ພູສີ ເປີດຂາຍຮຸ້ນມື້ທຳອິດໃນຕະຫຼາດຫຼັກຊັບ ລາຄາຂຶ້ນ 150 ກີບ

     ວັນທີ 10 ຕຸລາຜ່ານມາທີ່ຕະຫຼາດຫຼັກຊັບລາວ ໄດ້ມີພິທີເປີດຂາຍຮຸ້ນຄັ້ງທຳອິດຂອງບໍລິສັດພູສີກໍ່ສ້າງ ແລະພັດທະນາມະຫາຊົນຢ່າງເປັນທາງການ

ໂດຍເຂົ້າຮ່ວມມີທ່ານ ບຸນມີ ມະນີວົງ ຮອງລັດຖະມົນຕີ ກະຊວງອຸດສາຫະກຳ ແລະການຄ້າ, ທ່ານນາງ ສາຍສະໝອນ ຈັນທະຈັກ ຫົວໜ້າສຳນັກງານຄະນະກຳມະການຄຸ້ມຄອງຫຼັກຊັບລາວ, ທ່ານ ສີທອງ ພົມມະຈິດ ປະທານສະພາບໍລິຫານບໍລິສັດພູສີກໍ່ສ້າງ ແລະພັດ ທະນາມະຫາຊົນ, ມີຜູ້ອຳນວຍການຕະຫຼາດຫຼັກຊັບລາວ, ພ້ອມ ດ້ວຍບັນດາພາກສ່ວນທີ່ກ່ຽວຂ້ອງເຂົ້າຮ່ວມ.

     ບໍລິສັດພູສີກໍ່ສ້າງ ແລະພັດທະນາມະຫາຊົນເປັນບໍລິສັດທຳອິດທີ່ເຂົ້າມາຈົດທະບຽນໃນຕະຫຼາດຫຼັກຊັບລາວສຳລັບປີ 2017 ແລະເປັນບໍລິສັດທີ 6 ທີ່ມີການຊື້-ຂາຍຮຸ້ນໃນຕະຫຼາດຫຼັກຊັບລາວ ຊຶ່ງການເຂົ້າມາຂາຍຮຸ້ນຄັ້ງນີ້ ນອກຈາກສະແດງເຖິງນິມິດໝາຍທີ່ດີໃຫ້ແກ່ຕະຫຼາດທຶນລາວ ແລ້ວຍັງເປັນການສ້າງໂອກາດທີ່ຫຼາກ ຫຼາຍໃຫ້ແກ່ນັກລົງທຶນທັງພາຍໃນ ແລະຕ່າງປະເທດທີ່ຕ້ອງການມາລົງທຶນໃນຕະຫຼາດຫຼັກຊັບລາວ.

     ບໍລິສັດພູສີກໍ່ສ້າງ ແລະພັດທະນາມະຫາຊົນ ໄດ້ສະເໜີຂາຍຮຸ້ນຈຳນວນ 100 ລ້ານຮຸ້ນ ໃນລາຄາ IPO ຮຸ້ນລະ 1.200 ກີບຂະນະທີ່ມື້ເປີດຂາຍເພີ່ມຂຶ້ນ 150 ກີບ ມາຢູ່ທີ່ 1.350 ກີບຕໍ່ຮຸ້ນເທົ່າກັບ 12,5% ແລະມີຈຳນວນຮຸ້ນທີ່ຊື້-ຂາຍທັງໝົດ 223.900 ຮຸ້ນ ດ້ວຍປະລິມານຊື້ທັງ ໝົດເກືອບ 364 ລ້ານກີບ, ໃນໄລຍະການຊື້-ຂາຍຮຸ້ນເຫັນວ່າມີປະລິມານສັ່ງຊື້ຂ້ອນຂ້າງຄຶກຄື້ນພໍສົມຄວນ ແລະຫຼັງປິດການ ຊື້-ຂາຍມື້ທຳອິດ ເຫັນວ່າລາຄາຮຸ້ນຂອງ ບໍລິສັດພູສີກໍ່ສ້າງ ແລະພັດທະນາມະຫາຊົນ ສາມາດຢູ່ສູງກວ່າລາຄາ IPO ດ້ວຍ ລາຄາປິດແດນບວກຢູ່ທີ່ 1.350 ກີບ.

     ໃນຂະນະດຽວກັນ ດັດສະນີຕະຫຼາດ ຫຼັກຊັບລາວປິດທີ່ 1.014 ຈຸດ ຫຼື ຫຼຸດລົງ 1.54% ແລະມີດັດສະນີສູງສຸດຢູ່ທີ່ 1.037,73 ຈຸດ ແລະຕ່ຳສຸດຢູ່ທີ່ 1.014 ຈຸດ ພາຍຫຼັງທີ່ຕະຫຼາດຫຼັກຊັບເປີດຢູ່ທີ່ 1.029,82 ຈຸດ.

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ

ຜູ້ໃຊ້ເຂົ້າສູ່ລະບົບ

ຂ່າວໜ້າໜຶ່ງຍອດນິຍົມ

ໄປເທິງສຸດ