ສາລະວັນຈັບຜູ້ຄ້າຢາບ້າພ້ອມຂອງກາງ 100 ກວ່າເມັດ

     ການສະກັດກັ້ນ ແລະປາບປາມພວກຄົນບໍ່ດີທີ່ເຄື່ອນໄຫວລັກລອບຂົນສົ່ງ ແລະຊື້ຂາຍຢາເສບຕິດໄລຍະຜ່ານມາໄດ້ມີການຈັບກຸມມາແລ້ວຫຼາຍລາຍສ່ວນຫຼາຍແມ່ນຢາບ້າແຕ່ກໍ່ຍັງເຫັນວ່າບັນຫາດັ່ງກ່າວຍັງສືບຕໍ່ຂະຫຍາຍອອກໄປເລື້ອຍໆຫຼ້າສຸດ ເຈົ້າໜ້າທີ່ຈັບໄດ້ອີກ 2 ຄົນ ພ້ອມຂອງກາງຢາບ້າຈຳນວນ 100 ກວ່າເມັດ.

 

     ໃນວັນທີ 4 ຕຸລາ 2017 ເຈົ້າໜ້າທີ່ພະແນກຕໍາຫຼວດສະກັດກັ້ນ ແລະຕ້ານຢາເສບຕິດ ປກສ ແຂວງສາລະວັນໄດ້ຕິດຕາມຈັບຕົວກຸ່ມເປົ້າໝາຍລັກລອບ ຊື້ຂາຍຢາບ້າໄດ້ສອງຄົນຊື່ທ້າວ ໄຟວັນ (ຈ່ອຍ) ອາຍຸ 42 ປີ ເປັນປະຊາຊົນ ບ້ານແສນວັງ ແລະທ້າວ ນ້ອຍ ອາຍຸ 35 ປີ ປະຊາຊົນບ້ານຂົວເສັດ ເມືອງສາລະວັນ ແຂວງສາລະວັນ ພ້ອມຂອງກາງຢາບ້າ 112 ເມັດ ໃນຂະນະທີ່ພວກ ກ່ຽວກໍາລັງໄປສົ່ງໃຫ້ຜູ້ສັ່ງຊື້, ຢູ່ເຂດບ້ານແສນວັງ ເມືອງສາລະວັນ ໂດຍພວກນໍາໃຊ້ລົດເກັງສີດໍາບໍ່ມີປ້າຍເປັນພາຫະນະນໍາສົ່ງຢາເສບຕິດ.

     ຜ່ານການສືບສວນ-ສອບສວນຜູ້ກ່ຽວໄດ້ສາລະພາບວ່າ: ຢາບ້າຈຳນວນ ດັ່ງກ່າວແມ່ນໄດ້ຊື້ມາຈາກຜູ້ຮ່ວມຂະບວນການເພື່ອຈະເອົາໄປຂາຍໃຫ້ຜູ້ສັ່ງຊື້ຢູ່ບ້ານແສນວັງແຕ່ກໍຖືກຈັບຕົວກ່ອນ, ປະຈຸບັນຄະດີດັ່ງກ່າວແມ່ນຍັງຢູ່ໃນຂັ້ນຕອນຂອງເຈົ້າໜ້າທີ່ໄດ້ລວບລວມຂໍ້ມູນຫຼັກຖານເພື່ອສືບຫາຂະບວນການ ແລະເພື່ອນໍາມາດຳເນີນຄະດີຕາມລະບຽບກົດໝາຍໃນນັ້ນຕໍ່ໄປ.

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ

ຜູ້ໃຊ້ເຂົ້າສູ່ລະບົບ

ຂ່າວໜ້າໜຶ່ງຍອດນິຍົມ

ໄປເທິງສຸດ