ໄຟຟ້າສາຂາຄຳມ່ວນ ເຜີຍແຜ່ເອກະສານແຈ້ງຊັບສິນ

     ກອງປະຊຸມເຜີຍແຜ່ກ່ຽວກັບການແຈ້ງຊັບສິນຂອງລັດວິສາຫະກິດໄຟຟ້າລາວສາຂາແຂວງຄຳມ່ວນ ໄດ້ຈັດຂຶ້ນວັນທີ 9 ຕຸລາ 2017 ນີ້ ທີ່ແຂວງຄຳມ່ວນ ໃຫ້ກຽດເຂົ້າຮ່ວມເຜີຍແຜ່ໂດຍທ່ານ ບຸນທັນ ສຸວັນນະລາ ຮອງປະທານກວດກາພັກ-ລັດແຂວງ, ມີບັນດາສະຫາຍໃນຄະນະພັກຮາກຖານ, ຄະນະໜ່ວຍພັກ ແລະບັນດາພະນັກງານກຳມະກອນສະມາຊິກພັກ ເຂົ້າຮ່ວມຮັບຟັງ.

 

     ໃນວາລະຂອງກອງປະຊຸມທ່ານ ເພັດສະໝອນ ພອນວິໄລສັກ ເລຂາຄະນະພັກຮາກຖານ ຫົວໜ້າລັດວິສາຫະກິດໄຟຟ້າ ລາວ ສາຂາແຂວງຄຳມ່ວນ, ທ່ານ ບຸນທັນ ສຸວັນນະລາດ ຮອງປະທານກວດກາ ພັກ-ລັດແຂວງໄດ້ຜັດປ່ຽນກັນຂຶ້ນເຜີຍແຜ່ ເອກະສານ ຊຶ່ງທ່ານໄດ້ຍົກໃຫ້ເຫັນກ່ຽວກັບດຳລັດຂອງລັດຖະບານ ສະບັບເລກທີ 159/ລບ, ລົງວັນທີ 4 ມິຖຸນາ 2013 ວ່າ ດ້ວຍການແຈ້ງຊັບສິນ ຊຶ່ງປະກອບດ້ວຍ 7 ໝວດ ແລະ 27 ມາດຕາ ແລະບົດແນະນຳການຈັດຕັ້ງປະຕິບັດດຳລັດເລກທີ 46/ ອກລ ລົງວັນທີ 20 ກຸມພາ 2017 ຈຸດປະສົງ ເພື່ອເປັນການຜັນຂະຫຍາຍດຳລັດ ຂອງລັດຖະບານວ່າດ້ວຍການແຈ້ງຊັບສິນ (ສະບັບປັບປຸງ) ໃຫ້ຖືກຕ້ອງ, ເປັນເອກະພາບ, ມີປະສິດທິພາບ ແລະທົ່ວເຖິງທຸກເປົ້າໝາຍຕາມທີ່ກຳນົດໄວ້.

     ທັງນີ້ ເພື່ອແນໃສ່ເຮັດໃຫ້ພະນັກງານ, ກຳມະກອນສະມາຊິກພັກ ພາຍໃນລັດວິສາຫະກິດໄຟຟ້າລາວສາຂາແຂວງຄຳມ່ວນ ໄດ້ຮັບຮູ້, ເຂົ້າໃຈມີຄວາມເປັນເອກະພາບ ແລະເປັນເຈົ້າການຈັດຕັ້ງປະຕິບັດ ດ້ວຍຄວາມຮັບຜິດຊອບສູງ, ເຮັດໃຫ້ການແຈ້ງຊັບສິນ ແລະລາຍຮັບຕາມແບບຟອມ ທີ່ທາງອົງການກວດກາລັດໄດ້ແຈກຢາຍ ໄດ້ດຳເນີນໄປຢ່າງຖືກຕ້ອງ, ຈະແຈ້ງຄົບຖ້ວນ ແລະທັນເວລາທີ່ກຳນົດໄວ້.

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ

ຜູ້ໃຊ້ເຂົ້າສູ່ລະບົບ

ຂ່າວໜ້າໜຶ່ງຍອດນິຍົມ

ໄປເທິງສຸດ