ສສຂ ສະຫວັນນະເຂດ ກອງປະຊຸມສະໄໝສາມັນເທື່ອທີ 3 ຂອງ ສພຂ

   ກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນ ແຂວງສະຫວັນນະເຂດ ຊຸດທີ I ​ໄຂຂຶ້ນຢ່າງເປັນທາງໃນວັນທີ 24 ກໍລະກົດ 2017 ທີ່ຫໍວັດທະນະທຳ ໄກສອນ ພົມວິຫານ

ພາຍໃຕ້ການເຂົ້າຮ່ວມຂອງທ່ານ ພົນໂທ ແສງ ນວນ ໄຊຍະລາດ ຄະນະເລຂາທິການສູນກາງພັກ ຮອງປະທານສະພາແຫ່ງຊາດ, ມີບັນດາທ່ານ ສສຊ-ສສຂ, ກົງສູນໃຫຍ່ແຫ່ງ ສສ ຫວຽດນາມ ແລະກົງສູນແຫ່ງລາຊະອານາຈັກໄທປະຈຳແຂວງ, ບັນດາພະແນກການອ້ອມຂ້າງ, ເຈົ້າເມືອງ-ຮອງເຈົ້າເມືອງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

   ທ່ານ ປອ. ຄຳເຜີຍ ຜັນທະຈອນປະທານສະພາປະຊາຊົນ ແຂວງ ສະຫວັນນະເຂດ ໄດ້ກ່າວເປີດພິທີຢ່າງເປັນທາງການໂດຍທ່ານໄດ້ຍົກໃຫ້ເຫັນວ່າ: ໃນກອງປະຊຸມຄັ້ງນີ້ຈະໄດ້ພິຈາລະນາຮັບຮອງເອົາບັນດາບັນຫາສຳຄັນພື້ນຖານເພື່ອນຳເອົາແຂວງສະຫວັນນະເຂດພວກເຮົາກ້າວຂຶ້ນຕະຫຼອດ 5 ປີ, ກໍ່ຄືໃນປີ 2017 ໃນທ່ວງທ່າແຫ່ງການຂະຫຍາຍຕົວໃໝ່, ສຳລັບສະພາປະຊາຊົນແຂວງໃນຖານະເປັນຕົວແທນແຫ່ງສິດ ຜົນປະໂຫຍດຂອງປະຊາຊົນບັນດາເຜົ່າເຮັດພາລະບົດບາດພິຈາລະນາ, ຮັບຮອງ ແລະ ກວດກາ ການຈັດຕັ້ງປະຕິບັດລັດຖະທຳມະ ນູນ ແລະກົດໝາຍ, ກວດກາແຜນພັດທະນາເສດຖະກິດ-ສັງຄົມ ແລະ ວຽກງານອື່ນໆເພື່ອໃຫ້ທ່ານສະມາຊິກສະພາແຫ່ງຊາດປະຈຳເຂດເລືອກຕັ້ງທີ 13 ແລະທ່ານສະ ມາຊິກສະພາປະຊາຊົນແຂວງໄດ້ເຮັດໜ້າທີ່ຕາມທີ່ໄດ້ກຳນົດໄວ້ດ້ວຍຄວາມຮັບຜິດຊອບ ແລະ ເປັນເຈົ້າການ.

   ກອງປະຊຸມໄດ້ຮັບຟັງການ ລາຍງານໂດຍສັງເຂບຂອງທ່ານ ສັນຕິພາບ ພົມວິຫານກ່ຽວກັບສະພາບການພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດຂອງແຂວງປະຈຳ 6 ເດືອນຕົ້ນປີ ແລະ ທິດທາງແຜນການ 6 ເດືອນ ທ້າຍປີ 2017, ຮັບຟັງການລາຍ ງານຂອງພະແກນແຜນການ ແລະ ການລົງທຶນແຂວງກ່ຽວກັບການຈັດຕັ້ງປະຕິບັດແຜນພັດທະນາ ເສດຖະກິດ-ສັງຄົມຂອງແຂວງ ປະຈຳ 6 ເດືອນຕົ້ນປີ ແລະທິດ ທາງແຜນການ 6 ເດືອນທ້າຍປີ 2017, ຮັບຟັງການລາຍງານຂອງຫົວໜ້າພະແນກການເງິນ ແຂວງກ່ຽວກັບການຈັດຕັ້ງປະຕິບັດແຜນງົບປະມານແຫ່ງລັດ ຂອງແຂວງປະຈຳ 6 ເດືອນຕົ້ນປີ ແລະ ທິດທາງແຜນການ 6 ເດືອນ ທ້າຍປີ 2017; ຈາກນັ້ນບັນດາ ສສຊ-ສສຂ ກໍ່ໄດ້ປະກອບຄຳເຫັນໃນນັ້ນການປະກອບຫຼາຍທີ່ສຸດ ແລະເປັນບັນຫາຕົ້ນຕໍແມ່ນເລັ່ງໃສ່ບັນດາມາດຕະການໃນການຈັດເກັບລາຍຮັບເຂົ້າງົບປະມານ, ການຄຸ້ມຄອງ, ການຈັດຕັ້ງປະຕິບັດແຜນລົບລ້າງຄວາມທຸກຍາກ. ເວົ້າລວມບັນດາຜູ້ແທນໄດ້ເອົາໃຈ ໃສ່ ແລະ ເປັນຫ່ວງເປັນໄຍຫຼາຍທີ່ ສຸດແມ່ນຕໍ່ກັບຖານລາຍຮັບງົບປະມານຊຶ່ງໃນຫຼາຍໆປີແມ່ນເຫັນວ່າ ວຽກງານດັ່ງກ່າວຍັງບໍ່ທັນຈະແຈ້ງ ແລະ ລະອຽດໂດຍສະເພາະ ວຽກຈັດເກັບລາຍຮັບຈາກການຄຸ້ມຄອງທີ່ດິນທີ່ເຫັນວ່າເປັນລາຍຮັບຖາວອນແຕ່ວ່າການຈັດເກັບລາຍຮັບແມ່ນເຮັດບໍ່ໄດ້ດີເທົ່າທີ່ຄວນ. ໃນວຽກງານແຜນພັດທະນາເສດຖະກິດ-ສັງຄົມບັນດາຜູ້ແທນແມ່ນເລັ່ງໃສ່ໃນການແກ້ໄຂຄວາມທຸກຍາກ, ແຜນພັດທະນາຊັບພະຍາກອນມະນຸດ, ການລົງທຶນສ້າງບັນດາພື້ນຖານໂຄງລ່າງແຕ່ລະອັນທີ່ເຫັນວ່າຍັງມີຄວາມຫຍຸ້ງຍາກເຊັ່ນຖະໜົນຫົນທາງ, ໄຟຟ້າຊຶ່ງເປັນສິ່ງທີ່ປະຊາຊົນຮຽກຮ້ອງຫຼາຍທີ່ສຸດ.

   ພ້ອມກັນນີ້ ບັນດາ ສສຊ-ສສຂ ກໍ່ໄດ້ຍົກບັນຫາ ແລະ ຄຳສະເໜີຕ່າງໆຕໍ່ການນຳຂອງແຂວງ ແລະ ພະແນກການເພື່ອຫາທາງອອກຮ່ວມກັນເປັນຕົ້ນ: ການຈັດເກັບລາຍຮັບທີ່ຮົ່ວໄຫຼ ແລະ ຫາວິທີອັດຕັນ ໂດຍນຳໃຊ້ເຄື່ອງມືທັນ ສະໄໝອາດເຮັດໃຫ້ການຈັດເກັບລາຍຮັບເພີ່ມຂຶ້ນແທ້ແຕ່ພະນັກງານບາງຄົນບໍ່ໄດ້ລາຍຮັບອາດເກີດມີແນວຄິດບໍ່ຢາກເຮັດວຽກ ແລະເຮັດແລ້ວພັດບໍ່ເອົາໃຈໃສ່ ເທົ່າທີ່ຄວນຊຶ່ງບັນຫາເຫຼົ່ານີ້ບັນດາຜູ້ແທນແມ່ນເປັນຫ່ວງທີ່ສຸດ. ໃນກອງປະຊຸມກໍ່ຍັງຈະໄດ້ມີການເຈາະຈີ້ມຫຼາຍບັນຫາຕື່ມອີກ, ທັງນີ້ກໍ່ເພື່ອຈະໄດ້ພ້ອມກັນຫາວິທີແກ້ໄຂໃນຕໍ່ໜ້າ. ກອງປະຊຸມຄັ້ງນີ້ຈະໄດ້ປິດລົງໃນວັນທີ 28 ກໍລະ ກົດນີ້.

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ

ຜູ້ໃຊ້ເຂົ້າສູ່ລະບົບ

ປະຕິທິນຂ່າວ “ເສດຖະກິດ-ສັງຄົມ”

« ທັນວາ 2017 »
Mon Tue Wed Thu Fri Sat Sun
        1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

ຄຳເຫັນຜູ້ອ່ານ

ໄປເທິງສຸດ