ທ່ານຮອງນາຍົກລົງຊີ້ນຳ ຂພສ ໄຊເສດຖາ

     ໃນວັນທີ 10 ມັງກອນຜ່ານມາ, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີແຫ່ງ ສປປ ລາວ ພ້ອມດ້ວຍຄະນະໄດ້ລົງຢ້ຽມຢາມເຂດພັດທະນາກວມລວມໄຊເສດຖາ

ໂດຍການຕ້ອນຮັບຂອງທ່ານ ອຸດອນ ແຍງວັນນະວົງ ຫົວໜ້າຄະນະສະພາເຂດພັດທະນາກວມລວມໄຊເສດຖາ, ທ່ານ ຫຼິວ ຮູ ອຳນວຍການບໍລິສັດຮ່ວມມືລາວ-ຈີນ ຜູ້ພັດທະນາເຂດ, ພ້ອມດ້ວຍຫົວໜ້າກົມ, ຮອງເຈົ້າເມືອງ ແລະບັນດາພາກສ່ວນກ່ຽວຂ້ອງເຂົ້າຮ່ວມ.

     ທ່ານ ອຸດອນ ແຍງວັນນະວົງ ໄດ້ລາຍງານກ່ຽວກັບສະພາບຂອງການ ພັດທະນາເຂດວ່າ: ເຂດພັດທະນາກວມ ລວມໄຊເສດຖາ ໄດ້ເລີ່ມຈັດຕັ້ງປະຕິບັດມາແຕ່ປີ 2011 ໂດຍການລົງທຶນລະຫວ່າງບໍລິສັດຮ່ວມທຶນລາວ-ຈີນ ຈຳກັດ, ໃນນີ້ ຝ່າຍລັດຖະບານລາວຖືຮຸ້ນ 25% ແລະລັດຖະບານຈີນຖືຮຸ້ນ 75% ລວມມູນຄ່າການລົງທຶນ 128 ລ້ານໂດລາ, ໃນເນື້ອທີ່ 1 ພັນເຮັກຕາ, ຜ່ານການພັດທະ ນາໃນໄລຍະຜ່ານມາເຫັນວ່າເຂດແມ່ນສາມາດບັນລຸໄດ້ຫຼາຍໜ້າວຽກ ໂດຍສະເພາະວຽກງານກໍ່ສ້າງພື້ນຖານໂຄງລ່າງ, ການດຶງດູດການລົງທຶນມາດຽວນີ້ມີນັກລົງທຶນເຂົ້າມາຈົດທະບຽນທັງໝົດ 30 ບໍລິສັດ ແລະມີ 10 ບໍລິສັດແມ່ນໄດ້ເຄື່ອນໄຫວຕົວຈິງແລ້ວ.

     ເຖິງຢ່າງໃດກໍດີຄຽງຄູ່ກັບການພັດທະນານັ້ນກໍປາສະຈາກສິ່ງທີ່ຍັງເປັນບັນຫາ ແລະຂໍ້ຄົງຄ້າງໃນການພັດທະນາເຂດເປັນຕົ້ນການອອກໃບອະນຸຍາດສິດ ນຳໃຊ້ທີ່ດິນຂອງລັດ ແລະແຜນທີ່ດິນລັດ, ບໍ່ສາມາດເຊົ່າມອບໂອນ ແລະເປັນຫຼັກຊັບຄ້ຳປະກັນກັບສະຖາບັນການເງິນໄດ້ ຈິ່ງຢາກຮຽກຮ້ອງໃຫພາກລັດຊ່ວຍເບິ່ງ ຄືນບັນຫາການອອກສິດໃຊ້ທີ່ດິນທີ່ສາມາດມອບໂອນ, ໃຫ້ເຊົ່າ ແລະເປັນຫຼັກ ຊັບຄ້ຳປະກັນຕາມອາຍຸການສຳປະທານ ພ້ອມດຽວກັນນັ້ນຄະນະບໍລິຫານເຂດບໍ່ສາມາດປະຕິບັດໜ້າທີ່ໄດ້ດີເທົ່າທີ່ຄວນເນື່ອງຈາກວ່າການນຳໃຊ້ສິດໃນການຄຸ້ມຄອງຍັງບໍ່ໄດ້ຮັບເຕັມທີ່ຕົ້ນຕໍສິດໃນການອະນຸມັດລວມທັງສິດການກວດກາອະນຸມັດແຈ້ງພາສີໃນການນຳເຂົ້າ-ສົ່ງອອກ, ສິດໃນການອະນຸມັດແຮງງານ ແລະພາຫະນະຮັບໃຊ້ການຜະລິດ, ດັ່ງນັ້ນຈິ່ງເຮັດໃຫ້ການອະນຸມັດເອກະສານ ຕ່າງໆມີຄວາມຊັກຊ້າ, ຖ້າຫາກວ່າຄະ ນະບໍລິຫານເຂດເປັນຜູ້ອະນຸມັດດ້ານເອ ກະສານໂດຍກົງ ກໍຈະເຮັດໃຫ້ບັນຫາດັ່ງ ກ່າວມີຄວາມສະດວກຂຶ້ນ, ສ່ວນດ້ານນິຕິກຳຮັບໃຊ້ຢູ່ໃນເຂດເສດຖະກິດຍັງບໍ່ທັນ ແທດເໝາະກັບສະພາບຄວາມເປັນຈິງ ເປັນຕົ້ນນະໂຍບາຍສົ່ງເສີມອັນສະເພາະ ຍັງບໍ່ທັນມີ, ນະໂຍບາຍດ້ານອາກອນມູນຄ່າເພີ່ມຈາກການກໍ່ສ້າງຍັງບໍ່ເປັນເອກະພາບກັນໃນແຕ່ລະເຂດ, ການປະສານງານກັບຂະແໜງການກ່ຽວຂ້ອງເຫັນວ່າການແກ້ໄຂບັນຫາຍັງຊັກຊ້ານັກລົງທຶນຂາດຄວາມເຊື່ອໝັ້ນ, ຖ້າເປັນໄປໄດ້ຄວນປັບຂອດການບໍລິການໃຫ້ໄວຂຶ້ນ ກວ່າເກົ່າ.

     ໃນໂອກາດລົງຢ້ຽມຢາມຄັ້ງນີ້ ທ່ານ ສອນໄຊ ສີພັນດອນ ກໍໄດ້ໂອລົມຕໍ່ຄະນະບໍລິຫານ ແລະຜູ້ພັດທະນາເຂດວ່າ ເພື່ອເປັນການແກ້ໄຂບັນດາບັນຫາທີ່ຍັງເປັນສິ່ງຄົງຄ້າງໃຫ້ຫຼຸດລົງເທື່ອລະກ້າວນັ້ນຢາກໃຫ້ຜູ້ພັດທະນາ ແລະນັກລົງທຶນເພີ່ມທະວີຄວາມເອົາໃຈໃສ່ດຶງດູດນັກລົງທຶນໃຫ້ເຂົ້າມາລົງທຶນໃນເຂດຫຼາຍຂຶ້ນກວ່າເກົ່າ ແລະເອົາໃຈໃສ່ໃນການຈັດຕັ້ງປະຕິບັດວຽກງານການຊົດເຊີຍທີ່ດິນໃຫ້ກັບປະຊາຊົນ ອາດຈະເປັນການກໍ່ສ້າງອາຄານທີ່ຢູ່ອາໄສ ຫຼື ເປັນເງິນຄ່າຊົດເຊີຍ ເພື່ອເຮັດໃຫ້ບັນຫາດັ່ງກ່າວໄດ້ຮັບການແກ້ໄຂຢ່າງຮີບດ່ວນ ພ້ອມດຽວກັນນັ້ນ ເຂດກໍຕ້ອງໄດ້ສຸມໃສ່ຂຸດຄົ້ນທ່າແຮງຂອງເຂດມາໝູນໃຊ້ໃຫ້ເກີດປະໂຫຍດສູງສຸດ ໂດຍມອບໃຫ້ກະຊວງແຜນການ ແລະການລົງທຶນປະສານສົມທົບກັບຂະແໜງການທີ່ກ່ຽວຂ້ອງ ເພື່ອຊອກຫາວິທີ ທາງແກ້ໄຂບັນຫາໃຫ້ຖືກສຸດ ແລະຂອດຂັ້ນທີ່ເຫັນວ່າຍັງມີຄວາມຫຍຸ້ງຍາກໃນການອະນຸມັດການລົງທຶນໃຫ້ກັບນັກລົງທຶນຢູ່ໃນເຂດ, ທັງນີ້ ກໍເພື່ອເປັນການເພີ່ມທະວີຄວາມເຊື່ອໝັ້ນໃຫ້ກັບນັກລົງທຶນຕ່າງປະເທດທີ່ຈະເຂົ້າມາລົງທຶນພາຍໃນ ເຂດໃຫ້ນັບມື້ເພີ່ມຫຼາຍຂຶ້ນ.

 

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ

ຜູ້ໃຊ້ເຂົ້າສູ່ລະບົບ

ໄປເທິງສຸດ