ຈະມີຊ້າງເກືອບ 70 ເຊືອກ ຮ່ວມກິດຈະກຳບຸນຊ້າງໄຊຍະ 2018

     ງານມະຫາກໍາບຸນຊ້າງແຂວງໄຊຍະບູລີເປັນບຸນປາງໃຫຍ່ງານໜຶ່ງທີ່ເປັນເອກະລັກຂອງແຂວງ ແລະເປັນແຂວງດຽວທີ່ໄດ້ຈັດງານບຸນດັ່ງກ່າວພາຍໃນປະເທດລາວ ຊຶ່ງຈະຈັດຂຶ້ນໃນເດືອນກຸມພາຂອງທຸກໆປີ

ຈຸດປະສົງຂອງການຈັດງານກໍເພື່ອເປັນການອະນຸຮັກຮັກສາຊ້າງລາວເພາະຊ້າງເປັນມູນມໍລະດົກຂອງຊາດ ທັງເປັນມິ່ງຂວັນຄູ່ບ້ານຄູ່ເມືອງ ພ້ອມນີ້ ກໍເພື່ອເປັນການສືບຕໍ່ຮັກສາວັດທະນະທຳ, ຮີດຄອງປະເພນີອັນດີງາມ ແລະວິຖີການດຳລົງຊີວິດຂອງປະຊາຊົນບັນດາເຜົ່າຂອງແຂວງໄຊຍະບູລີທີ່ຕິດພັນກັບຊ້າງມາແຕ່ອະດີດຕະການໃຫ້ຢືນຍົງຄົງຕົວຄຽງຄູ່ກັບປະຊາຊົນເຮົາຕະຫຼອດໄປສຳລັບປີນີ້ 2018 ທາງແຂວງຈະຈັດຄວບຄູ່ກັບການເປີດປີທ່ອງທ່ຽວ ໂດຍຈະມີຊ້າງເກືອບ 70 ເຊືອກເຂົ້າຮ່ວມກິດຈະ ກຳ.

     ທ່ານ ຍັນຍົງ ສີປະເສີດ ຮອງເຈົ້າ ແຂວງ, ທັງເປັນປະທານຈັດງານມະຫາກໍາບຸນຊ້າງໄດ້ຖະແຫຼງຂ່າວຕໍ່ສື່ມວນຊົນວ່າ: ສໍາລັບການຈັດງານມະຫາກຳບຸນຊ້າງໄຊຍະບູລີປະຈໍາປີ 2018 ນີ້ຈະໄດ້ ດໍາເນີນໄປເປັນເວລາ 7 ວັນ ແລະຈະເລີ່ມເປີດງານເປັນທາງການໃນວັນທີ 17 ກຸມພາ 2018 ຊຶ່ງຈະມີຊ້າງເຂົ້າ ຮ່ວມທັງໝົດຈຳນວນ 69 ໂຕ ແລະຈະຈັດພິທີປິດເປັນທາງການໃນວັນທີ 22 ກຸມພາ 2018 ສໍາລັບຕະຫຼາດນັດວາງ ສະແດງສິນຄ້າແມ່ນຈະເລີ່ມເປີດໃຫ້ບໍລິການນັບແຕ່ວັນທີ 16 ກຸມພາ 2018 ເປັນຕົ້ນໄປ ພ້ອມກັນນີ້ກໍໄດ້ກໍານົດເອົາງານບຸນຄັ້ງນີ້ເປັນການເປີດປີທ່ອງທ່ຽວຂອງແຂວງໄຊຍະບູລີຢ່າງເປັນທາງການ.

     ສໍາລັບກິດຈະກໍາຫຼັກຂອງການຈັດ ງານແມ່ນຈະເນັ້ນໜັກກິດຈະກຳທີ່ຕິດພັນກັບຊ້າງ ແລະການອະນຸຮັກຊ້າງໂດຍ ສະເພາະການສະແດງຂອງຊ້າງຄຳຮູ້ ຊຶ່ງຈະຍົກລະດັບໃຫ້ມີຄວາມຫຼາກຫຼາຍກວ່າປີທີ່ຜ່ານມາ, ພ້ອມກັນນີ້ໃນແຕ່ລະ ວັນຂອງໄລຍະການຈັດງານແມ່ນຈະຈັດໃຫ້ມີກິດຈະກໍາທ່ອງທ່ຽວແຫຼ່ງທຳມະຊາດທີ່ສວຍງາມ, ຮີດຄອງປະເພນີ, ວັດທະນະທໍາຂອງປະຊາຊົນບັນດາເຜົ່າທີ່ ເປັນເອກະລັກຂອງແຂວງໄຊຍະບູລີເຊັ່ນ: ຖ້ຳນ້ຳທັ່ງ, ຖ້ຳຜາຂີ້ມິ້ນ, ຖ້ຳລະຄັງສະຫວັນ, ກົກໄມ້ຂ່າໃຫຍ່ຫຼາຍຮ້ອຍປີ, ນ້ຳຕົກຕາດເຈົ້າ, ຢ້ຽມຊົມວິຖີຊີວິດຂອງເຜົ່າຕອງເຫຼືອງ, ວັດທະນະທຳເຜົ່າລື້, ເຜົ່າອື່ນໆ ແລະຊົມທະເລໝອກ-ຊີມຊາພັນປີ ຂອງເມືອງໄຊສະຖານ.

     ນອກຈາກນີ້ໃນງານບຸນຍັງປະກອບ ມີກິດຈະກຳຕ່າງໆເພື່ອໃຫ້ບັນດາທ່ານໄດ້ມາທ່ຽວ, ມາຊົມເປັນຕົ້ນແມ່ນ: ພິທີເຮັດບຸນຕັກບາດອຸທິດກຸສົນໃຫ້ຊ້າງ, ການວາງສະແດງສິນຄ້າໜຶ່ງເມືອງໜຶ່ງຜະລິດຕະພັນຈາກພາຍໃນແລະຕ່າງປະເທດ, ສິນຄ້າກະສິກຳ, ຫັດຖະກຳ, ອຸດສາຫະກຳປຸງແຕ່ງທີ່ເປັນເອກະລັກຂອງທ້ອງຖິ່ນ, ການສະແດງຄອນເສີດ ແລະການສະແດງສິລະປະວັນນະຄະດີຈາກ ພາກສ່ວນຕ່າງໆ.

     ໃນໂອກາດດຽວກັນ ທ່ານ ຍັນຍົງ ສີປະເສີດ ຍັງໄດ້ເຊີນຊວນບັນດາທ່ານ ແຂກທີ່ມີກຽດທ່ານຍິງທ່ານຊາຍ, ນັກທ່ອງທ່ຽວຈາກພາຍໃນ ແລະຕ່າງປະເທດເຂົ້າມາທ່ຽວມາຊົມງານມະຫາກຳບຸນຊ້າງຢູ່ແຂວງໄຊຍະບູລີຕາມກຳນົດ ເວລາດັ່ງກ່າວຂ້າງເທິງນີ້ ເມື່ອມາເບິ່ງ ມາຊົມແລ້ວບັນດາທ່ານຄົງຈະຕິດອົກ ຕິດໃຈ ແລະມີຄວາມປະທັບໃຈໃນງານນີ້ ຫຼາຍກວ່າໃນປີຜ່ານໆມາ.

 

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ

ຜູ້ໃຊ້ເຂົ້າສູ່ລະບົບ

ໄປເທິງສຸດ