ຫຼາຍຂະແໝງຮັບຟັງການເຜີຍແຜ່ກົດໝາຍວ່າດ້ວຍສົນທິສັນຍາ ແລະ ສັນຍາສາກົນ

   ໃນລະຫວ່າງວັນທີ 29-30 ມັງກອນ 2018,ທີ່ຫ້ອງປະຊຸມຫ້ອງວ່າການປົກຄອງແຂວງບໍລິຄຳໄຊ,ກະຊວງການຕ່າງປະເທດໄດ້ຈັດຕັ້ງກອງປະຊຸມເຜີຍແຜ່ກົດໝາຍວ່າດ້ວຍ

ສົນທິສັນຍາ ແລະສັນຍາສາກົນ ແລະທາບທາມຮ່າງນິຕິກຳກ່ຽວກັບຂະແໜງການຕ່າງປະເທດຂັ້ນທ້ອງຖິ່ນ,ພາຍໃຕ້ການເປັນປະທານຂອງທ່ານນາງ ຄຳເພົາ ເອີນທະວັນ,ຮອງລັດຖະມົນຕີກະຊວງການຕ່າງປະເທດ,ໂດຍມີບັນດາທ່ານຮອງເຈົ້າແຂວງ,ຮອງປະທານສະພາປະຊາຊົນແຂວງ ແລະຜູ້ຕາງໜ້າຈາກຂະແໜງການຕ່າງໆທີ່ກ່ຽວຂ້ອງຈາກແຂວງວຽງຈັນ,ຄຳມ່ວນ,ສະຫວັນນະເຂດ,ໄຊສົມບູນ,ຊຽງຂວາງ,ບໍລິຄຳໄຊ ແລະນະຄອນຫຼວງວຽງຈັນເຂົ້າຮ່ວມ.

   ກອງປະຊຸມດັ່ງກ່າວຜູ້ເຂົ້າຮ່ວມໄດ້ຮັບຟັງການເຜີຍແຜ່ກົດໝາຍໃໝ່ວ່າດ້ວຍສົນທິສັນຍາ ແລະສັນຍາສາກົນ,ເຊິ່ງເປັນກົດໝາຍທີ່ຮ່າງຂຶ້ນໂດຍກະຊວງການຕ່າງປະເທດໂດຍໄດ້ຜ່ານການຮັບຮອງຈາກສະພາແຫ່ງຊາດໃນເດືອນພຶດສະພາ 2017 ແລະຖືກປະກາດໃຊ້ໂດຍປະທານປະເທດເມື່ອວັນທີ 18 ພະຈິກ 2017 ຜ່ານມາ,ໂດຍແມ່ນຄະນະວິຊາການຜູ້ຊ່ຽວຊານຈາກກົມສົນທິສັນຍາ ແລະກົດໝາຍ,ກະຊວງການຕ່າງປະເທດເປັນຜູ້ບັນຍາຍ.ຈຸດປະສົງຕົ້ນຕໍໃນການເຜີຍແຜ່ກົດໝາຍໃນຄັ້ງນີ້ກໍເພື່ອສ້າງຄວາມຮັບຮູ້ ແລະຄວາມເຂົ້າໃຈໃຫ້ຜູ້ເຂົ້າຮ່ວມກອງປະຊຸມ,ແນໃສ່ຮັບປະກັນໃຫ້ມີຄວາມເປັນເອກະພາບໃນການຈັດຕັ້ງປະຕິບັດກົດໝາຍດັ່ງກ່າວລະຫວ່າງສູນກາງ ແລະທ້ອງຖິ່ນ.ກອງປະຊຸມໄດ້ແລກປ່ຽນຄວາມຄິດເຫັນກ່ຽວກັບຫຼັກການ ແລະລະບຽບການໃນການສ້າງ ແລະຈັດຕັ້ງປະຕິບັດສົນທິສັນຍາ ແລະສັນຍາສາກົນຕາມທີ່ໄດ້ກຳນົດໄວ້ໃນກົດໝາຍໂດຍການສົມທຽບໃສ່ການປະຕິບັດວຽກງານດັ່ງກ່າວໃນໄລຍະຜ່ານມາ.ກົດໝາຍສະບັບນີ້ເປັນບ່ອນອີງທີ່ສໍາຄັນໃຫ້ແກ່ບັນດາອົງການຂັ້ນທ້ອງຖິ່ນໃນການຮ່ວມມືກັບຕ່າງປະເທດ ແລະເຊື່ອມໂຍງທາງດ້ານເສດຖະກິດກັບພາກພື້ນ.ການສ້າງກົດໝາຍສະບັບນີ້ເປັນບາດກ້າວອັນສຳຄັນໃນການພັດທະນາຂະແໜງການຕ່າງປະເທດໄປສູ່ການຄຸ້ມຄອງດ້ວຍກົດໝາຍ ແລະລະບຽບການ ໂດຍສະເພາະແມ່ນການຄຸ້ມຄອງວຽກງານສົນທິສັນຍາ ແລະສັນຍາສາກົນໃຫ້ເປັນເອກະພາບໃນຂອບເຂດທົ່ວປະເທດ,ປະກອບສ່ວນເຂົ້າໃນການຈັດຕັ້ງປະຕິບັດນະໂຍບາຍການຕ່າງປະເທດຂອງພັກ-ລັດໃຫ້ໄດ້ຮັບຜົນດີຍິ່ງໆຂຶ້ນ.

   ນອກຈາກນັ້ນກອງປະຊຸມຍັງໄດ້ພ້ອມກັນສືບຕໍ່ຄົ້ນຄ້ວາ,ປຶກສາຫາລື ແລະແລກປ່ຽນຄວາມຄິດເຫັນຢ່າງຫ້າວຫັນໃສ່ຮ່າງຂໍ້ຕົກລົງວ່າດ້ວຍການຈັດຕັ້ງ ແລະການເຄື່ອນໄຫວຂອງພະແນກການຕ່າງປະເທດຂອງແຂວງ,ນະຄອນຫຼວງ ແລະຮ່າງຂໍ້ຕົກລົງວ່າດ້ວຍມາດຕະຖານຫົວໜ້າພະແນກການຕ່າງປະເທດຂອງແຂວງ,ນະຄອນຫຼວງ.ສອງຮ່າງນິຕິກຳດັ່ງກ່າວ ແມ່ນມີຄວາມສຳຄັນຊຶ່ງຈະກຳນົດທີ່ຕັ້ງ,ພາລະບົດບາດ,ໂຄງປະກອບການຈັດຕັ້ງ,ຂອບເຂດສິດ,ໜ້າທີ່ ແລະ ແບບແຜນວິທີການເຮັດວຽກຂອງພະແນກການຕ່າງປະເທດຂອງແຂວງ,ນະຄອນຫຼວງລວມທັງການແບ່ງຂັ້ນຄຸ້ມຄອງວຽກງານການຕ່າງປະເທດລະຫວ່າງສູນກາງ ແລະທ້ອງຖິ່ນໃຫ້ຈະແຈ້ງຂຶ້ນຕື່ມ ແລະກຳນົດມາດຕະຖານ,ເງື່ອນໄຂ,ສິດ ແລະໜ້າທີ່ຂອງຫົວໜ້າພະແນກການຕ່າງປະເທດຂອງແຂວງ,ນະຄອນຫຼວງໂດຍສອດຄ່ອງກັບກົດໝາຍວ່າດ້ວຍລັດຖະບານປີ 2016,ກົດໝາຍວ່າດ້ວຍການປົກຄອງທ້ອງຖິ່ນປີ 2015,ກົດໝາຍວ່າດ້ວຍພະນັກງານ-ລັດຖະກອນປີ 2015,ກົດໝາຍວ່າດ້ວຍສົນທິສັນຍາ ແລະສັນຍາສາກົນປີ 2017,ດຳລັດວ່າດ້ວຍການຈັດຕັ້ງ ແລະການເຄື່ອນໄຫວຂອງກະຊວງການຕ່າງປະເທດປີ 2017

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ

ຜູ້ໃຊ້ເຂົ້າສູ່ລະບົບ

ປະຕິທິນຂ່າວ “ເສດຖະກິດ-ສັງຄົມ”

« ກຸມພາ 2018 »
Mon Tue Wed Thu Fri Sat Sun
      1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28        

ຄຳເຫັນຜູ້ອ່ານ

ໄປເທິງສຸດ