ໄຊຍະເມືອງຊ້າງ ຄາດທ້າຍປີອາດມີນັກທ່ອງທ່ຽວກວ່າ 30 ພັນຄົນ

     3 ເດືອນ ທ້າຍປີ 2017 ນີ້ໄຊຍະບູລີຄາດວ່າຈະມີນັກທ່ອງທ່ຽວເຂົ້າມາທ່ອງທ່ຽວຢູ່ ແຂວງປະມານ 36,4 ພັນຄົນ ໂດຍຈະເຂົ້າມາ 3 ດ່ານ ສາກົນຄືດ່ານພູດູ່ເມືອງປາກລາຍ, ດ່ານນໍ້າເຫືອງເມືອງແກ່ນທ້າວ ແລະດ່ານສາກົນນໍ້າເງິນເມືອງເງິນສ່ວນຫຼາຍ ແມ່ນນັກທ່ອງທ່ຽວຊາວໄທ ເຂົ້າມາແວ່ເຊົາພັກໄຊຍະບູລີ ແລ້ວຜ່ານເຂົ້າສູ່ແຂວງຫຼວງພະບາງເມືອງມໍລະດົກໂລກ ແລະຄາດວ່າຈະສ້າງລາຍຮັບໃຫ້ ກັບປະຊາຊົນໃນແຂວງໄຊຍະບູລີ 19,36 ຕື້ກີບ.

 

     ທ່ານ ຄຳຜີວ ພົມມະຫານ ຮອງຫົວໜ້າພະແນກຖະແຫຼງຂ່າວ, ວັດທະນະທຳ ແລະທ່ອງທ່ຽວຜູ້ຊີ້ນຳວຽກງານທ່ອງທ່ຽວໄດ້ໃຫ້ຮູ້ວ່າຜ່ານມາຂະແໜງທ່ອງທ່ຽວໄຊຍະບູລີໄດ້ເອົາໃຈໃສ່ໃນການຊຸກຍູ້ ແລະສົ່ງເສີມພັດທະນາແຂວງໄຊຍະບູລີໃຫ້ກາຍເປັນສະຖານທີ່ບໍລິການທາງຜ່ານ, ບໍລິການການທ່ອງທ່ຽວຄົບວົງຈອນເພື່ອດຶງດູດນັກທ່ອງທ່ຽວທີ່ເດີນທາງຜ່ານແຂວງໄຊຍະບູລີໄປຫາ ແຂວງຫຼວງ ພະບາງເມືອງມໍລະດົກໂລກໃຫ້ໄດ້ແວ່ພັກເຊົາເປັນໄລຍະຍາວຂຶ້ນຕື່ມ, ພັດທະນາການທ່ອງທ່ຽວແບບຢືນຍົງ ໂດຍໃຫ້ ປະຊາຊົນມີສ່ວນຮ່ວມໃນການປະຕິບັດ ເພື່ອບໍລິການໃຫ້ແກ່ນັກທ່ອງທ່ຽວເປັນຕົ້ນ: ທ່ອງທ່ຽວຍ່າງປ່າ, ຂີ່ຊ້າງ, ຂີ່ເຮືອ ລ່ອງນໍ້າຮຸ່ງເບິ່ງນໍ້າຕົກຕາດ, ເຂື່ອນໄຟຟ້າ ແລະຊົມຖໍ້າທຳມະຊາດຕ່າງໆ, ສົ່ງເສີມງານບຸນເທສະການປະເພນີທີ່ເປັນເອກະລັກສະເພາະທີ່ພົ້ນເດັ່ນຂອງແຕ່ລະທ້ອງຖິ່ນເຊັ່ນ: ງານມະຫາກຳບຸນຊ້າງ, ບຸນຊ່ວງເຮືອປະຈຳປີໃຫ້ກາຍເປັນບຸນລະດັບຊາດ.

     ໃນ 9 ເດືອນຜ່ານມາມີນັກທ່ອງທ່ຽວເຂົ້າມາ ແລະຜ່ານແຂວງໄຊຍະບູລີທັງ ໝົດ 82.975 ຄົນ ສາມາດສ້າງລາຍຮັບຈາກການທ່ອງທ່ຽວໄດ້ປະມານ 36,8 ຕື້ກີບ ສ່ວນຫຼາຍນັກທ່ອງທ່ຽວເຂົ້າມາທາງດ່ານສາກົນ ແລະທາງແຂວງຫຼວງພະບາງນັກທ່ອງທ່ຽວຈຳນວນນີ້ມັກມາທ່ຽວຊົມເບິ່ງວິຖີຊີວິດການເປັນຢູ່ທີ່ເປັນ ເອກະລັກສະເພາະຂອງທ້ອງຖິ່ນຄືທ່ອງ ທ່ຽວທຳມະຊາດທີ່ມີຊື່ສຽງຂອງແຂວງ ເຊັ່ນ: ເທສະການບຸນຊ້າງ, ທ່ຽວຊົມອ່າງນໍ້າຕຽນ, ຊົມສູນອານຸລັກຊ້າງອາຊີ, ຊົມເຂດພັນຖໍ້ານໍ້າທັ່ງ ແລະອື່ນໆຜະລິດຕະພັນ ແລະຫັດຖະກຳການທ່ອງທ່ຽວທີ່ໜ້າ ສົນໃຈ ແລະໄດ້ຮັບຄວາມນິຍົມຈາກນັກທ່ອງທ່ຽວມີຫຼາຍຢ່າງເຊັ່ນ: ຜະລິດຕະພັນແພຕໍ່າທີ່ຍ້ອມສີດ້ວຍທຳມະຊາດ, ເຄື່ອງຫັດຖະກຳຈັກສານທີ່ເຮັດດ້ວຍໄມ້ປ່ອງການສະແດງສີລະປະວັນນະຄະດີທີ່ເປັນເອກະລັກຂອງຊາວໄຊຍະບູລີ.

     ທ່ານຍັງກ່າວຕື່ມວ່າ ປະຈຸບັນທົ່ວ ແຂວງມີແຫຼ່ງທ່ອງທ່ຽວທັງໝົດ 47 ແຫ່ງ ໃນນີ້ແຫຼ່ງທ່ອງທ່ຽວທຳມະຊາດ 29 ແຫ່ງ, ແຫຼ່ງທ່ອງທ່ຽວວັດທະນະທຳ12 ແຫ່ງ ແລະແຫຼ່ງທ່ອງທ່ຽວປະຫວັດສາດ 6 ແຫ່ງ, ມີໂຮງແຮມ 7 ແຫ່ງ, ມີ 240 ຫ້ອງ 350 ຕຽງ, ເຮືອນພັກ 167 ແຫ່ງ ມີ 1.941 ຫ້ອງ ລີສອດ 7 ແຫ່ງ ມີ 115 ຫ້ອງ, ຮ້ານອາຫານ 57 ແຫ່ງ, ຮ້ານບັນເທິງ 19 ແຫ່ງ ແລະຮ້ານກິນດຶ່ມ 36 ແຫ່ງ ທົ່ວແຂວງໄຊຍະບູລີມີບໍລິສັດທ່ອງທ່ຽວ 7 ແຫ່ງ.

     ຂະນະທີ່ໃນປີ 2018 ທີ່ຈະມາເຖິງ ນີ້ແຂວງໄຊຍະບູລີຈະຖືເອົາງານມະຫາກຳບຸນຊ້າງຕິດພັນກັບການໂຄສະນາປີທ່ອງທ່ຽວລາວ ໂດຍຈະມີການສະແດງກິດຈະກຳຂອງຊ້າງ, ມີກ້ອນກຳລັງຕ່າງໆທີ່ເປັນເອກະລັກຂອງແຂວງໄຊຍະບູລີໃຫ້ສົມກັບດັ່ງຄຳຂວັນທີ່ວ່າໄຊຍະບູລີດິນແດນຊ້າງປະຕູສູ່ເມືອງມໍລະດົກໂລກ.

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ

ຜູ້ໃຊ້ເຂົ້າສູ່ລະບົບ

ຂ່າວໜ້າໜຶ່ງຍອດນິຍົມ

ໄປເທິງສຸດ