ຄົນ ຈີນ 13 ລ້ານຄົນຫຼຸດພົ້ນຄວາມທຸກຍາກ

    ທາງ​ການ​ຂອງ​ສປ ຈີນ​ເປີດ​ເຜີຍ ຄົນ​ຈີນ​ຫຼາຍ​ກວ່າ 13 ລ້ານ​ຄົນ​ມີ​ລາຍ​ໄດ້​ເພີ່ມ​ຂຶ້ນ​ຈົນ​ຫຼຸດ​ພົ້ນ​ອອກ​ຈາກ​ຄວາມທຸກ​ຍາກ​ປີ 2017 ​ເຊິ່ງການ​ແກ້​ໄຂ​ບັນຫາ​ຄວາມທຸກ​ຍາກ ​ເປັນ​ວາລະ​ສຳຄັນ​ທີ່​ລັດຖະບານ​ໃຫ້​ຄວາມ​ສຳຄັນ​ທີ່​ສຸດ.

 

     ຕາມ​ຂ່າວ​ຕ່າງປະ​ເທດ​ລາຍ​ງານ​ວ່າ ສຳນັກງານ​ບັນ​ເທົາ​ທຸກ ​ແລະ ການ​ພັດທະນາ​ຂອງ​ຈີນ​ເປີດ​ເຜີຍ​ວ່າ ​ໃນ​ປີ 2017 ຜ່ານ​ມາ ມີ​ຄົນ​ຈີນ​ຫຼາຍ​ກວ່າ 13 ລ້ານ​ຄົນ​ທີ່​ມີ​ລາຍ​ໄດ້​ເພີ່ມ​ຂຶ້ນ ​ແລະ ມີ​ຄຸນ​ນະພາ​ບຊີວິດ​ທີ່​ດີ​ຂຶ້ນ ຈົນ​ຫຼຸດ​ພົ້ນ​ອອກ​ຈາກ​ຄວາມທຸກ​ຍາກ ​ເຊິ່ງຫາກ​ນັບ​ເວລາ​ທີ່​ລັດຖະບານ​ຈີນ​ເລີ່​ມດຳ​ເນີນ​ນະ​ໂຍບາຍ​ເພື່ອ​ຊ່ວຍ​ເຫຼືອ​ຄົນ​ທຸກ​ຍາກ​ມາກ​ວ່າ 5 ປີ ຕອນ​ນີ້​ກໍ​ມີ​ຄົນ​ຈີນ​ລວມທັງ​ໝົດ 69 ລ້ານ​ຄົນ​ທີ່​ຫຼຸດ​ພົ້ນ​ອອກ​ຈາກ​ຄວາມທຸກ​ຍາກ​ແລ້ວ ສ່ວນ​ອັດຕາ​ຄວາມທຸກ​ຍາກ​ກໍ​ຫຼຸດ​ລົງ​ຈາກ 10,2%​ໃນ​ປີ 2012 ລົງ​ມາ​ເຫຼືອ 3,1% ​ໃນ​ປີ 2017 ທີ່​ຜ່ານ​ມາ.ຢ່າງ​ໃດ​ກໍ​ຕາມ ຍັງ​ມີ​ຄົນ​ຈີນ​ອີກ 30 ລ້ານ​ຄົນ​ທີ່​ຍັງ​ຢູ່​ພາຍ​ໃຕ້​ເສັ້ນ​ຄວາມທຸກ​ຍາກ ຂະນະ​ທີ່​ລັດຖະບານ​ຈີນ​ວາງ​ແຜນ​ວ່າ ຈະ​ຕ້ອງ​ນຳພາ​ປະ​ຊາ​ຊົນ​ທຸກ​ຄົນ​ໃຫ້​ຫຼຸດ​ພົ້ນ​ຈາກ​ຄວາມທຸກ​ຍາກ​ພາຍ​ໃນ​ປີ 2020 ​ເຊິ່ງ​ເປັນ​ສ່ວນ​ໜຶ່ງ​ຂອງ​ການ​ສັງຄົມ​ມັ່ງ​ຄັ່ງລະດັບ​ປານ​ກາງ​ຕາມ​ຍຸດ​ທະ​ສາດ​ການ​ພັດທະນາ​ປະ​ເທດ ​ແລະ ​ໃນ​ປີ​ນີ້ ລັດຖະບານ​ກໍ​ຕັ້ງ​ເປົ້າ​ວ່າ ຈະ​ຕ້ອງ​ຊ່ວຍ​ເຫຼືອ​ປະຊາຊົນ​ອີກ​ຢ່າງ​ໜ້ອຍ 10 ລ້ານ​ຄົນ​ໃຫ້​ຫຼຸດ​ພົ້ນ​ຈາກ​ຄວາມທຸກ​ຍາກ.

    ການ​ແກ້​ໄຂ​ບັນຫາ​ຄວາມທຸກ​ຍາກ​ເປັນ​ໜຶ່ງ​ໃນ​ວາລະ​ທີ່​ລັດຖະບານ​ຈີນ​ໃຫ້​ຄວາມ​ສຳຄັນ​ເປັນອັນ​ດັບ​ທຳ​ອິດ ​ເຊິ່ງມາດ​ຕະການ​ຊ່ວຍ​ເຫຼືອຂອງ​ລັດຖະບານ​ຈີນ​ກໍ​ມີ​ທັງ​ການ​ຊ່ວຍ​ຫາ​ຕະຫຼາດ ສຳລັບ​ຜົນ​ຜະລິດ​ທາງ​ກະສິກຳ ​ແລະ ພັດທະນາ​ສີມື​ໃຫ້ກັບ​ປະຊາຊົນ​ເພື່ອ​ຊ່ວຍ​ໃຫ້​ສາມາດຫາ​ວຽກ​ທີ່​ມີ​ລາຍ​ໄດ້​ໝັ້ນຄົງ​ຫຼາຍ​ຂຶ້ນ ລວມທັງ​ການ​ລົງທຶນ​ຂອງ​ລັດຖະບານ​ໃນ​ພື້ນ​ທີ່​ຕ່າງໆ​ເພື່ອ​ສ້າງ​ວຽກ​ເຮັດ​ໃຫ້​ກັບ​ຊຸມ​ຊົນ.

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ
ໄປເທິງສຸດ