ເຊີນມ່ວນຊື່ນກັບບຸນຊ່ວງເຮືອບຶງທາດຫຼວງຄັ້ງທຳອິດ

     ງານແຂ່ງຂັນບຸນ ຊ່ວງເຮືອນະຄອນຫຼວງວຽງຈັນປະຈຳປີ 2017 ຈະຈັດຂຶ້ນຢູ່ບຶງທາດຫຼວງຄັ້ງທຳອິດຖືເປັນປະເພນີບຸນຊ່ວງເຮືອຍາມອອກພັນສາເພື່ອເປັນການອະນຸຮັກ, ຮັກສາຮີດຄອງປະເພດນີອັນດີງາມຂອງຊາດ ແລະເປັນການສົ່ງເສີມຜະລິດຕະພັນລາວທີ່ເປັນເອກະລັກທີ່ຈະສ້າງຄວາມມ່ວນຊື່ນໃຫ້ແກ່ຊາວລາວ ແລະຊາວຕ່າງປະເທດທີ່ມາທ່ຽວຊົມ.

 

     ວັນທີ 11 ຕຸລາຜ່ານມາ ທີ່ເຂດເສດຖະກິດບຶງທາດຫຼວງ, ທ່ານ ຖະໜອມ ທຳທອງ ເຈົ້າເມືອງໄຊເສດຖາ ໄດ້ຖະແຫຼງຂ່າວຕໍ່ສື່ມວນຊົນກ່ຽວກັບຄວາມພ້ອມການຈັດງານບຸນຊ່ວງເຮືອນະຄອນຫຼວງວຽງຈັນປະຈຳປີ 2017 ທີ່ບຶງທາດຫຼວງໃຫ້ຮູ້ວ່າ: ມາຮອດປະຈຸບັນການຫ້າງຫາກະກຽມຂອງບັນດາອະນຸກຳມະການຕ່າງໆເປັນຕົ້ນອະນຸກຳມະການສະຖານທີ່,ອະນຸກຳມະການຈັດງານຕະຫຼາດນັດເພື່ອວາງສະແດງ ແລະຂາຍສິນຄ້າ, ອະນຸກຳມະການທາງເຕັກນິກການແຂ່ງຂັນ ແລະອະນຸກຳມະການອື່ນໆແມ່ນມີຄວາມ ພ້ອມທີ່ຈະຈັດງານແຂ່ງຂັນຊ່ວງເຮືອປະຈຳປີ 2017 ຢູ່ບຶງທາດຫຼວງ, ເມືອງໄຊເສດຖາ, ນະຄອນຫຼວງວຽງຈັນວັນທີ 18 ຫາ 22 ຕຸລາ 2017 ທີ່ຈະມາເຖິງນີ້.

     ທ່ານ ຖະໜອມ ທຳທອງ ໃຫ້ຮູ້ຕື່ມວ່າ: ຈຸດປະສົງຂອງການຈັດງານຄັ້ງນີ້ ເພື່ອເປັນການອະນຸລັກ, ຮັກສາຮີດຄອງປະເພດນີອັນດີງານຂອງຊາດເວົ້າລວມ ເວົ້າສະເພາະກໍແມ່ນປະເພນີບຸນຊ່ວງ ເຮືອຍາມອອກພັນສາໄວ້ຮອດເຊັ່ນລູກ ຫຼານ, ເພື່ອສ້າງຄວາມມ່ວນຊື່ີນໃຫ້ແກ່ ຊາວນະຄອນຫຼວງ ແລະປະຊາຊົນລາວ ທັງຊາດ ແລະຕ່າງປະເທດທີ່ມາທ່ອງ ທ່ຽວໃຫ້ຮູ້ເຖິງວັດທະນະທຳອັນດີງາມຂອງລາວ, ເພື່ອເປັນການສົ່ງເສີມໃຫ້ແກ່ ນັກລົງທຶນຢູ່ ສປປ ລາວ ກໍຄືຢູ່ນະຄອນຫຼວງວຽງຈັນພິເສດກໍແມ່ນໂຄງການພັດທະນາບຶງທາດຫຼວງຊຶ່ງແມ່ນນັກລົງທຶນຈາກ ສປ ຈີນ ແລະຈຸດປະສົ່ງອີກຢ່າງ ເພື່ອເປັນການກະກຽມໃຫ້ແກ່ການເປີດປີທ່ອງທ່ຽວຂອງ ສປປ ລາວ ທີ່ຈະມາເຖິງນີ້.

     ເຮືອຊ່ວງທີ່ຈະເຂົ້າແຂ່ງຂັນມີເຮືອ ປະເພນີ 2 ປະເພດຊາຍ-ຍິງລາງວັນຊະ ນະເລີດທີ 1 ຮັບຂັນເງິນ 1 ກິໂລເງິນສົດ 25 ລ້ານກີບ, ເຮືອສູດຊາຍ (ເຮືອດັດແປງ) ທີ 1 ຮັບຂັນເງິນ 1 ກິໂລເງິນສົດ 25 ລ້ານກີບ, ເຮືອກີລາທີ 1 ຮັບຂັນໂລ້ 1 ອັນເງິນສົດ 8 ລ້ານກີບ ແລະລາງ ວັນຊົມເຊີຍຫຼືລາງວັນນອນທ່າເຮືອປະ ເພນີນະຄອນຫຼວງວຽງຈັນ ແລະບໍລິຄຳ ໄຊແມ່ນ 2 ລ້ານກີບ ສ່ວນແຂວງອື່ນ ເຊັ່ນຫຼວງພະບາງ, ໄຊຍະບູລີ, ຈຳປາສັກ, ຄຳມ່ວນໄດ້ຮັບ 3 ລ້ານກີບ ສ່ວນເຮືອ ກີລາຈະຮັບພິຈາລະນາຕື່ມອີກ ແລະເຮືອ ເຈັດສະກີ້ແມ່ນຍັງກຳນົດລາງວັນບໍ່ທັນໄດ້, ຂະນະມາຮອດປະຈຸບັນບັນດາເຮືອ ທີ່ສະໝັກເຂົ້າມາມີເຮືອປະເພນີ 9 ລຳ, ເຮືອສູດ 6 ລຳ, ເຮືອປະເພນີຍິງ 2 ລຳ, ເຮືອກີລາ 10 ລຳ ແລະເຮືອເຈັດສະກີ້ 33 ລຳ.

     ຊຶ່ງພາຍໃນງານນອກຈາກຊ່ວງເຮືອຍັງຈະມີການວາງສະແດງສິນຄ້າ, ການງານສະແດງສິລະປະດົນຕີ, ແຂ່ງຂັນຊົກມວຍ ແລະອື່ນໆ.

     ສຳລັບທ່ານໃດມີຈຸດປະສົງເຂົ້າຮ່ວມແຂ່ງຂັນ ແລະຢາກເຂົ້າມາວາງສະແດງສິນຄ້າກໍ່ສາມາດຕິດຕໍ່ທາງຄະນະກຳມະການໄດ້ທີ່ເບີໂທ: 020 22221204-020224488888.

 

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ

ຜູ້ໃຊ້ເຂົ້າສູ່ລະບົບ

ຂ່າວໜ້າໜຶ່ງຍອດນິຍົມ

ໄປເທິງສຸດ