 5 ປີ ປະຕິບັດໄດ້ 79,37%, ສະເລ່ຍລາຍຮັບຕໍ່ຫົວຄົນບັນລຸໄດ້ 1.702 ໂດລາຕໍ່ຄົນຕໍ່ປີ, ການລົງທຶນເຂົ້າໃນການພັດທະນາມີທັງໝົດ 27 ໂຄງການ ມູນຄ່າ 325 ລ້ານກວ່າກີບ ໃນນັ້ນທຶນພາຍໃນ 323 ລ້ານກີບ, ທຶນຕ່າງປະເທດ 2 ລ້ານກວ່າກີບ.

ສໍາລັບວຽກງານກະສິກຳທີ່ເປັນທ່າແຮງຜັກດັນໃຫ້ເສດຖະກິດ ສືບຕໍ່ຂະຫຍາຍຕົວກໍ່ເປັນຂະບວນການກວ້າງຂວາງເຊັ່ນ: ເນື້ອທີ່ປູກເຂົ້າລວມທັງໝົດ 5.351 ເຮັກຕາ ຜົນຜະລິດທັງໝົດ 21.338 ໂຕນ, ມີເນື້ອທີ່ຢາງພາລາທັງໝົດ 3.952 ກວ່າເຮັກຕາ, ເນື້ອທີ່ສາມາດປາດໄດ້ 3.060 ເຮັກຕາ, ເກັບກູ້ຢາງພາລາໄດ້ 1.600 ໂຕນ, ເນື້ອທີ່ປູກໝາກເດືອຍ 5.200 ເຮັກຕາ, ຜົນຜະລິດໄດ້ 16.640 ໂຕນ ລວມມູນ ຄ່າຜະລິດຕະພັນອຸດສາຫະກຳ ແລະຫັດຖະກຳປະຕິບັດໄດ້ 212,5 ຕື້ ກີບ, ມູນຄ່າສິນຄ້າຈໍາໜ່າຍໄດ້ 107,2 ຕື້ກີບ, ຈັດເກັບລາຍຮັບ ເຂົ້າສົກງົບປະມານໄດ້ 10,47 ຕື້ ກີບ ທຽບໃສ່ແຜນການປີປະຕິບັດໄດ້ 98,40% ສ່ວນດ້ານພື້ນຖານໂຄງລ່າງຖະໜົນຫົນທາງໄດ້ຮັບ ການພັດທະນາດີຂຶ້ນເຮັດໃຫ້ສາມາດ ໄປມາໄດ້ 2 ລະດູທຸກໆບ້ານໃນທົ່ວເມືອງ, ປະຊາຊົນໄດ້ຊົມໃຊ້ໄຟຟ້າແລ້ວ 6.065 ຄອບຄົວ ເທົ່າກັບ 92,66% ຂອງຄອບທັງໝົດໃນທົ່ວເມືອງ.

     ຄຽງຄູ່ກັບຜົນງານດັ່ງກ່າວວຽກງານວັດທະນະທຳສັງຄົມກໍມີຄວາມກ້າວໜ້າເຊັ່ນດຽວກັນ ໂດຍສະເພາະອັດຕາເຂົ້າຮຽນຂອງເດັກໃນເກນອາຍຸ 6-10 ປີ ບັນລຸໄດ້ 100%, ສ່ວນອັດຕາເຂົ້າຮຽນຊັ້ນມັດທະຍົມຕົ້ນບັນລຸໄດ້ 82%, ຊັ້ນມັດທະຍົມ ປາຍປະຕິບັດໄດ້ 45%, ໄດ້ປະກາດບ້ານວັດທະນະທຳທັງໝົດ 27 ບ້ານ ແລະ1 ກົມກອງ ກວມເອົາ 64,28% ມີຄອບຄົວທັງໝົດ 4.796 ຄອບຄົວ.

     ຂໍ້ມູນຍັງໃຫ້ຮູ້ຕື່ມວ່າ: ທິດທາງແຜນການປີ 2018 ເມືອງຊຽງຮ່ອນ ຈະສືບຕໍ່ປະຕິບັດມະຕິກອງປະຊຸມໃຫຍ່ຄັ້ງທີ X ຂອງພັກ, ຄັ້ງທີ VI ຂອງແຂວງ ແລະຄັ້ງທີ VI ຂອງເມືອງ ປະຕິບັດແຜນພັດທະນາເສດຖະກິດສັງຄົມ 5 ປີ ຄັ້ງທີ VIII ເພີ່ມທະວີຄວາມສາມັກຄີເປັນ ເອກກະພາບພາຍໃນອົງການປົກ ຄອງເມືອງ ແລະປະຊາຊົນບັນດາ ເຜົ່າໃຫ້ເປັນປຶກແຜ່ນແໜ້ນໜາ, ສົ່ງເສີມມູນເຊື້ອວັດທະນະທຳອັນດີງາມຂອງຊາດ, ຂອງເຜົ່າ, ສ້າງວຽກເຮັດງານທໍາ ແລະພັດທະນາສີມືແຮງງານສົ່ງເສີມການບໍລິການ, ທີ່ສໍາຄັນສູ້ຊົນເຮັດໃຫ້ເສດຖະກິດຂະຫຍາຍຕົວຕໍ່ເນື່ອງ ແລະໝັ້ນທ່ຽງ.

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ

ຜູ້ໃຊ້ເຂົ້າສູ່ລະບົບ

ປະຕິທິນຂ່າວ “ເສດຖະກິດ-ສັງຄົມ”

« ພຶດສະພາ 2018 »
Mon Tue Wed Thu Fri Sat Sun
  1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30 31      
ໄປເທິງສຸດ