ອັດຕະປື-ລັດຕະນະກິຣິ ກຽມສະເໜີລັດຖະບານສອງປະເທດສ້າງທາງເຊື່ອມຈອດກັນ

     ປະຕິບັດຕາມບົດບັນທຶກກອງປະຊຸມຮອບວຽນ ຄັ້ງທີ 3 ທີ່ແຂວງລັດຕະນະກິຣີ ເປັນເຈົ້າພາບໃນປີຜ່ານມາ ກ່ຽວກັບການເພີ່ມທະວີພົວພັນຮ່ວມມືກັນພັດທະນາຮອບດ້ານລະຫວ່າງແຂວງອັດຕະປື ສປປ ລາວ ແລະ ແຂວງລັດຕະນະກິຣີ ລາຊະອານາຈັກກຳປູເຈຍໃຫ້ມີຄວາມສັກສິດຍິ່ງຂຶ້ນໃນວັນທີ 9 ຕຸລາ 2017 ທັງສອງແຂວງດັ່ງກ່າວ

ໄດ້ຈັດກອງປະຊຸມພົບປະຮອບວຽນ ຄັ້ງທີ 4 ຂຶ້ນໂດຍແຂວງອັດຕະປື ເປັນເຈົ້າພາບ ຊຶ່ງຝ່າຍແຂວງອັດຕະປື ນຳໂດຍທ່ານ ນາມ ວິຍະເກດ ເຈົ້າແຂວງອັດຕະປື ພ້ອມຄະນະ ແລະຝ່າຍແຂວງ ລັດຕະນະກິຣີ ນຳໂດຍທ່ານ ທອງ ສາວຸນ ເຈົ້າແຂວງລັດຕະນະກິຣີ ພ້ອມຄະນະ.

     ການປະຊຸມພົບປະຮອບວຽນຄັ້ງນີ້ ສອງຝ່າຍໄດ້ຕີລາຄາສູງຕໍ່ການພົວພັນຮ່ວມມືລະຫວ່າງສອງປະເທດ ທີ່ນັບມື້ນັບໄດ້ຮັບການເສີມຂະຫຍາຍຂຶ້ນຢ່າງຕໍ່ເນື່ອງ ແລະເຫັນວ່າໃນຕະຫຼອດ ໄລຍະທີ່ຜ່ານມາທັງສອງແຂວງອັດຕະປື-ລັດຕະນະກິຣີ ແມ່ນໄດ້ມີການພົວພັນຮ່ວມມືຊ່ວຍເຫຼືອເຊິ່ງກັນ ແລະກັນຕະຫຼອດມາບົນຈິດໃຈທີ່ເປັນຍາດພີ່ນ້ອງຖານບ້ານໃກ້ເຮືອນຄຽງ ແລະມີການແລກປ່ຽນບົດຮຽນນຳກັນຢ່າງປົກກະຕິ.

     ພ້ອມດຽວກັນນີ້ ເພື່ອເປັນການສືບຕໍ່ ຮັດແໜ້ນສາຍພົວພັນ ແລະການຮ່ວມມື ເພື່ອການພັດທະນາຮອບດ້ານຂອງທັງສອງແຂວງໃຫ້ໜັກແໜ້ນຍິ່ງຂຶ້ນຕື່ມນັ້ນ ກອງປະຊຸມຄັ້ງນີ້ ສອງຝ່າຍຍິນດີທີ່ຈະຊຸກຍູ້ຊ່ວຍເຫຼືອເຊິ່ງກັນ ແລະກັນ ແລະໄດ້ຕົກ ລົງເປັນເອກະພາບກັນທີ່ຈະສືບຕໍ່ເສີມຂະຫຍາຍສາຍພົວພັນຕື່ມອີກ ເປັນຕົ້ນແມ່ນການຂະຫຍາຍສາຍພົວພັນ ແລະການຮ່ວມມືຮອບດ້ານ, ທັງສອງຝ່າຍເຫັນດີສືບຕໍ່ແລກປ່ຽນຄະນະຜູ້ແທນລະດັບສູງ, ຄະນະວິຊາການພົບປະກັນປີລະຄັ້ງ, ໂດຍຜັດປ່ຽນກັນເປັນເຈົ້າພາບ, ດ້ານການສືກສາ ແມ່ນຈະໄດ້ແລກປ່ຽນການກໍ່ສ້າງຊັບພະຍາກອນມະນຸດ ປີລະ 3 ທຶນ, ລາຍງານຂໍ້ມູນຂ່າວສານກ່ຽວກັບໂລກລະບາດ ຕາມບໍລິເວນຊາຍແດນ, ການແລກປ່ຽນດ້ານກີລາ, ສິລະປະວັນນະຄະດີ, ການທ່ອງທ່ຽວ ແລະອື່ນໆ.

     ພ້ອມດຽວກັນນີ້ ຈະສຶບຕໍ່ພ້ອມກັນເພີ່ມ ທະວີເອົາໃຈໃສ່ໃນການສະກັດກັ້ນທຸກຮູບ ແບບການເຄື່ອນໄຫວຂອງກຸ່ມຄົນບໍ່ດີຕາມຂອບເຂດບໍລິເວນຊາຍເເດນເຊັ່ນ: ບັນຫາການຂຸດຄົ້ນຊັບພະຍາກອນທຳມະຊາດ, ບັນຫາສິ່ງເສບຕິດ, ບັນຫາການຄ້າມະນຸດ, ແລະບັນດາປາກົດການຫຍໍ້ທໍ້ອື່ນໆໃຫ້ທັນເວລາ, ພ້ອມດຽວັນນີ້ ທັງສອງແຂວງຈະສ້າງທຸກເງື່ອນໄຂ ເພື່ອສະເໜີລັດຖະບານ ສອງປະເທດພິຈາລະນາອະນຸມັດສ້າງເສັ້ນທາງ 1 ຈີ ແຕ່ແຂວງ ອັດຕະປື-ແຂວງລັດຕະນະກິຣີ ເພື່ອອຳນວຍຄວາມສະດວກ ໃຫ້ປະຊາຊົນສອງແຂວງທີ່ອາໄສຢູ່ຕາມ ບໍລິເວນຊາຍແດນໄດ້ມີການໄປມາຊື້-ຂາຍ ແລະແລກປ່ຽນສິນຄ້າຕ່າງຝ່າຍໄດ້ຮັບຜົນປະໂຫຍດຮ່ວມກັນຕື່ມອີກ. ແຂວງອັດຕະປື ມີຊາຍແດນຕິດກັບຣາຊະອານາຈັກກຳປູເຈຍ 2 ຮ້ອຍກວ່າກິໂລແມັດ.

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ

ຜູ້ໃຊ້ເຂົ້າສູ່ລະບົບ

ຂ່າວໜ້າໜຶ່ງຍອດນິຍົມ

ໄປເທິງສຸດ