ການລົງທຶນຢູ່ ນອຄວ ຄຶກຄັກ ຂະນະນີ້ເຂດໄດ້ພັດທະນາແລ້ວກວ່າ 80%

     ເຂດນິຄົມອຸດສາຫະກຳ ແລະການຄ້າວຽງຈັນ-ໂນນທອງ ( ນອຄວ ຫຼື VITAPARK) ພາຍຫຼັງທີ່ໄດ້ຮັບການ ສ້າງຕັ້ງຂຶ້ນໃນປີ 2010 ເຂດດັ່ງກ່າວກໍ່ ໄດ້ຮັບການພັດທະນາຢ່າງຕໍ່ເນື່ອງ ຊຶ່ງປະຈຸບັນໄດ້ມີນັກທຸລະກິດຕ່າງປະເທດເຂົ້າມາລົງທຶນແລ້ວ 50 ກວ່າບໍລິສັດ

ເຮັດໃຫ້ບັນຍາກາດການລົງທຶນຄຶກຄື້ນຂຶ້ນນັບມື້ ຂະນະທີ່ພື້ນທີ່ໄດ້ຮັບການພັດ ທະນາສຳເລັດແລ້ວກວ່າ 80% ໃນໄລ ຍະທີ 1 ແລະຜູ້ພັດທະນາມີຄວາມຕ້ອງ ການເນື້ອທີ່ເພີ່ມອີກ 142 ເຮັກຕາ ເພື່ອຕອບສະໜອງໃຫ້ຫຼາຍບໍລິສັດທີ່ຈະເຂົ້າມາລົງທຶນໃນເຂດດັ່ງກ່າວ.

     ທ່ານ ທອງຂັນ ວົງພະຈັນ ຮອງປະທານສະພາບໍລິຫານເຂດເສດຖະກິດສະເພາະນິຄົມອຸດສາຫະກຳ ແລະການຄ້າວຽງຈັນ-ໂນນທອງ ໃຫ້ສຳພາດເມື່ອວັນທີ 10 ຕຸລາຜ່ານມາວ່າ: ອີງຕາມກົດໝາຍສົ່ງເສີມການລົງທຶນ, ດຳລັດຂອງນາຍົກ ລັດຖະມົນຕີ ວ່າດ້ວຍ ຂພສ ແລະສັນຍາຮ່ວມມືພັດທະນານິຄົມເປັນຫຼັກ ເພື່ອດຳເນີນການດຶງດູດນັກລົງທຶນທັງພາຍໃນ ແລະຕ່າງປະເທດ ເຂົ້າມາລົງທຶນໃນເຂດນິຄົມອຸດສາຫະກຳ ແລະການຄ້າວຽງຈັນ-ໂນນທອງ, ຊຶ່ງໄດ້ສ້າງພື້ນຖານໂຄງລ່າງເພື່ອຮອງຮັບ ທັງດຶງດູດ ການລົງທຶນເຂົ້າໃສ່ພ້ອມໆກັນ ແລະມີລະບຽບຂັ້ນຕອນ, ນະໂຍບາຍສົ່ງເສີມການລົງທຶນທີ່ກະທັດຮັດເບົາບາງແຕ່ຖືກຕ້ອງສອດຄ່ອງຕາມລະບຽບກົດໝາຍຂອງ ສປປ ລາວ.

     ປະຈຸບັນ ເຂດນິຄົມອຸດສາຫະກຳ ແລະການຄ້າວຽງຈັນ-ໂນນທອງ ໄດ້ຮັບການພັດທະນາໄປແລ້ວກວ່າ 80% ຂອງເນື້ອທີ່ໃນໄລຍະທີ 1 ທີ່ມີ 110 ເຮັກຕາ ໂດຍໄດ້ມີ 53 ບໍລິສັດຈາກຕ່າງປະເທດໄດ້ມາຈົດທະບຽນລົງທຶນດ້ວຍທຶນ ຈົດທະບຽນທັງໝົດ 527,70 ຕື້ກີບ ຫຼື ປະມານ 65,96 ລ້ານໂດລາ ໃນນັ້ນ ໄດ້ທຳການຜະລິດເພື່ອສົ່ງອອກແລ້ວ 23 ບໍລິສັດ, ກະກຽມດຳເນີນອີກ 3 ບໍລິສັດ, ກຳລັງກໍ່ສ້າງໂຮງງານ 2 ບໍລິສັດ ຄາດໝົດປີນີ້ຈະມີເກືອບ 30 ບໍລິສັດທີ່ດຳເນີນການຜະລິດ ແລະສົ່ງອອກ, ໂດຍມີມູນຄ່າການນຳເຂົ້າ 684,58 ຕື້ກີບ ຫຼື ປະມານ 85,57 ລ້ານໂດລາ ແລະມູນຄ່າສົ່ງອອກ 642,84 ຕື້ກີບ ປະມານ 80,35 ລ້ານໂດລາ ສາມາດສ້າງວຽກເຮັດງານທຳໃຫ້ປະຊາຊົນອ້ອມຂ້າງໄດ້ 2 ພັນກວ່າຄົນ ໃນນັ້ນ ມີຄົນຕ່າງປະເທດ 55 ຄົນ ຄາດຮອດປີ 2018 ຈະສ້າງວຽກເຮັດງານທຳໄດ້ເຖິງ 3 ພັນກວ່າຄົນ.

     ທ່ານ ທອງຂັນ ວົງພະຈັນ ໃຫ້ຮູ້ຕື່ມວ່າ: ເຂດນິຄົມອຸດສາຫະກຳ ແລະການຄ້າວຽງຈັນ-ໂນນທອງ ບັນດາບໍລິສັດທີ່ເຂົ້າມາລົງທຶນສ່ວນໃຫຍ່ແມ່ນມາຈາກປະເທດຈີນ, ຍີ່ປຸ່ນ, ໄທ ແລະປະເທດແດນມາກ, ສຳລັບສິນຄ້າສົ່ງອອກຂາຍຂອງ 23 ບໍລິສັດເລີ່ມມີຜົນໃນທາງການຄ້າແລ້ວນັ້ນປະກອບມີສາຍໄຟ ທີ່ໃຊ້ເຂົ້າໃນເຄື່ອງ ເອເລັກໂຕຣນິກ, ແຜ່ນແພ, ເຄື່ອງນຸ່ງຫົ່ມ ແລະອື່ນໆ ໂດຍສົ່ງອອກໄປເອີຣົບ, ອາຊີ ແລະອາຊຽນ.

     ແນວໃດກໍດີ ເຖິງວ່າເຂດນິຄົມອຸດສາ ຫະກຳ ແລະການຄ້າວຽງຈັນ-ໂນນທອງ ຈະໄດ້ຮັບການພັດທະນາຕໍ່ເນື່ອງກໍຕາມ ແຕ່ຜູ້ພັດທະນາກໍຍັງມີຄວາມຕ້ອງການ ເນື້ອທີ່ເພີ່ມອີກປະມານ 142 ເຮັກຕາ ເພື່ອຕອບສະໜອງຕາມຄວາມຮຽກຮ້ອງຕ້ອງ ການຂອງນັກທຸລະກິດທີ່ຈະເຂົ້າມາລົງທຶນດຳເນີນກິດຈະການຕ່າງໆ ຊຶ່ງຖ້າຫາກລັດ ຖະບານອະນຸມັດໃນໄລຍະທີ 2 ນີ້ແມ່ນຈະເຮັດໃຫ້ບັນຍາກາດການລົງທຶນໃນເຂດດັ່ງກ່າວຄຶກຄື້ນຂື້ນເປັນລຳດັບ.

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ

ຜູ້ໃຊ້ເຂົ້າສູ່ລະບົບ

ຂ່າວໜ້າໜຶ່ງຍອດນິຍົມ

ໄປເທິງສຸດ