ເຜີຍ! ສາເຫດຂອງເຮືອແພຫຼົ້ມ ເຂດບ້ານໄຮ່ ເປັນເພາະຄົນຂັບບໍ່ຊໍານານ

     ຈາກເຫດເຮືອແພຫຼົ້ມເຂດບ້ານໄຮ່ ເມືອງໄຊທານີ ນະຄອນຫຼວງວຽງຈັນ ໃນວັນທີ 30 ກັນຍາ 2017, ຈົນມາເຖິງ  2 ຕຸລາ 2017 ສາມາດຊ່ວຍຜູ້ລອດຊີວິດໄດ້ 4 ຄົນ ແລະພົບຜູ້ເສຍຊີວິດແລ້ວ 1 ຄົນ, ຍັງສູນຫາຍອີກ 1 ຄົນ, ຊຶ່ງສາເຫດເບື້ອງຕົ້ນຈາກການສຳພາດຜູ້ລອດຊີວິດຮູ້ວ່າຜູ້ຂັບເຮືອບໍ່ມີຄວາມຊຳນານບວກກັບມີອາການມືນ (ດື່ມເບຍນຳ).

 

     ອີງຕາມການໃຫ້ສຳພາດຂອງລຸງຄຳ ມີປະຊາຊົນບ້ານໂນນສະອາດ ຜູ້ລອດຊີວິດຈາກເຫດຂອງເຮືອແພຫຼົ້ມ ໃນວັນທີ 30 ກັນຍາ ຜ່ານມາຮູ້ວ່າ: ເຮືອແພດັ່ງກ່າວເປັນເຮືອຂອງປະຊາຊົນ ໂດຍພາຍໃນເຮືອມີທັງໝົດ 6 ຄົນ ເປັນຍິງ 3 ຄົນ ແລະຊາຍ 3 ຄົນ, ຊຶ່ງທັງໝົດແມ່ນໄດ້ຂີ່ເຮືອລ່ອງຕາມແມ່ນ້ຳເພື່ອໄປຊົມບຸນຊ່ວງເຮືອບ້ານຫາດກ້ຽງ ໃນລະຫວ່າງການລ່ອງເຮືອກໍໄດ້ມີການດື່ມເຄື່ອງດື່ມໄປນຳ ແລະໃນຂະນະທີ່ພວມລ່ອງເຮືອກັບກໍເກີດມີເຫດຂັດຂ້ອງ (ເຮືອຈະພຸ້ງໄປຕຳເອົາກະຊັງປາ ຜູ້ຂັບໄດ້ຫັກຫົວເຮືອອອກ ຈຶ່ງເຮັດໃຫ້ເຮືອແພປີ້ນພ້ອມທີ່ຄົນຂັບບໍ່ຊຳນານ) ໂດຍໃນຈຸດດັ່ງກ່າວກໍເປັນຈຸດທີ່ມີນໍ້າໄຫຼແຮງ ຈຶ່ງເຮັດໃຫ້ມີຜູ້ລອດຊີວິດພຽງ 4 ຄົນເທົ່ານັ້ນ ສ່ວນອີກ 2 ຄົນ ແມ່ນຫາຍໄປກັບກະແສນ້ຳ.

     ຕໍ່ເຫດການດັ່ງກ່າວນັ້ນ ລຸງຄຳມີ ກໍໄດ້ຝາກເປັນອຸທາຫອນແກ່ຜູ້ທີ່ກຳລັງຈະຂັບຂີ່ເຮືອແພ ຫຼື ຫາກວ່າມີການດື່ມສິ່ງມືນເມົາກໍບໍ່ຄວນຂັບຂີ່ບໍ່ສະເພາະແຕ່ທາງເຮືອ ຫຼື ທາງໃດກໍຕາມ, ສິ່ງສຳຄັນຄວນມີສະຕິລະວັງຕົວ ແລະຄວນມີສິ່ງປ້ອງກັນຄື ເຄື່ອງຊູຊີບ ຫຼື ສິ່ງໃດກໍແລ້ວແຕ່ທີ່ສາມາດປ້ອງກັນເຫດເຮືອຫຼົ້ມໄດ້ຕິດໄປກັບເຮືອນຳ ເພື່ອຄວາມປອດໄພຂອງຜູ້ຂຶ້ນເຮືອ.

     ທ່ານ ແພງສີ ໄຊຍະສິງ ຮອງນາຍບ້ານໂນນສະອາດ ໃຫ້ສຳພາດວ່າ: ຕໍ່ເຫດການດັ່ງກ່າວ ພາຍຫຼັງທີ່ໄດ້ຮັບຂ່າວ ແລະຮູ້ວ່າເຫດເຮືອຫຼົ້ມຄັ້ງນີ້ມີປະຊາຊົນພາຍໃນບ້ານຂອງຕົນທັງໝົດ 2 ຄົນ, ຈຶ່ງໄດ້ປະສານສົມທົບກັບໜ່ວຍງານທີ່ຮັບຜິດຊອບຮ່ວມກັນຕິດຕາມ ເພື່ອຄົ້ນຫາຜູ້ສູນຫາຍຈຳນວນ 2 ຄົນນັບແຕ່ມື້ເກີດເຫດ ຈົນມາເຖິງວັນທີ 2 ຕຸລານີ້, ຕໍ່ເຫດການ ດັ່ງກ່າວ ທາງຂັ້ນເທິງກໍບໍ່ໄດ້ນິ່ງນອນໃຈ ໂດຍສະເພາະທາງເມືອງ ແລະບ້ານຕ່າງໆກໍໄດ້ຮ່ວມແຮງຮ່ວມໃຈຊ່ວຍກັນຄົ້ນຫາ, ພ້ອມດຽວກັນນັ້ນ ກໍຢາກຮຽກຮ້ອງມາຍັງປະຊາຊົນ ກໍຄືຜູ້ປະກອບການຜູ້ຊົມໃຊ້ເຮືອແພ ຫຼື ເຮືອປະເພດໃດກໍຕາມ ແມ່ນຢາກໃຫ້ເອົາເຫດການໃນຄັ້ງນີ້ເປັນບົດຮຽນ ແລະບໍ່ຄວນຖືເບົາກັບຄວາມປອດໄພຄວນຈະມີສິ່ງປ້ອງກັນໃນເວລາຂັບຂີ່ເຮືອທຸກຄັ້ງ ເພື່ອຄວາມປອດໄພແກ່ຕົວທ່ານເອງ.

     ສຳລັບການຄົ້ນຫາເຮືອແພຄັ້ງນີ້ແມ່ນພົບເຮືອແລ້ວ ແລະໃນເວລາ 12:30 ໂມງຂອງມື້ວັນທີ 2 ຕຸລາ ໜ່ວຍງານຮັບຜິດຊອບກໍສາມາດພົບເຫັນ 1 ສົບ ເປັນເພດຍິງ, ໃນເຂດບ້ານນາສາລາ ເມືອງໄຊທານີ, ຊຶ່ງຫ່າງຈາກທີ່ເກີດເຫດປະມານ 5-6 ກິໂລ ແມັດ, ສ່ວນອີກ 1 ຄົນຍັງບໍ່ທັນພົບເທື່ອ.

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ

ຜູ້ໃຊ້ເຂົ້າສູ່ລະບົບ

ໄປເທິງສຸດ