ໃກ້ເປັນຄວາມຈິງແລ້ວການສ້າງຂົວມິດຕະພາບລາວ-ໄທ ແຫ່ງທີ V

     ໂຄງການກໍ່ສ້າງຂົວຂ້າມນ້ຳ ຂອງຂົວມິດຕະພາບລາວ-ໄທ ແຫ່ງທີ V ລະຫວ່າງປາກຊັນແຂວງບໍລິຄຳໄຊ-ບຶງການປະເທດໄທທີ່ລັດຖະບານສອງ ປະເທດລາວ-ໄທຈະຮ່ວມກັນສ້າງນັ້ນ, ມາຮອດປະຈຸບັນເລີ່ມໃກ້ຄວາມເປັນຈິງ ແລ້ວຫຼັງຈາກທີ່ຮູບແບບດ້ານເຕັກນິກຕ່າງໆຂອງຂົວໄດ້ຕົກລົງເປັນເອກະພາບກັນ, ແຕ່ດຽວນີ້ກຳລັງລໍຖ້າແຕ່ງົບປະມານ.

 

     ທາງຄະນະກຳມະການຜູ້ປະສານງານໂຄງການຝ່າຍລາວໃຫ້ຮູ້ວ່າ: ສຳລັບຄວາມຄືບໜ້າຂອງໂຄງການກໍ່ສ້າງຂົວຂ້າມນ້ຳຂອງມິດຕະພາບ ລາວ-ໄທ ແຫ່ງທີ V ລະຫວ່າງປາກຊັນແຂວງບໍ ລິຄຳໄຊ-ບຶງການປະເທດໄທ, ຫຼັງຈາກທີ່ໄດ້ມີການປັບປຸງຄືນຮູບຊົງເສົາຂົວ ກາງນ້ຳຈຳນວນ 4 ເສົາ (ຈາກສັນຍາ ລັກຮູບແຄນປ່ຽນມາເປັນຮູບດອກຈັນ), ປັງປຸງຄືນດ້ານຫຼັງຄາຂອງອາຄານດ່ານຝ່າຍລາວ, ປັບປຸງຮູບແບບຫໍຄອຍ (Tower) ໃຫ້ເປັນເອກະລັກ, ອາຄານ-ປະຕູເມືອງ ເພື່ອໃຫ້ເປັນ ເອກະລັກຂອງແຂວງບໍລິຄຳໄຊ, ອາຄານດ່ານຊາຍແດນຝ່າຍ ສປປ ລາວ ໃຫ້ສອດຄ່ອງກັບລະບົບການຈະລາຈອນຂອງລາວ ຊຶ່ງຜ່ານການປັບປຸງບັນດາໜ້າວຽກດັ່ງກ່າວ ມາຮອດປະຈຸບັນທັງສອງຝ່າຍໄດ້ເຫັນ ດີເປັນເອກະພາບໝົດແລ້ວ, ແຕ່ກໍຍັງລໍ  ຖ້າງົບປະມານທີ່ຈະໃຊ້ເຂົ້າໃນການຊົດ ເຊີຍເວັ້ນຄືນເນື້ອທີ່ທຳການຜະລິດ ແລະງົບປະມານໃນການກໍ່ສ້າງຂົວຕົວຈິງ.

     ແຕ່ຢ່າງໃດກໍຕາມຂົວດັ່ງກ່າວຖ້າ ຫາກໄດ້ມີການກໍ່ສ້າງສຳເລັດຈະສາມາດ ນຳຜົນປະໂຫຍດອັນມະຫາສານມາ ສູ່ປະຊາຊົນກໍຄືທັງສອງປະເທດຊາດ ເວົ້າລວມເວົ້າສະເພາະແມ່ນນຳຜົນປະໂຫຍດມາສູ່ປະຊາຊົນແຂວງບໍລິຄຳໄຊ ແລະແຂວງບຶງການເຊັ່ນ: ເຮັດໃຫ້ມູນຄ່າການຄ້າຊາຍແດນລະຫວ່າງປະເທດ ນັບມື້ເພີ່ມສູງຂຶ້ນ, ພ້ອມດຽວກັນນັ້ນຍັງເປັນການປະກອບສ່ວນເຂົ້າພັດທະນາເສດຖະກິດໄລຍະຍາວ, ທັງຍັງຈະເປັນການສ້າງຄວາມເຊື່ອໝັ້ນໃຫ້ແກ່ການຄ້າ, ການລົງທຶນລະຫວ່າງປະເທດ ແລະພາກພື້ນນັບມື້ມີບາດກ້າວທີ່ດີຂຶ້ນ, ທີ່ສຳຄັນຍັງຊ່ວຍໃຫ້ວຽກງານການຄົມມະນາຄົມຂົນສົ່ງທາງບົກ, ການແລກປ່ຽນດ້ານວັດທະນະທຳ ແລະການບໍລິການດ້ານການທ່ອງທ່ຽວມີຄວາມສະດວກ ຍິ່ງຂຶ້ນອີກດ້ວຍ.

     ໃນຂໍ້ມູນຍັງໃຫ້ຮູ້ອີກວ່າ: ໂຄງການກໍ່ສ້າງຂົວຂ້າມນ້ຳຂອງມິດຕະພາບແຫ່ງທີ V ປາກຊັນ-ບຶງການແມ່ນມີຈຸດທີ່ຕັ້ງຫ່າງຈາກເທສະບານແຂວງບໍລິຄຳໄຊ ມາຕາມທາງເລກ 13 ເໜືອປະມານ 10 ກິໂລແມັດ, ຫ່າງຈາກເສັ້ນທາງເລກ ທີ 13 ໃຕ້ປະມານ 2,5 ກິໂລແມັດ, ລວມຄວາມຍາວສະເພາະຂົວທັງໝົດ 1.350 ແມັດ, ທາງເຂົ້າຂົວເບື້ອງໄທ ແມ່ນມີຄວາມຍາວປະມານ 12 ກິໂລແມັດ ແລະສ່ວນເບື້ອງລາວ 2,5 ກິໂລ ແມັດ, ລວມມູນຄ່າການກໍ່ສ້າງທັງສອງ ເບື້ອງມີທັງໝົດປະມານ 3.900 ຕື້ກວ່າບາດ ຫຼື ປະມານ 936 ຕື້ກີບ.

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ

ຜູ້ໃຊ້ເຂົ້າສູ່ລະບົບ

ໄປເທິງສຸດ