ໄຊຈະເລີນ ເຂົ້າສຶກສາກຽມສ້າງເຂື່ອນໃສ່ນໍ້າກະປໍ

     ບໍລິສັດໄຊຈະເລີນກຣຸບຈຳກັດ ໄດ້ຮັບການອະນຸຍາດຈາກອຳນາດການ ປົກຄອງແຂວງຄຳມ່ວນເຂົ້າສຶກສາຄວາມເປັນໄປໄດ້ ເພື່ອພັດທະນາເຂື່ອນໄຟຟ້າຂະໜາດ 15 ເມກາວັດໃສ່ລຳນ້ຳ ກະປໍທີ່ຕັ້ງຢູ່ຂອບເຂດບ້ານນາຊຽງຄວານ ເມືອງໄຊບົວທອງ ທັງນີ້ການສຶກສາຄວາມເປັນໄປໄດ້ຖ້າຜົນອອກມາທາງບວກຄາດວ່າຈະສ້າງຜົນປະໂຫຍດໃຫ້ກັບ ປະຊາຊົນຢູ່ທ້ອງຖິ່ນຈະໄດ້ມີວຽກເຮັດ ງານທຳກໍຄືມີໄຟຟ້າໃຊ້ຢ່າງພຽງພໍ.

 

     ເພື່ອຢັ້ງຢືນການອະນຸຍາດເມື່ອບໍ່ດົນມານີ້ທີ່ແຂວງຄຳມ່ວນກໍໄດ້ມີພິທີເຊັນບົດບັນທຶກຄວາມເຂົ້າໃຈ (MOU) ກ່ຽວກັບໂຄງການດັ່ງກ່າວຕາງໜ້າໃຫ້ແກ່ແຂວງ ໂດຍທ່ານ ດາວໄຫຼ ແກ້ວດວງດີ ຫົວໜ້າພະແນກແຜນການ ແລະການລົງທຶນ ແຂວງ; ທ່ານ ສິງເພັດ ແກ້ວໂສພາ ຫົວໜ້າພະແນກພະລັງງານ ແລະບໍ່ແຮ່ແຂວງ ສ່ວນຝ່າຍບໍລິສັດແມ່ນທ່ານນາງ ວິໄຊ ໄຊຍະສິນ ຜູ້ອຳນວຍການບໍລິສັດໄຊຈະເລີນ ກຣຸບຈຳກັດ ນອກຈາກນັ້ນຍັງ ມີຂະແໜງການ ແລະພະນັກງານວິຊາການທີ່ກ່ຽວຂ້ອງເຂົ້າຮ່ວມເປັນສັກຂີພິຍານ.

     ສໍາລັບເນື້ອໃນສໍາຄັນຂອງບົດບັນທຶກ ແມ່ນໄດ້ລະບຸເຖິງບົດສຶກສາຄວາມເປັນໄປໄດ້ (FS) ແລະປະເມີນຜົນກະທົບຕໍ່ສັງຄົມ (SIA), ຕະຫຼອດເຖິງການ ສຶກສາລາຍລະອຽດ ແລະຄວາມເປັນໄປໄດ້ຂອງໂຄງການເປັນຕົ້ນທາງດ້ານເສດຖະກິດ - ເຕັກນິກ, ສິ່ງແວດລ້ອມ ແລະສັງຄົມ, ໄລຍະຂອບເຂດສິດ, ໃນນັ້ນລວມທັງເສັ້ນທາງເຂົ້າ-ອອກ ແລະສິ່ງອໍານວຍຄວາມສະດວກອື່ນໆ.

     ບົດບັນທຶກສະບັບນີ້ແມ່ນມີການບັງ ຄັບໃຊ້ໃນເວລາ 18 ເດືອນເວັ້ນເສຍແຕ່ ຈະສິ້ນສຸດລົງກ່ອນວັນໝົດອາຍຸພາຍໃນ 30 ວັນນັບແຕ່ມື້ລົງນາມຜູ້ພັດທະນາໂຄງການຕ້ອງໂອນເງິນຈໍານວນ 10 ພັນໂດລາ ເຂົ້າໃນບັນຊີຂອງແຂວງ ຊຶ່ງຕາງໜ້າໂດຍພະແນກແຜນການ ແລະການລົງທຶນແຂວງເພື່ອເປັນເງິນຄ້ຳປະກັນການປະຕິບັດບົດບັນທຶກຄວາມເຂົ້າໃຈ, ພ້ອມນັ້ນຝ່າຍລົງທຶນຈະຕ້ອງມອບເງິນ ຈໍານວນ 2 ພັນໂດລາຕໍ່ປີໃນການຄຸ້ມ ຄອງຕິດຕາມໂຄງການ, 2 ພັນໂດລາປີ ໃຫ້ແກ່ກອງທຶນພັດທະນາທ້ອງຖິ່ນຂອງແຂວງ, ໃຫ້ການປະກອບສ່ວນຊ່ວຍເຫຼືອ ແກ່ທ້ອງຖິ່ນບ່ອນໂຄງການຕັ້ງຢູ່ຕາມຄວາມເໝາະສົມໃນໄລຍະການດໍາເນີນ ການສໍາຫຼວດ, ຕ້ອງປະຕິບັດຕາມກົດໝາຍແຮງງານ ແລະພັນທະອື່ນໆຕາມ ລະບຽບກົດໝາຍ.

     ສໍາລັບທຶນການສຶກສາ-ສໍາຫຼວດຄວາມເປັນໄປໄດ້ນັ້ນແມ່ນທຶນຂອງຝ່າຍບໍລິສັດ 100% ໃນການດໍາເນີນວຽກງານດັ່ງ ກ່າວໃນກໍລະນີຜົນຂອງການສໍາຫຼວດ ຫາກບໍ່ເປັນເສດຖະກິດຄ່າໃຊ້ຈ່າຍທີ່ໃຊ້ ເຂົ້າການສຶກສາ-ສໍາຫຼວດຄວາມເປັນໄປ ໄດ້ລັດຈະບໍ່ທົດແທນຄືນ ແລະໃນກໍລະນີ ຫາກເປັນເສດຖະກິດແມ່ນຝ່າຍບໍລິສັດ ຫຼື ຜູ້ລົງທຶນແມ່ນສາມາດຍື່ນຄໍາຮ້ອງຂໍ ສໍາປະທານ ຫຼື ພັດທະນາໂຄງການ ສ່ວນເນື້ອໃນ, ເງື່ອນໄຂ ແລະຂັ້ນຕອນການອະນຸຍາດຕ່າງໆຂອງສັນຍາດັ່ງກ່າວນີ້ ແມ່ນຈະໄດ້ປຶກສາ ແລະເຈລະຈາກັນຕ່າງ ຫາກໂດຍໃຫ້ສອດຄ່ອງກັບກົດໝາຍວ່າດ້ວຍການສົ່ງເສີມການລົງທຶນ ແລະກົດໝາຍວ່າດ້ວຍໄຟຟ້າຂອງສປປ ລາວ, ຕ້ອງໄດ້ລົງມືດໍາເນີນການສຶກສາສໍາຫຼວດຄວາມເປັນໄປໄດ້ພາຍໃນ 60 ວັນນັບແຕ່ວັນລົງລາຍເຊັນບົດບັນທຶກຄວາມເຂົ້າໃຈສະບັບນີ້ເປັນຕົ້ນໄປ.

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ

ຜູ້ໃຊ້ເຂົ້າສູ່ລະບົບ

ຂ່າວໜ້າໜຶ່ງຍອດນິຍົມ

ໄປເທິງສຸດ