ກຳປູເຈຍ ສົ່ງອອກຢາງພາລາເພີ່ມຂຶ້ນ 30%

   ຫົວໜ້າ​ກົມ​ຢາງພາລາ​ກຳປູ​ເຈຍ​ເປີດ​ເຜີຍ​ວ່າ ​ເຖິງ​ແມ່ນ​ວ່າ​ປະລິມານ​ການ​ສົ່ງ​ອອກ​ໃນ​ປີ 2017 ຈະ​ເພີ່ມ​ຂຶ້ນ 30% ​ແຕ່​ບັນຫາ​ການ​ລັກລອບ​ນຳ​ເຂົ້າ​ຕາມ​ແນວ​ຊາຍ​ແດນ​ອາດ​ສົ່ງ​ຜົນ​ກະທົບ​ຕໍ່​ຢາງພາລາ​ກຳປູ​ເຈຍ.

 

   ຕາມ​ຂ່າວ​ຕ່າງປະ​ເທດ​ລາຍ​ງານ​ວ່າ ທ່ານ pol Sopha ອະດີດ​ກົມ​ຢາງພາລາ ກະຊວງ​ກະສິກຳ​ກຳປູ​ເຈຍ​ກ່າວ​ວ່າ ການ​ສົ່ງ​ອອກ​ຢາງພາລາ​ໃນ​ປີ 2017 ສ້າງ​ມູນ​ຄ່າ​ລວມ 300 ລ້ານ​ໂດ​ລາ​ສະຫະລັດ ຈາກ​ການ​ສົ່ງ​ອອກ 189 ພັນ​ໂຕນ ​ເຊິ່ງ​ເພີ່ມ​ຂຶ້ນ 30% ​ເມື່ອ​ທຽບ​ປີຜ່ານມາ ສຳລັບ​ລາຄາ​ຢາງພາລາ​ຕໍ່​ໂຕນ​ສູງ​ເຖິງ 1.586 ​ໂດ​ລາ ​ເພີ່ມ​ຂຶ້ນ 24% ​ເມື່ອ​ປຽບທຽບກັບ​ປີ 2016 ທີ່​ມີ​ລາຄາ​ສູງ​ສຸດ​ຢູ່​ທີ່ 1.283 ​ໂດ​ລາ ຢ່າງ​ໃດ​ກໍ​ຕາມ ການ​ທີ່​ອຸດສາຫະກຳ​ຢາງພາລາ​ມີ​ການ​ເຕີບ​ໂຕ​ໃນ​ທິດ​ທາງ​ທີ່​ດີ​ຂຶ້ນ ຈິ່ງ​ເຮັດ​ໃຫ້​ເກີດ​ການ​ລັກລອບ​ນຳ​ເຂົ້າ​ຢາງພາລາ​ຈຳນວນ​ຫຼາຍ​ເຂົ້າ​ມາ​ໃນ​ປະ​ເທດ.

​      ປັດຈຸບັນ​ລາຄາ​ຢາງພາລາ​ຍັງ​ຢູ່​ໃນ​ລະດັບ​ທີ່​ນ້າ​ພໍ​ໃຈ​ສຳລັບ​ຜູ້​ປະກອບ​ການ ​ແຕ່​ເລື່ອງ​ທີ່​ມີ​ຄວາມ​ກັງວົນ ​ແລະ ​ເປັນ​ບັນຫາ​ທີ່​ຕ້ອງ​ໄດ້​ແກ້​ໄຂ ຄື​ການ​ລັກລອບ​ນຳ​ເຂົ້າ​ຢາງພາລາ​ຕາມ​ແນວ​ຊາຍ​ແດນ ​ເຊິ່ງ​ເປັນ​ເລື່ອງ​ຍາກ​ຕໍ່​ການ​ຄວບ​ຄຸມ.

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ
ໄປເທິງສຸດ