ແຂວງວຽງຈັນ ມີເສັ້ນທາງ ແລະໄຟຟ້າເຖິງທຸກບ້ານ

     ຜ່ານການຈັດຕັ້ງປະຕິບັດວຽກງານ ກໍ່ສ້າງຮາກຖານການເມືອງ ແລະພັດທະນາຊົນນະບົດຮອບດ້ານຕິດພັນກັບວຽກງານ 3 ສ້າງໃນປີ 2017, ອົງຄະນະພັກແຂວງວຽງຈັນໄດ້ເອົາໃຈໃສ່ປັບປຸງກົງຈັກການຈັດຕັ້ງຂັ້ນບ້ານໃຫ້ມີຄວາມເຂັ້ມແຂງ, ປັບປຸງ, ຍົກລະດັບພື້ນຖານໂຄງລ່າງທີ່ມີຄວາມຈຳເປັນໃນການຮັບໃຊ້ຊີວິດປະຈຳວັນເປັນຕົ້ນແມ່ນເສັ້ນທາງ ແລະໄຟຟ້າ ມາຮອດປະຈຸບັນນີ້ທົ່ວແຂວງ ມີເສັ້ນທາງ ແລະໄຟຟ້າໄປຮອດ 433 ບ້ານເທົ່າກັບ 100% ຂອງຈຳນວນບ້ານ ໃນທົ່ວແຂວງ.

 

     ທ່ານ ບຸນສອນ ເພັດລາວັນ ຮອງເຈົ້າແຂວງໆວຽງຈັນກ່າວລາຍງານຜົນຂອງການຈັດຕັ້ງປະຕິບັດວຽກງານກໍ່ສ້າງຮາກຖານການເມືອງ ແລະພັດທະນາຊົນນະບົດຮອບດ້ານຕິດພັນກັບວຽກງານ 3 ສ້າງໃນປີ 2017 ຕໍ່ກອງປະຊຸມຄົບຄະນະບໍລິຫານງານພັກແຂວງ ຄັ້ງທີ 5 ສະໄໝທີ 5 ຊຶ່ງຈັດຂຶ້ນໃນວັນທີ 10 ຕຸລານີ້ ວ່າ: ຜ່ານມາທາງແຂວງໄດ້ເອົາໃຈໃສ່ປັບປຸງລະບົບການເມືອງຢູ່ຂັ້ນຮາກຖານ ຊຶ່ງໄດ້ສ້າງຕັ້ງຄະນະພັກຮາກຖານກຸ່ມບ້ານສຳເລັດໂດຍມີ 385 ໜ່ວຍພັກຂຶ້ນກັບມີສະມາຊິກພັກ 5.765 ສະຫາຍ, ສ້າງໜ່ວຍພັກແຂງຮູ້ນຳພາຮອບດ້ານໄດ້ 325 ໜ່ວຍ, ສະມາຊິກພັກເປັນນາຍບ້ານ 151 ສະຫາຍ, ຍິງ 8 ສະຫາຍ, ເລຂາໜ່ວຍພັກ ເປັນນາຍບ້ານ 316 ສະຫາຍ, ຍິງ 15 ສະຫາຍ, ເລຂາພັກບ້ານເປັນກຳມະການພັກເມືອງ 22 ສະຫາຍ, ຍິງ 3 ສະຫາຍ, ທົ່ວແຂວງມີ 41 ກຸ່ມບ້ານ.

     ດ້ານການພັດທະນາພື້ນຖານໂຄງລ່າງໄດ້ປັບປຸງຍົກລະດັບເສັ້ນທາງໄປສູ່ເຂດຊົນນະບົດ, ເຂດທີ່ໝັ້ນການປະຕິວັດ, ເຂດຈຸດສຸມທີ່ຈະສ້າງເປັນກຸ່ມບ້ານ ພັດທະນາຮອດປະຈຸບັນ ທົ່ວແຂວງມີ ເສັ້ນທາງໄປຮອດ 433 ບ້ານເທົ່າກັບ 100% ຂອງຈຳນວນບ້ານທັງໝົດ, ໃນນີ້ ທຽວໄດ້ຕະຫຼອດປີ 415 ບ້ານ, ຂະຫຍາຍຕາຂ່າຍໄຟຟ້າກວມເອົາ 433 ບ້ານ.

     ຄຽງຄູ່ກັນນີ້ໄດ້ສົ່ງເສີມປະຊາຊົນປູກເຂົ້າໃນເນື້ອທີ່ 65.034 ເຮັກຕາຜົນຜະລິດໄດ້ 2,90 ແສນໂຕນ,ໃນນີ້ເປັນເນື້ອ ທີ່ນາປີ 54,08 ພັນເຮັກຕາຜົນຜະລິດໄດ້ 2,47 ແສນໂຕນ, ເນື້ອທີ່ນາແຊງ 7,5 ພັນເຮັກຕາຜົນຜະລິດໄດ້ 35,2 ພັນໂຕນ ສະເລ່ຍເຂົ້າເປືອກໃສ່ຫົວຄົນໄດ້ຜູ້ລະ 652 ກິໂລຕໍ່ຄົນຕໍ່ປີ.

     ດ້ານສາທາລະນະສຸກກໍໍ່ໄດ້ຂະຫຍາຍສູ່ຊົນນະບົດຮອດປະຈຸບັນທົ່ວແຂວງມີສຸກສາລາ 43 ແຫ່ງ, ຕູ້ຢາປະຈຳບ້ານ 36 ຕູ້, ສ້າງບ້ານແບບຢ່າງດ້ານສາທາລະນະສຸກໄດ້ 382 ບ້ານ, ອັດຕາການນຳໃຊ້ນ້ຳສະອາດກວມ 85% ໃຊ້ວິດຖ່າຍ 71% ຂອງຈຳນວນພົນທົ່ວແຂວງ. 

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ

ຜູ້ໃຊ້ເຂົ້າສູ່ລະບົບ

ຂ່າວໜ້າໜຶ່ງຍອດນິຍົມ

ໄປເທິງສຸດ