ສະມາຄົມອາສາກູ້ໄພ ນວ ຍັງຂາດເຂີນຫຼາຍຢ່າງ

     ປະຈຸບັນສະມາຄົມອາສາກູ້ໄພນະຄອນຫຼວງຍັງຂາດເຂີນຫຼາຍຢ່າງໂດຍສະເພາະກໍແມ່ນຢາປົວພະຍາດພາຫະນະຮັບໃຊ້ວຽກງານ ແລະທຶນຮອນຈໍານວນໜຶ່ງ, ຂະນະທີ່ປະທານສະມາຄົມກໍ່ໄດ້ຝາກເຖິງຜູ້ມີກໍາລັງຊັບພຽງພໍທີ່ຢາກປະກອບສ່ວນສາມາດຍື່ນມືມາຊ່ວຍໄດ້.

 

     ທ່ານ ລໍາເງິນ ວົງພະຈັນ, ປະທານ ສະມາຄົມອາສາກູ້ໄພນະຄອນຫຼວງເປີດໃຈຕໍ່ຜູ້ສື່ຂ່າວວ່າ: ປະຈຸບັນນີ້ທຶນໃນການ ຊ່ວຍເຫຼືອດ້ານຕ່າງໆແມ່ນຍັງບໍ່ພຽງພໍ ກັບຄວາມຕ້ອງການເພາະທາງສະມາ ຄົມບໍ່ທັນໄດ້ມີການລະດົມທຶນແບບຈິງ ຈັງເພາະທຶນທຸກຢ່າງໃນການຊ່ວຍເຫຼືອ ແມ່ນມາຈາກທຶນທຸລະກິດຂອງຕົວເອງທັງໝົດ ແລະຍັງໄດ້ຮັບທຶນຊ່ວຍເຫຼືອ ຈາກໝູ່ເພື່ອນຈໍານວນໜຶ່ງທາງສະມາຄົມຍັງຂາດທຶນໃນການຊ່ວຍເຫຼືອປິ່ນປົວ ຕໍ່ຜູ້ທີ່ຂາດແຄນ ແລະພາຫະນະໃນການ ຮັບໃຊ້ວຽກທີ່ເກີດອຸບັດຕິເຫດຕາມທ້ອງຖະໜົນມີພຽງແຕ່ 5 ຄັນ ແຕ່ກໍຍັງບໍ່ພຽງພໍ, ອີກຢ່າງທີ່ຢາກຝາກເຖິງພໍ່ແມ່ປະຊາ ຊົນນັ້ນກໍຄືເງິນທຸກກີບທີ່ໄດ້ຮັບການບໍລິຈາກເຂົ້າມາທາງກູ້ໄພ້ກໍເອົາໄປຊ່ວຍຜູ້ທຸກຍາກ ແລະກໍບໍ່ເຄີຍຈະເອົາເງິນເຫຼົ່ານັ້ນມາປັນກັນເອງ.

     ປະທານສະມາຄົມອາສາກູ້ໄພນະຄອນຫຼວງວຽງຈັນຍັງໃຫ້ຮູ້ຕື່ມວ່າ: ແຮງຈູງໃຈທີ່ເຮັດໃຫ້ຢາກສ້າງຕັ້ງອາສາກູ້ໄພນີ້ ຂຶ້ນມາກໍເພື່ອເຫັນເຖິງສະພາບບ້ານເຮົານັບມື້ນັບພັດທະນາ ແລະນັບມື້ນັບມີພາ ຫະນະເກີດຂຶ້ນຫຼາຍ ແລະຜົນທີ່ຕາມມາ ກໍຄືອຸບັດຕິເຫດກ່ອນໜ້ານັ້ນກໍມີພຽງແຕ່ ອົງການກາແດງເທົ່ານັ້ນແຕ່ກໍບໍ່ພຽງພໍຕໍ່ຈໍານວນອຸບັດຕິເຫດທີ່ເກີດຂຶ້ນຈິ່ງໄດ້ສ້າງສະມາຄົມອາສາກູ້ໄພຂຶ້ນມາດ້ວຍທຶນ ຂອງຕົວເອງພາຫະນະໃນການຮັບໃຊ້ວຽກ ແລະຄ່າໃຊ້ຈ່າຍຕ່າງໆກໍແມ່ນທຶນຕົວເອງ.ສະມາຄົມອາສາກູ້ໄພນະຄອນຫຼວງ ເລີ່ມສ້າງຕັ້ງຂຶ້ນໃນປີ 2009 ແຕ່ໄດ້ຮັບການຈົດທະບຽນຕາມຂໍ້ຕົກລົງຂອງທ່ານເຈົ້າຄອງນະຄອນໃນວັນທີ 22 ກໍລະກົດ 2014 ໂດຍພາກສ່ວນຂອງເອກະຊົນສ້າງຂຶ້ນໂດຍບຸກຄົນມີຈຸດປະສົງ ເພື່ອຊ່ວຍເຫຼືອຜູ້ປະສົບອຸບັດຕິເຫດຕາມທ້ອງຖະໜົນ ແລະຊ່ວຍເຫຼືອຜູ້ທຸກຍາກຂາດເຂີນ.

     ສຸດທ້າຍນີ້ເພິ່ນຍັງຝາກເຖິງພໍ່ແມ່ພີ່ນ້ອງ ຫຼື ຫ້າງຮ້ານບໍລິສັດຕ່າງໆທີ່ມີກໍາລັງຊັບພຽງພໍທີ່ຢາກຊ່ວຍເຫຼືອຜູ້ທຸກຍາກຕ່າງໆສາມາດເຂົ້າໄປພົວພັນທີ່ສໍານັກງານໄດ້ຕັ້ງຢູ່ບ້ານໂພນພະເນົາຕໍ່ໜ້າວິທະຍາໄລສຸສະກະ, ເມືອງໄຊເສດຖາ, ນະຄອນຫຼວງວຽງຈັນ ເບີໂທ 020 2344 9090 ຫາກທ່ານໃດພົບອຸບັດຕິເຫດ ຫຼື ຜູ້ປ່ວຍສຸກເສີນສາມາດຕິດຕໍ່ສະມາຄົມອາສາກູ້ໄພນະຄອນຫຼວງໄດ້ທີ່ເບີ 1624 ບໍລິການຕະຫຼາດ 24 ຊົ່ວໂມງທຸກວັນພາຍໃນນະຄອນຫຼວງ.

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ

ຜູ້ໃຊ້ເຂົ້າສູ່ລະບົບ

ຂ່າວໜ້າໜຶ່ງຍອດນິຍົມ

ໄປເທິງສຸດ