ເລີ່ມສ້າງສູນການຄ້າໃນເຂດເສດຖະກິດສະເພາະທ່າແຂກ ມີຕຶກ 65 ຊັ້ນສູງສຸດໃນລາວ

     ເລີ່ມລົງມືກໍ່ສ້າງຢ່າງເປັນທາງການແລ້ວສຳລັບສູນການຄ້າ ແລະການບໍລິການຂອງບໍລິສັດອາຄະເນພັດທະນາລາວ ເອສອີແຊັດ (SEZ) ຈໍາກັດໃນເຂດເສດຖະກິດສະເພາະທ່າແຂກ ບໍລິເວນຫົວຂົວມິດຕະພາບລາວ-ໄທແຫ່ງທີ 3 ຄຳມ່ວນ-ນະຄອນພະນົມ ຊຶ່ງຄາດວ່າຈະສຳເລັດໃນອີກ 5 ປີ ໂດຍລວມມີມູນຄ່າການກໍ່ສ້າງທັງໝົດ 40 ຕື້ກີບ ໃນນັ້ນລວມມີຫຼາຍອາຄານ ແຕ່ສູງສຸດແມ່ນ 65 ຊັ້ນຖ້າການກໍ່ສ້າງໄປແຜນການອາດຈະເປັນຕຶກທີ່ສູງກວ່າໝູ່ໃນລາວ.

 

     ພິທີວາງສີລາລືກໂຄງການດັ່ງກ່າວໄດ້ຈັດຂຶ້ນໃນວັນທີ 8 ຕຸລາຜ່ານມານີ້ ທີ່ແຂວງຄຳມ່ວນເຂົ້າຮ່ວມຕັດແຖບຜ້າ, ຊ້ວນຊາຍ ແລະລັ່ນຄ້ອງເພື່ອເປັນ ສິລິມຸງຄຸນໃນການເລີ່ມລົງມືກໍ່ສ້າງໂຄງການໂດຍທ່ານ ດາວໄຫລ ແກ້ວ ດວງດີ ຫົວໜ້າພະແນກແຜນການ ແລະການລົງທຶນແຂວງ, ທ່ານ ແສງເພັດ ຄຳສຸກຖາວົງ ຮອງເຈົ້າເມືອງທ່າແຂກ, ທ່ານ ສົມຈິດ ອາລິຍາພອນ ປະທານບໍລິສັດອາຄະເນພັດທະນາລາວ, ມີບັນດາພະແນກການທີ່ກ່ຽວຂ້ອງ ແລະແຂກຖຶກເຊີນເຂົ້າຮ່ວມ.

     ໃນການວາງຊິລາລືກຄັ້ງນີ້ປະກອບດ້ວຍໂຄງການກໍ່ສ້າງອາຄານສະຖາບັນການເງິນສູງ 65 ຊັ້ນ ຈຳນວນ 1 ຫຼັງ, ໂຮງແຮມລະດັບ 4 ດາວສູງ 35 ຊັ້ນ, 5 ດາວສູງ 40 ຊັ້ນ, ອາຄານ-ອາພາດ ເມັ້ນ 2 ຫລັງສູງ 45 ຊັ້ນ, ອາຄານຫ້າງສັບພະສິນຄ້າ 5 ຊັ້ນ 1 ຫລັງ, ອາຄານກວດພະຍາດແບບຄົບວົງຈອນ 1 ຫລັງ, ສູງ 5 ຊັ້ນ, ຊັ້ນໃຕ້ດິນ, ໂຄງລ່າງພື້ນຖານ ພ້ອມດ້ວຍສວນສາທາລະນະ ແລະໂຄງສ້າງອື່ນໆທີ່ຈຳເປັນລວມມູນຄ່າການລົງທຶນທັງໝົດມີ 5 ຕື້ໂດລາສະຫະລັດ ຫຼື ປະມານ 40 ຕື້ກີບ ແລະຄາດວ່າ ຈະໃຫ້ສຳເລັດການກໍ່ສ້າງໃນ 5 ປີໂດຍ ເລີ່ມແຕ່ມື້ວາງສີລາລືກເປັນຕົ້ນໄປ. 

     ສຳລັບບໍລິສັດອາຄະເນພັດທະນາ ລາວ ເອສອີແຊັດ ກໍ່ເປັນໜຶ່ງໃນບັນດາ 22 ບໍລິສັດທີ່ໄດ້ເຂົ້າມາລົງທຶນໂດຍມີຈຸດປະສົງເພື່ອການລົງທຶນພັດທະນາໃນຕອນ ດິນດັ່ງກ່າວໃຫ້ກາຍເປັນເຂດການຄ້າ ແລະບໍລິການ, ສະຖາບັນການເງິນ, ອຸດສາຫະກຳການທ່ອງທ່ຽວລະດັບສາກົນຄົບວົງຈອນ ເຊິ່ງບໍລິສັດໄດ້ຮັບການ ສຳປະທານເນື້ອທີ່ດິນຈຳນວນ 7 ເຮັກ ຕາ, ມີອາຍຸສຳປະທານ 73 ປີ ແລະສາມາດຕໍ່ຕື່ມອີກ 15 ປີ.

     ຂະນະທີ່ການພັດທະນາເຂດເສດຖະກິດສະເພາະທ່າແຂກກໍແມ່ນໜຶ່ງໃນບັນ ດາໂຄງການບູລິມະສິດຂອງແຂວງຄຳມ່ວນທີ່ມີເປົ້າໝາຍເລັ່ງໃສ່ພັດທະນາທີ່ດິນໃນຂອບເຂດຫົວຂົວມິດຕະພາບລາວ-ໄທ ແຫ່ງທີ 3 ມີເນື້ອທີ່ຕອນດິນ ເພື່ອພັດທະນາທັງໝົດ 1.035 ເຮັກຕາ ໃຫ້ກາຍເປັນເຂດເສດຖະກິດ ເພື່ອພັດທະນາໃຫ້ເປັນຕົວເມືອງໃໝ່ທີ່ທັນສະໄໝ, ເປັນບ່ອນດຶງດູດການລົງທຶນພາຍໃນ ແລະຕ່າງປະເທດ, ມີນະໂຍບາຍສົ່ງເສີມພິເສດ, ມີລະບົບເສດຖະກິດ-ການເງິນ, ເປັນຫົວໜ່ວຍບໍລິການສັງຄົມກວ້າງຂວາງ, ມີລະບົບຮັບປະກັນຄວາມສະຫງົບປອດໄພ ແລະປົກປັກຮັກສາສິ່ງແວດລ້ອມໃຫ້ຍືນຍົງ.

ຄະແນນລາຍການນີ້
(1 Vote)
ເຂົ້າລະບົບເພື່ອສະແດງຄຳເຫັນ

ຜູ້ໃຊ້ເຂົ້າສູ່ລະບົບ

ໄປເທິງສຸດ