ປະທານສະສາມຄົມມິດຕະພາບຂັ້ນແຂວງເຜີຍຄວາມຮູ້ສຶກຕໍ່ 2 ວັນປະຫວັດສາດ

     ທ່ານ ສົມໃຈ ເພັດສີນວນ ຮອງເລຂາພັກແຂວງ, ປະທານສະພາປະ ຊາຊົນແຂວງຄຳມ່ວນ ທັງເປັນປະທານສະມາຄົມມິດຕະພາບລາວ-ຫວຽດນາມຂັ້ນແຂວງ

ໄດ້ສະແດງຄວາມຮູ້ສຶກຕໍ່ກັບ 2 ວັນປະຫວັດສາດແຫ່ງ ສາຍພົວພັນທີ່ມີມູນເຊື້ອຄວາມສາມັກຄີແບບພິເສດ ແລະ ຮ່ວມມືຮອບດ້ານຄື: ວັນສ້າງຕັ້ງສາຍພົວພັນການທູດລາວ-ຫວຽດນາມ ຄົບຮອບ 55 ປີ ແລະວັນເຊັນສົນທິສັນຍາມິດຕະພາບລາວ-ຫວຽດນາມ ຄົບຮອບ 40 ປີ. ເຊິ່ງສະມາຄົມມິດຕະພາບລາວ-ຫວຽດນາມ ແມ່ນອົງການຈັດຕັ້ງທີ່ ປະຕິບັດພາລະບົດບາດ ເປັນຂົວຕໍ່ໃຫ້ແກ່ 2 ພັກ-ລັດ ແລະປະຊາຊົນ 2 ຊາດ, ເສີມຂະຫຍາຍສາຍພົວພັນມິດຕະພາບ, ຄວາມສາມັກຄີໃຫ້ແໜ້ນແຟ້ນ ເພີ່ມທະວີຢ່າງບໍ່ຢຸດຢັ້ງ.

     ພັກປະຊາຊົນປະຕິວັດລາວ ມີຕົ້ນກຳເນີດມາຈາກພັກຄອມມູຍນິດອິນດູຈີນ ເຊິ່ງແມ່ນປະທານໂຮ່ຈິມິນເປັນຜູ້ກໍ່ຕັ້ງຂຶ້ນ ແລະໄດ້ແຍກອອກມາ ເປັນພັກປະຊາຊົນປະຕິວັດລາວ ໃນວັນທີ 22/3/1955 ໂດຍແມ່ນປະທານ ໄກສອນ ພົມວິຫານ ເປັນເລຂາທິການໃຫຍ່ຜູ້ທຳອິດ. ກອງທັບ ແລະປະຊາຊົນ 2 ຊາດລາວ-ຫວຽດນາມ ໄດ້ຮ່ວມກັນຕໍ່ສູ້ກັບຈັກກະພັດທີ່ມາຮຸກຮານເປັນເວລາອັນຍືດເຍື້ອຍາວນານ. ໄດ້ຮ່ວມຄຸ້ມຄອງ ແລະສະໝໍລະພູມນຳກັນຕະຫຼອດມາ, ນ້ຳຕາ ແລະຢາດເລືອດໄດ້ເຈືອຈານເຂົ້າກັນຊຶ່ງບໍ່ມີວັນຫຼົງລືມໄດ້, ຮ່ວມສຸກຮ່ວມທຸກສະແດງອອກບ່ອນວ່າ: “ເຂົ້າ ເມັດຫັກ, ຜັກເສັ້ນໜຶ່ງກໍ່ແບ່ງປັນກັນກິນ” ການໄດ້ມາແຫ່ງຄວາມສຸກ ຄວາມຈະເລີນສູ່ມື້ນີ້ແມ່ນມາຈາກການເສຍສະຫຼະເຫື່ອແຮງ, ການເສຍອົງຄະ ແລະເສຍສະຫຼະຊີວິດຂອງພວກເພິ່ນໃນເມື່ອກ່ອນ. ທຸກໄຊຊະນະຂອງການປະຕິວັດລາວ ແລະທຸກໄຊຊະນະຂອງການປະຕິວັດຫວຽດນາມ ແມ່ນບໍ່ອາດປະຕິເສດການທີ່ມີສ່ວນຮ່ວມແບບເປັນຕາຍ ເຊິ່ງກັນ ແລະກັນໄດ້ ຈົນກາຍມາເປັນກົດເກນແຫ່ງການຂະຫຍາຍຕົວ ແລະຄົງຕົວຂອງ 2 ປະເທດລາວ-ຫວຽດນາມໃນປະຈຸບັນ. ເປັນມໍລະດົກອັນລ້ຳຄ່າ ແລະເປັນໜຶ່ງໃນປັດໄຈຕັດສິນໄຊຊະນະຂອງການປະຕິວັດຢູ່ແຕ່ລະປະເທດ. ມາຮອດປະຈຸບັນສາຍພົວພັນທີ່ຫາຍາກນັ້ນຍັງສືບຕໍ່ໄດ້ຮັບການເສີມຂະຫຍາຍທັງທາງກວ້າງ ແລະ ທາງເລິກ ພວມເປັນໂອກາດ ແລະຜົນປະໂຫຍດຕົວຈິງແກ່ປະຊາຊົນ 2 ຊາດລາວ-ຫວຽດນາມ. ພວກເຮົາຄວນສືບຕໍ່ອົບຮົມຊາວໜຸ່ມເຍົາວະຊົນ ແລະປະຊາຊົນ 2 ຊາດລາວ-ຫວຽດນາມ ໃຫ້ຮັບຮູ້ ແລະເຂົ້າໃຈຢ່າງເລິກເຊິ່ງຕໍ່ສາຍພົວພັນອັນພິເສດທີ່ຫາຍາກໃນໂລກ ໂດຍສະເພາະແມ່ນການເສຍສະຫຼະອັນໃຫຍ່ຫຼວງຂອງນັກປະຕິວັດຮຸ້ນກ່ອນ ທີ່ເຕັມໄປດ້ວຍຄວາມບໍລິສຸດຜຸດຜ່ອງ ທີ່ທ່ານປະທານໂຮ່ຈິມິນ ຜູ້ນຳທີ່ຍິ່ງໃຫຍ່ ແລະປະທານ ໄກສອນ ພົມວິຫານ ຜູ້ ນຳທີ່ແສນເຄົາລົບຮັກໄດ້ສ້າງມາ.

     ປະຈຸບັນແຂວງຄຳມ່ວນໄດ້ມີການສະເຫຼີມສະຫຼອງ 2 ວັນປະຫວັດສາດດັ່ງກ່າວຢ່າງເປັນຂະບວນຟົດຟື້ນ. ເຊິ່ງການນຳຂອງແຂວງໄດ້ແຕ່ງຕັ້ງຄະນະຮັບຜິດຊອບ ຂັ້ນແຂວງ, ຂັ້ນເມືອງ ຈັດກິດຈະກຳສະຫຼອງສອງ ວັນດັ່ງກ່າວ ແລະຈະໄດ້ສືບຕໍ່ຈັດງານລະຫວ່າງເມືອງຊາຍແດນ, ເມືອງແຮກສ່ຽວ ແຂວງຄຳມ່ວນ-ກວາງບິ່ງ ແລະພະແນກການຕ່າງໆຢ່າງຕໍ່ເນື່ອງຕະຫຼອດສົກປີ 2017 ນີ້.

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ

ຜູ້ໃຊ້ເຂົ້າສູ່ລະບົບ

ປະຕິທິນຂ່າວ “ເສດຖະກິດ-ສັງຄົມ”

« ທັນວາ 2017 »
Mon Tue Wed Thu Fri Sat Sun
        1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

ຄຳເຫັນຜູ້ອ່ານ

ໄປເທິງສຸດ