ເປີດຄຣາວພລາຊາໂຮງແຮມໃໝ່ໃນນະຄອນຫຼວງວຽງຈັນ

     ເມື່ອວັນທີ 27 ເມສາຜ່ານມາ ໂຮງແຮມຄຣາວພລາຊາວຽງຈັນ ໄດ້ຈັດພິທີເປີດນຳໃຊ້ຂຶ້ນຢ່າງເປັນທາງການ ຊຶ່ງເປັນໂຮງແຮມໃໝ່ ຕັ້ງຢູ່ຖະໜົນ ສາມແສນໄທ ເມືອງສີໂຄດຕະບອງ ນະຄອນຫຼວງວຽງຈັນ ໂດຍເປັນກຽດເຂົ້າ ຮ່ວມຂອງທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ; ທ່ານ ຫງວຽນ ຊວັນຟຸກ ນາຍົກລັດຖະມົນຕີ ສສ ຫວຽດນາມ ພ້ອມດ້ວຍພາກສ່ວນທີ່ກ່ຽວຂ້ອງຕ່າງໆທັງສອງປະເທດເຂົ້າຮ່ວມ.

 

     ທ່ານ ດັວນກຸກຮຸຍ ຜູ້ຕາງໜ້າຂອງ ບີມກຣຸບ ກ່າວວ່າ: ໃນຖານະຜູ້ພັດທະນາທີ່ມີຊື່ສຽງ ແລະມີປະສົບການມາ ກວ່າ 20 ປີ ໃນການພັດທະນາໂຄງການທີ່ມີຄຸນນະພາບ ແລະການພັດທະນາທີ່ໝັ້ນຄົງໃນຫວຽດນາມ ບີມກຣຸບ ໄດ້ຮ່ວມມືກັບບໍລິສັດອອກແບບຮັບເໝົາກໍ່ສ້າງ ແລະບໍລິສັດຈັດການຊັບສິນຊັ້ນນຳທີ່ມີຊື່ສຽງ ທີ່ເຊື່ອຖືໄດ້ເພື່ອດຳເນີນ ທຸລະກິດຂອງບີມກຣຸບ ໃນໂຄງການອະສັງຫາລິມະຊັບມີຄວາມພູມໃຈທີ່ໄດ້ນຳເອົາໂຮງແຮມໃນເຄືອລະດັບຫ້າດາວ ນາໆຊາດແຫ່ງທຳອິດມາເປີດໃຫ້ບໍລິການໃນເມືອງຫຼວງຂອງປະເທດລາວ ໂດຍສະເພາະແມ່ນໂຮງແຮມຄຣາວ ພລາຊາວຽງຈັນ ເປັນສ່ວນສຳຄັນຂອງ ໂຣໂຢລສະແຄ ເພາະວ່າໂຮງແຮມຄຣາວ ພລາຊາ ວຽງຈັນ ແມ່ນຕັ້ງຢູ່ໃຈກາງນະຄອນຫຼວງວຽງຈັນ ແລະເປັນລະດັບໂຮງແຮມຫ້າດາວຈາກເຄືອໂຮງແຮມອິນເຕີຄອນທິເນັນໂທລໂຮເທວກຣຸບ ແຫ່ງທຳອິດໃນນະຄອນຫຼວງວຽງຈັນ ທີ່ມີຄຸນນະພາບ ແລະມີສິ່ງອຳນວຍຄວາມສະດວກຄົບເພື່ອຕອບສະໜອງ ບັນດານັກທຸລະກິດ ແລະນັກທ່ອງທ່ຽວ ທີ່ມາພັກຜ່ອນຢ່ອນໃຈໃນປະເທດລາວ.

     ໂຮງແຮມຄຣາວພລາຊາວຽງຈັນ ລວມມີທັງໝົດ 197 ຫ້ອງ ແລະເປັນໂຮງແຮມທີ່ມີຄວາມເໝາະສົມແກ່ການ ຈັດງານປະຊຸມ ແລະງານກິດຈະກຳຕ່າງໆດ້ວຍຫ້ອງປະຊຸມທີ່ມີຄວາມທັນສະໄໝ ລວມທັງຫ້ອງຈັດງານລ້ຽງຂະໜາດໃຫຍ່ທີ່ມີອຸ ປະກອນຄົບຊຸດຈຳນວນເຖິງ 6 ຫ້ອງ ຊຶ່ງສາມາດປັບແຕ່ງໃຫ້ເໝາະສົມກັບຄວາມຕ້ອງການໃນແຕ່ລະປະເພດຂອງງານ ນອກນັ້ນ ໂຮງແຮມຄຣາວພລາຊາວຽງຈັນ ຍັງມີຫ້ອງພັກລະດັບພຣີມຽມ ແລະຫ້ອງພັກສະວິດທີ່ໄດ້ຮັບການຕົກແຕ່ງເປັນຢ່າງດີດ້ວຍອົງປະກອບຂອງລາວແບບດັ້ງເດີມ ພ້ອມກັນນັ້ນກໍຍັງມີສິ່ງອຳນວຍຄວາມສະດວກທັນສະໄໝ ເຊັ່ນ: ຮ້ານອາຫານ ແລະບາຫຼາຍຮ້ານ ເພື່ອສຳຜັດປະສົບການທີ່ຫຼາກຫຼາຍໃນການຮັບປະທານອາຫານ.

     ນອກນັ້ນ ໃນເວລາທີ່ຢຸດພັກແຂກສາມາດຜ່ອນຄາຍແຊ່ໂຕໃນສະລອຍນ້ຳກາງແຈ້ງຂອງໂຮງແຮມ ຊຶ່ງສາມາດ ເບິ່ງເຫັນທັດສະນິຍະພາບຂອງຕົວເມືອງ ໄດ້ຢ່າງເພີດເພີນ ແລະພ້ອມດຽວກັນກໍ ຍັງມີບາ ແຄມສະລອຍນ້ຳ ກໍຄື ສແປລສ໌ ຫຼື ຈະອອກກຳລັງກາຍທີ່ສູນອອກກຳລັງກາຍທີ່ເປີດໃຫ້ບໍລິການຕະຫຼອດ 24 ຊົ່ວໂມງ ພ້ອມເຄື່ອງອຸປະກອນອອກກຳລັງກາຍທີ່ລ້ຳສະໄໝຄຽງຄູກັນນັ້ນພາຍໃນໂຮງແຮມກໍ່ຍັງມີການບໍລິການອິນເຕີເນັດຄວາມໄວສູງແບບໄຮ້ສາຍຟຣີ ສຳລັບແຂກຜູ້ເຂົ້າມາພັກ.

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ

ຜູ້ໃຊ້ເຂົ້າສູ່ລະບົບ

ໄປເທິງສຸດ