ເມືອງລະຄອນເພັງ ລວມຍອດຜະລິດຕະພັນພາຍໃນບັນລຸ 7 ຮ້ອຍຕື້ກວ່າກີບ

     ທ່ານ ສີສຸວັນ ວົງຈອມສີ ເຈົ້າແຂວງໆສາລະວັນ ພ້ອມດ້ວຍ ຄະນະນໍາຈາກພະແນກການອ້ອມ ຂ້າງແຂວງໄດ້ລົງເຄື່ອນໄຫວຢ້ຽມຢາມ ແລະເຮັດວຽກຢູ່ເມືອງລະຄອນເພັງ ໂດຍການຕ້ອນຮັບຂອງທ່ານ ແກ້ວຜາ ສີລາດວງໃຈ ຮັກສາການເຈົ້າເມືອງລະຄອນເພັງ, ພ້ອມດ້ວຍຄະນະນຳຂັ້ນເມືອງ, ພະນັກງານອາວຸໂສ-ບຳນານ, ຕະຫຼອດຮອດພະນັກງານລັດຖະກອນເຂົ້າຮ່ວມ, ພິທີພົບປະໄດ້ຈັດຂຶ້ນໃນວັນທີ 26 ກຸມພາ 2018 ຢູ່ສະໂມສອນຂອງເມືອງ.

 

     ໃນໂອກາດດຽວກັນນັ້ນ ທ່ານ ສີສຸວັນ ວົງຈອມສີ ເຈົ້າແຂວງໆ ສາລະວັນກໍ່ໄດ້ໂອ້ລົມ, ກ່ອນອື່ນທ່ານກໍ່ໄດ້ກ່າວຍ້ອງຍໍຊົມເຊີຍຕໍ່ໝາກຜົນໆງານທີ່ຄະນະພັກເມືອງ ຍາດມາໄດ້ໃນໄລຍະຜ່ານມາ, ໄດ້ສຸມສະຕິປັນຍາເຂົ້າໃສ່ໃນການສ້າງສາພັດທະນາແຂວງເວົ້າສະເພາະກໍ່ຄືເມືອງໃຫ້ມີຄວາມກ້າວໜ້າໄປເລື້ອຍໆ ຈາກນັ້ນທ່ານຍັງໄດ້ເນັ້ນໃຫ້ຄະນະພັກເມືອງເອົາໃຈໃສ່ຫຼາຍບັນຫາສຳຄັນເປັນຕົ້ນ: ແມ່ນໃຫ້ເພີ່ມທະວີສຶກສາອົບຮົມການເມືອງແນວຄິດ ໃຫ້ພະນັກງານລັດຖະກອນ ແລະປະຊາຊົນໃຫ້ໜັກແໜ້ນ, ເຂັ້ມແຂງ ແລະເປັນແບບຢ່າງນຳໜ້າ, ມີຄວາມຮັບຜິດຊອບສູງ ແລະຮັກຊາດຮັກບ້ານເກີດ ເມືອງນອນ, ເອົາໃຈໃສ່ເຂັ້ມງວດໃນການນຳໃຊ້ງົບປະມານ ໃຫ້ຖືກຕ້ອງ ແລະສົມເຫດສົມຜົນ, ຕ້ານການໃຊ້ຈ່າຍແບບຟຸມເຟືອຍ, ມີຄວາມໂປ່ງໃສ,  ຕ້ານການສໍ້ລາດ ບັງຫຼວງໃຫ້ເຂັ້ມແຂງຂຶ້ນເປັນກ້າວໆ ສຸມໃສ່ຈັດເກັບລາຍຮັບໃຫ້ບັນລຸຕາມແຜນທີ່ວາງໄວ້, ຫຼີກລ້ຽງຈາກການ ສ້າງໜີ້ສິນຄຸມເຄືອ,  ເອົາໃຈໃສ່ຕໍ່ການເບີກຈ່າຍເງິນເດືອນໃຫ້ພະນັກງານລັດຖະກອນ ໂດຍສະເພາະຄູ ແລະແພດໃຫ້ທ່ວງທັນຕາມເວລາຮັບປະກັນການເບີກຈ່າຍໃນແຕ່ລະເດືອນໃຫ້ໄດ້ 100%, ຊຸກຍູ້ການຜະລິດຂອງປະຊາຊົນໃຫ້ເຂັ້ມແຂງ ໂດຍອາໃສທ່າແຮງບົ່ມຊ້ອນຂອງ ເມືອງຜະລິດໃຫ້ຫຼາຍກາຍເປັນສິນຄ້າ ແລະເປັນເຈົ້າການໃນການປະຕິບັດຄຳສັ່ງເລກທີ 15/ນຍ ໃຫ້ເຂັ້ມງວດ ແລະໜັກແໜ້ນພ້ອມທັງເຊື່ອມຊືມ ແລະເຜີຍແຜ່ໃຫ້ປະຊາ ຊົນໄດ້ຮັບຮູ້, ເຂົ້າໃຈຢ່າງເລີກເຊິ່ງຕໍ່ກັບແນວທາງນະໂຍບາຍຂອງພັກ-ລັດ, ສ້າງພະນັກງານສືບທອດປ່ຽນແທນຕ້ອງເປັນແບບຢ່າງນຳໜ້າ, ມີທັດສະນະຫຼັກໜັ້ນ, ມີຄວາມໄວ້ວາງໃຈ ແລະຕ້ອງເປັນຄົນທີ່ມີຄວາມຮູ້ຄວາມສາມາດ, ມີຄຸນສົມບັດສິນທຳປະຕິບັດ ແລະມີແນວຄິດກວ້າງໄກ, ມີວິໄສທັດຕໍ່ການສ້າງ ສາພັດທະນາບ້ານເມືອງກ້າວໄປ ຢ່າງບໍ່ຢຸດຢັ້ງ.

     ເມືອງລະຄອນເພັງແມ່ນຕົວເມືອງໜຶ່ງທີ່ຂື້ນກັບແຂວງສາລະວັນ ເປັນເມືອງທີ່ມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບໂດຍພື້ນຖານ, ເສດຖະກິດມີ ການຂະຫຍາຍຕົວຢ່າງຕໍ່ເນື່ອງໃນ 1 ປີຜ່ານມາສາມາດລວມຍອດຜະລິດຕະພັນພາຍໃນບັນລຸໄດ້ 713,95 ຕືື້ກີບ, ທຽບໃສ່ແຜນປະຕິບັດໄດ້ 96,70% ທຽບໃສ່ໄລຍະດຽວເພີ່ມຂຶ້ນ 13% ສະເລ່ຍ ລາຍຮັບຕໍ່ຫົວຄົນບັນລຸ 14,27 ລ້ານກວ່າກີບ ຫຼື ເທົ່າກັບ 1.741 ໂດລາ ແລະປະຕິບັດການລົງທຶນ ໄດ້ທັງໝົດ 65 ໂຄງການ ມູນຄ່າ 517,75 ຕື້ກີບ, ຈັດເກັບລາຍຮັບເຂົ້າງົບປະມານໄດ້ 5,15 ຕື້ກີບ ແລະຄຸ້ມຄອງລາຍຈ່າຍໄດ້ 7,15 ຕື້ກວ່າກີບ, ນອກຈາກນີ້ສາມາດປະຕິບັດມູນຄ່າຈໍລະຈອນສິນຄ້າ 118,22 ຕື້ກີບ, ທົ່ວເມືອງມີບ້ານທຸກຍາກຍັງເຫຼືອພຽງ 4 ບ້ານເທົ່ານັ້ນ, ກວມເອົາ 5,3%, ສ້າງບ້ານ ພັດທະນາໄດ້ 58 ບ້ານກວມເອົາ 77% ແລະຄອບຄົວພັດທະນາ 7.065 ຄອບຄົວ.

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ

ຜູ້ໃຊ້ເຂົ້າສູ່ລະບົບ

ປະຕິທິນຂ່າວ “ເສດຖະກິດ-ສັງຄົມ”

« ພຶດສະພາ 2018 »
Mon Tue Wed Thu Fri Sat Sun
  1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30 31      
ໄປເທິງສຸດ