ເມືອງສົບເບົາ ສະຫຼອງການສ້າງຕັ້ງຄົບຮອບ 20 ປີ

     ວັນທີ 10 ຕຸລາ 2017 ຢູ່ເມືອງສົບເບົາ, ແຂວງຫົວພັນ ໄດ້ຈັດພິທີໂຮມຊຸມນຸມສະເຫຼີມສະຫຼອງການສ້າງຕັ້ງເມືອງສົບເບົາຄົບຮອບ 20 ປີ (10 ຕຸລາ 1997 ຫາ 10 ຕຸລາ 2017) ຂຶ້ນ,

ພາຍໃຕ້ການເປັນປະທານຂອງທ່ານ ວົງເພັດ ກຽນສິງຮັກເຈົ້າເມືອງໆສົບເບົາ; ໂດຍໃຫ້ກຽດເຂົ້າຮ່ວມຂອງທ່ານ ຈະເລີນ ເຢຍປາວເຮີ ກຳມະການສູນກາງພັກ, ລັດຖະມົນຕີປະຈຳສຳນັກງານນາຍົກລັດຖະມົນຕີ; ທ່ານ ຄໍາຜິວ ພົງສະຫວັນ ຮອງເລຂາພັກແຂວງ, ປະທານແນວລາວສ້າງຊາດແຂວງຫົວພັນ; ມີຜູ້ຕາງໜ້າຈາກບັນດາພະແນກການ-ອົງການ, ບັນດາເມືອງພາຍໃນແຂວງ ຫົວພັນພ້ອມດ້ວຍສະມາຊິກພັກ-ພະນັກງານ, ປະຊາຊົນບັນດາເຜົ່າຊາວເມືອງ ສົບເບົາ ແລະແຂກທີ່ຖືກເຊີນເຂົ້າຮ່ວມຢ່າງຫຼວງຫຼາຍ.

     ໃນພິທີ, ທ່ານ ວົງເພັດ ກຽນສິງຮັກ ໄດ້ກ່າວວ່າ: ເມືອງສົບເບົາໄດ້ຮັບການ ປະກາດສ້າງຕັ້ງຂຶ້ນຢ່າງເປັນທາງການ ໃນວັນທີ 10 ຕຸລາ 1997 ໂດຍການແບ່ງ ສ່ວນໜຶ່ງຈາກເມືອງຊຽງຄໍ້ໃນເມື່ອ ກ່ອນ, ເນື່ອງຈາກວ່າເມືອງຊຽງຄໍ້ໃນ ເມື່ອກ່ອນເປັນເມືອງໃຫຍ່, ພື້ນທີ່ກວ້າງຂວາງ, ມີຫຼາຍຕາແສງ, ຫຼາຍບ້ານ, ພົນລະເມືອງຫຼາຍ (75 ພັນກວ່າຄົນ) ເພື່ອຮັບປະກັນໃນການເຜີຍແຜ່ແນວທາງນະໂຍບາຍຂອງພັກ, ລະບຽບການ, ກົດໝາຍຂອງລັດຖືກນໍາໄປຈັດຕັ້ງຜັນຂະຫຍາຍໃຫ້ໄດ້ຮັບໝາກຜົນ, ທັນເວລາ ແລະແທດເຖິງຮາກຖານຕົວຈິງລວມທັງເຮັດໃຫ້ແຕ່ລະທ້ອງຖິ່ນໄດ້ຮັບການພັດທະນາໄວ, ມີຄວາມເທົ່າທຽມກັນ, ຫຼຸດຜ່ອນຄວາມແຕກໂຕນລະຫວ່າງຕົວ ເມືອງ ແລະຊົນນະບົດ, ແນໃສ່ເຮັດໃຫ້ ວຽກງານຮອບດ້ານໄດ້ຮັບການຈັດຕັ້ງ ປະຕິບັດຢ່າງສະດວກ ແລະໄດ້ຮັບປະ ສິດທິຜົນເປັນຢ່າງດີ ສະນັ້ນພາກສ່ວນ ຕ່າງໆ ໂດຍສະເພາະຂັ້ນສູງກາງ,ແຂວງ ແລະພາກສ່ວນທີ່ກ່ຽວຂ້ອງຈຶ່ງໃຫ້ການສະໜັບສະໜູນໃຫ້ແຍກເມືອງຊຽງຄໍ້ ອອກເປັນ 3 ເມືອງ (ເມືອງຊຽງຄໍ້, ເມືອງແອດ ແລະເມືອງສົບເບົາ).

     ໃນໄລຍະສ້າງຕັ້ງເມືອງທໍາອິດເຫັນວ່າ: ພື້ນຖານໂຄງລ່າງຂອງເມືອງມີຄວາມຫຍຸ້ງຍາກທີ່ສຸດ, ບໍ່ມີສຳນັກງານ ຫ້ອງການເຮັດວຽກ, ພະນັກງານບໍ່ມີທີ່ພັກພາອາໄສ, ອຸປະກອນຮັບໃຊ້ຂາດເຂີນ, ພາຫະນະບໍ່ພຽງພໍ-ຊຸດໂຊມເກົ່າແກ່, ທາງທຽວບໍ່ສະດວກ, ຫຼາຍສິ່ງຫຼາຍ ຢ່າງແມ່ນເລີ່ມສ້າງຕັ້ງຂຶ້ນໃໝ່.

     ຕະຫຼອດໄລຍະ 20 ປີທີ່ຜ່ານມາ ພາຍໃຕ້ການຊີ້ນຳໆພາຂອງຄະນະບໍລິ ຫານງານພັກເມືອງມາແລ້ວ IV ຊຸດ  (ປະຈຸບັນຊຸດທີ IV) ເຫັນວ່າການພັດ ທະນາເສດຖະກິດ-ສັງຄົມໄດ້ມີບາດກ້າວ ຂະຫຍາຍຕົວຢ່າງຕໍ່ເນື່ອງສະແດງອອກ ໃນປະຈຸບັນທົ່ວເມືອງມີ 67 ບ້ານ, ມີ 4,5 ພັນຫຼັງຄາເຮືອນ, ມີພົນລະເມືອງ ທັງໝົດ 26,4 ພັນຄົນ, ຍິງ 13,5 ພັນ ຄົນ, ມີພະນັກງານລັດຖະກອນທັງໝົດ 663 ຄົນ (ປີ 1997 ມີ 218 ຄົນ), ເສດຖະກິດຂະຫຍາຍຕົວ 8,17%,   ລາຍຮັບສະເລ່ຍໃສ່ຫົວຄົນໄດ້ປະມານ 5,2 ລ້ານກີບຕໍ່ຄົນຕໍ່ປີ, ມີເສັ້ນທາງຄົມມະນາຄົມເຂົ້າເຖິງບ້ານກວມ 100% ໃນນັ້ນເສັ້ນທາງທຽວໄດ້ສອງລະດູກວມ ເອົາ 45%, ບ້ານທີ່ໄດ້ນໍາໃຊ້ໄຟຟ້າແລ້ວ ກວມ 77%, ບ້ານທີ່ມີວິດຖ່າຍແລ້ວກວມ 85%, ມີບ້ານສາທາລະນະສຸກກວມ 92%, ບ້ານທີ່ໄດ້ນໍາໃຊ້ນໍ້າລິນ ກວມ 88%, ຍັງມີບ້ານທຸກຍາກກວມ 43%, ຄອບຄົວທຸກຍາກຍັງກວມ 8.5%, ມີບ້ານພັດທະນາກວມ 52%.

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ

ຜູ້ໃຊ້ເຂົ້າສູ່ລະບົບ

ຂ່າວໜ້າໜຶ່ງຍອດນິຍົມ

ໄປເທິງສຸດ