ຄາດວ່າຕ່າງຊາດຢ້ຽມຢາມ ກຳປູເຈຍ 6 ລ້ານຄົນ

   ກຳປູ​ເຈຍ​ຄາດ​ວ່າ ປີ 2018 ອຸດສາຫະກໍາ​ການທ່ອງທ່ຽວ ຈະ​ຂະຫຍາຍຕົວ​ຢ່າງ​ຕໍ່​ເນື່ອງ ຫຼັງ​ຈາກ​ປີ​ 2017 ມີ​ນັກ​ທ່ອງ​ທ່ຽວ​ເພີ່ມ​ຫຼາຍ​ຂຶ້ນ​ເປັນ​ປະຫວັດສາດ​ເກືອບ 5 ລ້ານ​ຄົນ.

 

   ຕາມ​ຂ່າວ​ຕ່າງປະ​ເທດ​ລາຍ​ງານ​ວ່າ: ທ່ານ ​ເມນ ພິມ ຜູ້ອຳນວຍການ​ສຳນັກງານ​ວາງ​ແຜນ ສັງກັດ ກະຊວງ​ການທ່ອງທ່ຽວ​ກຳປູ​ເຈຍ​ຄາດ​ວ່າ ປີ 2018 ນີ້​ອຸດສາຫະກຳ​ການທ່ອງທ່ຽວ​ກຳປູ​ເຈຍ​ຈະ​ເຕີບ​ໂຕ​ຕໍ່​ເນື່ອງ ​ໂດຍ​ຈະ​ມີ​ນັກ​ທ່ອງ​ທ່ຽວ​ຕ່າງປະ​ເທດ​ເຂົ້າ​ມາ​ທ່ຽວ​ກຳປູ​ເຈຍ​ຢ່າງ​ໜ້ອຍ 6 ລ້ານ​ຄົນ ສ້າງ​ລາຍ​ໄດ້​ເຂົ້າປະ​ເທດ​ໄດ້​ຕາມ​ເປົ້າ​ ໝາຍ 4 ຕື້​ໂດ​ລາ​ສະຫະລັດ ຂະນະ​ດຽວ​ກັນ​ກໍ​ຄາດ​ວ່າ ຈະ​ຮອງ​ຮັບ​ນັກ​ທ່ອງ​ທ່ຽວ​ພາຍ​ໃນ​ປະ​ເທດ​ໄດ້ 15 ລ້ານ​ຄົນ ທັງ​ນີ້​ກຳປູ​ເຈຍ​ວາງ​ແຜນ​ຈະ​ເພີ່ມ​ຖ້ຽວ​ບິນ ​ເພື່ອ​ອຳນວຍ​ຄວາມ​ສະດວກ ​ແລະ ດຶງ​ດູດ​ການທ່ອງທ່ຽວ​ໃຫ້​ເພີ່ມ​ຂຶ້ນ​ທຸກ​ປີ ​ແຕ່​ສິ່ງ​ທີ່​ລັດຖະບານ​ຈຳ​ເປັນ​ຕ້ອງ​ດຳ​ເນີນ​ການ​ຄື ວາງ​ມາດ​ຕະການ​ຮັກສາ​ຄວາມ​ໝັ້ນຄົງ​ຄວາມ​ປອດ​ໄພ ​ໂດຍ​ຍັງ​ເພີ່ມ​ຖ້ຽວ​ບິນ​ເຂົ້າກຳ​ປູ​ເຈຍ ​ແລະ ປັບປຸງ​ໂຄງ​ສ້າງ​ພື້ນຖານ​ພາຍ​ໃນ​ປະ​ເທດ​ໃຫ້​ດີ​ຂຶ້ນ.

   ກ່ອນ​ໜ້າ​ນີ້ ນັກ​ທ່ອງ​ທ່ຽວ​ຕ່າງປະ​ເທດ 5 ອັນ​ດັບ​ທຳ​ອິດ​ທີ່​ເດີນທາ​ງມາ​ທ່ຽວ​ໃນ​ກຳປູູ​ເຈຍ​ຄື, ອາ​ເມ​ລິ​ກາ, ຝຣັ່ງ, ອັງກິດ ​ແຕ່​ປັດຈຸບັນ​ນັກ​ທ່ອງ​ທ່ຽວ​ຈາກ​ອາຊີ​ເຂົ້າ​ມາ​ທ່ຽວ​ກຳປູ​​ເຈຍ​ຫຼາຍ​ແທນ​ທີ່​ຄື ສປ ຈີນ, ສສ ຫວຽດນາມ, ສປປ ລາວ, ສ ​ເກົາຫຼີ ​ແລະ ​ໄທ.

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ
ໄປເທິງສຸດ