ຫົງສາປະຊຸມຫາລືຊຸກຍູ້ລາຍຮັບຂັ້ນເມືອງ

     ເພື່ອຮັບປະກັນໃຫ້ແກ່ການເຄື່ອນໄຫວວຽກງານວິຊາສະເພາະໃຫ້ມີຜົນສຳເລັດສູງ, ຕິດພັນກັບລະບຽບກົດໝາຍ ແລະແຜນງົບປະມານປະຈຳປີ 2018,

ດັ່ງນັ້ນ ວັນທີ 6 ເມສາ 2018 ເມືອງຫົງສາ ແຂວງໄຊຍະບູລີ ໄດ້ຈັດກອງປະຊຸມ ປຶກສາຫາລືຊຸກຍູ້ລາຍຮັບຂັ້ນເມືອງຂຶ້ນ ທີ່ຫ້ອງປະຊຸມ ຫ້ອງການ-ການເງິນເມືອງ, ໂດຍ ພາຍໃຕ້ການເປັນປະທານຂອງທ່ານ ພອນສະຫວັນ ໄຊສົມພັນ ຮອງເຈົ້າເມືອງໆຫົງສາ ປະທານ ຮັບຜິດຊອບຊຸກຍູ້ລາຍຮັບຂັ້ນເມືອງ ແລະມີຄະນະກຳມະການ ທີ່ຖືກແຕ່ງຕັ້ງຮັບຜິດຊອບຊຸກຍູ້ ລາຍຮັບຂັ້ນເມືອງເຂົ້າຮ່ວມ.

     ໃນກອງປະຊຸມທ່ານ ແຫຼ້ທອງ ພົມມະຈິດ ຫົວໜ້າຫ້ອງການ-ການເງິນເມືອງຫົງສາ ກໍ່ໄດ້ຂຶ້ນຜ່ານບົດສະຫຼຸບຫຍໍ້ການຈັດຕັ້ງ ປະຕິບັດແຜນງົບປະມານແຫ່ງລັດງວດ I ປີ 2018 ແລະທິດທາງແຜນ ການງວດ II ປີ 2018 ຊຶ່ງແຜນງົບປະມານແຫ່ງລັດປະຈໍາປີ 2018 ເມືອງຫົງສາໄດ້ຮັບຕົວເລກແຜນລາຍຮັບທັງໝົດ 12,443 ຕື້ກີບ ທຽບໃສ່ແຜນລາຍຮັບປີຜ່ານມາ ຫຼຸດລົງ 31,62%, ແຜນລາຍຈ່າຍທັງໝົດ 13,89 ຕື້ກີບ ທຽບໃສ່ປີຜ່ານມາເພີ່ມຂຶ້ນ 1,82% ຂອງແຜນລາຍຈ່າຍ. ການຈັດຕັ້ງປະຕິບັດໃນງວດ I ປີ 2018 ເມືອງຫົງສາ ສາມາດຈັດເກັບລາຍຮັບມອບເຂົ້າງົບປະມານໄດ້ທັງໝົດ 5,33 ຕື້ກີບ ເທົ່າກັບ 42,84% ຂອງແຜນການປີ ທຽບໃສ່ໄລຍະດຽວກັນຂອງ ປີຜ່ານມາເພີ່ມຂຶ້ນ 35,96%, ດ້ານລາຍຈ່າຍສາມາດເບີກຈ່າຍໄດ້ທັງໝົດ 3 ຕື້ກວ່າກີບ ເທົ່າກັບ 21,85% ຂອງແຜນການປີ ທຽບໃສ່ໄລຍະດຽວກັນຂອງປີຜ່ານມາເພີ່ມຂຶ້ນ 49,26%, ນອກນັ້ນ ຍັງແບ່ງຄວາມຮັບຜິດຊອບໃຫ້ການເງິນບ້ານຄຸ້ມຄອງຈັດເກັບທັງໝົດ 628 ລ້ານກີບ ທຽບໃສ່ປີຜ່ານມາ ເພີ່ມຂຶ້ນ 25,85% ຜ່ານການປະຕິບັດແຜນການ 3 ເດືອນຕົ້ນປີ ສາມາດຈັດ ເກັບລາຍຮັບເຂົ້າງົບ ປະມານໄດ້ທັງໝົດ 200 ລ້ານກີບ ເທົ່າກັບ 31,98% ຂອງແຜນການປີ.

     ທ່ານ ແຫຼ້ທອງ ພົມມະຈິດ ຍັງກ່າວໃຫ້ຮູ້ອີກວ່າ: ສຳລັບທິດທາງແຜນການງວດ II ປີ 2018 ນີ້, ຄາດໝາຍສູ້ຊົນເກັບລາຍຮັບຈາກ ສ່ວຍສາອາກອນ ແລະຊັບສິນ ມອບເຂົ້າງົບປະມານໃຫ້ໄດ້ 3,73 ຕື້ກັບ ແລະແຜນລາຍຈ່າຍທັງໝົດ 4,16 ຕື້ກີບ, ພ້ອມນີ້ບັນດາຜູ້ເຂົ້າ ຮ່ວມກໍ່ໄດ້ຜັດປ່ຽນກັນປະກອບ ຄຳຄິດຄຳເຫັນຕໍ່ກອງປະຊຸມຢ່າງກົງໄປກົງມາ ແລະມີຄວາມຮັບຜິດຊອບສູງ.

     ໃນຕອນທ້າຍຂອງກອງປະຊຸມກໍ່ໄດ້ເປັນກຽດຮັບຟັງການໂອ້ລົມ ແລະໃຫ້ທິດຊີ້ນຳຈາກທ່ານ ປະທານກອງປະຊຸມ ຊຶ່ງທ່ານໄດ້ເນັ້ນໜັກໃຫ້ຄະນະຮັບຜິດຊອບຊຸກຍູ້ລາຍຮັບຂັ້ນເມືອງ ສືບຕໍ່ແຕ່ງຕັ້ງຄະນະຊຸກຍູ້ລາຍຮັບລົງຕິດຕາມກວດກາເປັນປະຈຳ, ໃນທຸກໆສາມເດືອນແມ່ນໃຫ້ຈັດກອງປະຊຸມເພື່ອຖອດຖອນບົດຮຽນ, ແຕ່ ລະຂະແໜງການແມ່ນໃຫ້ຖືເອົາແຜນຈັດເກັບລາຍຮັບເຂົ້າເປັນວຽກງານປະຈຳເດືອນ ເພື່ອຈັດເກັບ ແລະມອບລາຍຮັບເຂົ້າງົບ ປະມານໃຫ້ທ່ວງທັນ, ໃຫ້ຫົວໜ້າ ແຕ່ລະຂະແໜງການຕິດຕາມໃນ ການຈັດເກັບລາຍຮັບວິຊາການ ແລະໃຫ້ເພີ່ມຄວາມຖືກຕ້ອງ, ຄວາມໂປ່ງໃສສາມາດກວດສອບ ໄດ້ຢ່າງຈະແຈ້ງ ແລະລະອຽດອີກຕື່ມ.

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ

ຜູ້ໃຊ້ເຂົ້າສູ່ລະບົບ

ປະຕິທິນຂ່າວ “ເສດຖະກິດ-ສັງຄົມ”

« ມິຖຸນາ 2018 »
Mon Tue Wed Thu Fri Sat Sun
        1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30  
ໄປເທິງສຸດ