ລ້ານຊ້າງມິເນໂຣນ ໄດ້ຮັບລາງວັນ "ອາຊຽນ" ດີເດັ່ນປຸງແຕ່ງແຮ່ທາດ

     ໃນວັນທີ 30 ພະຈິກ 2017 ໄດ້ມີການປະກາດຜົນລາງວັນທາງດ້ານການປຸງແຕ່ງແຮ່ທາດ “ອາຊຽນ” ຄັ້ງ ທີ 1 ຊຶ່ງບໍລິສັດ MMG ລ້ານຊ້າງມີນເນໂຣນ ລີມິເຕັດ (LXML) ໄດ້ຮັບລາງວັນຮອງອັນດັບໜຶ່ງໃນການປຸງແຕ່ງແຮ່ທາດທີ່ດີເລີດ (Best Mineral Processing Operation).

ລາງວັນດັ່ງກ່າວໄດ້ຍົກບົດບາດ ແລະໃຫ້ການຍ້ອງຍໍສັນລະເສີນແກ່ບໍລິສັດ ຂຸດຄົ້ນ-ປຸງແຕ່ງແຮ່ທາດດີເລີດ ໃນບັນດາປະເທດສະມາຊິກ “ອາຊຽນ” ທີ່ດຳເນີນທຸລະກິດຢ່າງມີຄວາມຮັບຜິດຊອບ ແລະເປັນມິດຕໍ່ສິ່ງແວດລ້ອມ.

     ພິທີມອບຮັບລາງວັນໄດ້ຈັດຂຶ້ນທີ່ກຸງ  ເນປີດໍ, ປະເທດມຽນມາໃຫ້ກຽດມອບ ລາງວັນທີ່ເປັນໃບຍ້ອງຍໍໂດຍທ່ານ ທອງພັດ ອິນທະວົງ ຮອງລັດຖະມົນຕີກະ ຊວງພະລັງງານ ແລະບໍ່ແຮ່ ແຫ່ງ ສປປ ລາວ ບໍລິສັດ LXML ແມ່ນໜຶ່ງໃນປະມານ 50 ບໍລິສັດຂຸດຄົ້ນ-ປຸງແຕ່ງ ແລະ ຈຳໜ່າຍຜະລິດຕະພັນແຮ່ທາດໃນຂົງ ເຂດປະເທດສະມາຊິກ “ອາຊຽນ” ທີ່ໄດ້ເຂົ້າແຂ່ງຂັນຊີງລາງວັນທາງດ້ານການປຸງແຕ່ງແຮ່ທາດດີເດັ່ນ “ອາຊຽນ” ໃນຄັ້ງນີ້ ແລະໄດ້ເປັນບໍລິສັດໜຶ່ງດຽວຈາກ ສປປ ລາວ ທີ່ຍາດແຍ່ງໄດ້ຄະແນນຜ່ານ ເຂົ້າຮອບໃນຈຳນວນ 8 ບໍລິສັດ ຂອງບັນຊີຄັດຈ້ອນໃນຂັ້ນສຸດທ້າຍ.

     ທ່ານ ທອງພັດ ອິນທະວົງ ຮອງລັດຖະມົນຕີກະຊວງພະລັງງານແລະບໍ່ແຮ່ ໄດ້ກ່າວວ່າ: “ລາງວັນນີ້ ເປັນນິມິດໝາຍ ແລະເປັນໂອກາດທີ່ດີໃນການຍົກບົດບາດ ແລະສົ່ງເສີມອຸດສາຫະກຳແຮ່ທາດໃນ ສປປ ລາວ ໃຫ້ມີການປະຕິບັດງານທີ່ດີເລີດ ແລະໃຫ້ໄດ້ມາດຕະຖານທີ່ສູງຂຶ້ນໄປເລື້ອຍໆ ທັງມີການພັດທະນາຢ່າງຕໍ່ເນື່ອງ”, ລາງວັນທີ່ໄດ້ຮັບໃນຄັ້ງນີ້ ຍັງເປັນການຍ້ອງຍໍຕໍ່ກັບບໍລິສັດທີ່ມີຜົນງານປະກອບສ່ວນໃນການພັດທະນາຊຸມຊົນ, ການພັດທະນາຊັບພະຍາກອນມະນຸດ, ຍົກສູງປະສິດທິຜົນໃນການຜະລິດ, ມີມາດຕະການໃນການຄຸ້ມຄອງສຸຂະພາບ, ຄວາມປອດໄພຂອງພະນັກງານ ແລະເປັນມິດຕໍ່ສິ່ງແວດລ້ອມ.

     ທ່ານ ສະໝານ ອະເນກາ ຜູ້ອຳນວຍການໃຫຍ່ ແລະຜູ້ຈັດການພົວພັນກັບຜູ້ມີສ່ວນຮ່ວມ ຂອງ LXMLໄດ້ກ່າວວ່າ: “ຂ້າພະເຈົ້າມີຄວາມຍິນດີເປັນຢ່າງຍິ່ງ ທີ່ທາງບໍລິສັດລ້ານຊ້າງ ມີນເນໂຣນ ລີມິເຕັດໄດ້ຮັບລາງວັນຍ້ອງຍໍໃນປະເພດການປຸງແຕ່ງແຮ່ທາດທີ່ດີເລີດ ຂອງຂົງເຂດປະເທດສະມາຊິກ “ອາຊຽນ” ໂດຍສະເພາະໃນ ສປປ ລາວ. ລາງວັນອັນຊົງກຽດນີ້ ສະທ້ອນໃຫ້ເຫັນ ວ່າທາງບໍລິສັດຂອງພວກເຮົາແມ່ນໄດ້ “ຂຸດຄົ້ນບໍ່ແຮ່ເພື່ອຄວາມກ້າວໜ້າ” ໄດ້ແນວໃດ. ລາງວັນດັ່ງກ່າວນີ້ ສະແດງ ເຖິງຄວາມມຸ່ງໝັ້ນຂອງບໍລິສັດໃນການພັດທະນາບຸກຄະລາກອນ ແລະຄຸນຄ່າ ອັນສູງສົ່ງທີ່ທາງບໍລິສັດມອບໃຫ້ແກ່ບັນ ດາຜູ້ຖືຮຸ້ນຂອງພວກເຮົາ ຊຶ່ງໄດ້ຮັບການ ສະໜັບສະໜູນທີ່ເຂັ້ມແຂງຈາກລັດຖະບານ ແຫ່ງ ສປປ ລາວ.

     ນັບແຕ່ ບໍ່ຄຳ-ທອງເຊໂປນໄດ້ເລີ່ມ ດຳເນີນງານຂຸດຄົ້ນໃນປີ 2002, ທາງບໍລິສັດໄດ້ປະກອບສ່ວນເປັນລາຍຮັບໂດຍກົງໃຫ້ແກ່ ສປປ ລາວ ເປັນຈຳນວນທັງໝົດ 1,4 ຕື້ໂດລາສະຫະລັດ ໂດຍຜ່ານການຈ່າຍພາສີ-ອາກອນ, ພາສີຊັບພະຍາກອນແຮ່ທາດ ແລະເງິນປັນຜົນບໍລິສັດ LXML ໄດ້ປະກອບທຶນຫຼາຍກວ່າ 17 ລ້ານໂດລາສະຫະລັດ ເຂົ້າໃນວຽກງານຄຸ້ມຄອງ-ການຟື້ນຟູ ແລະຕິດຕາມສິ່ງແວດລ້ອມ. ສາມາດສ້າງລາຍຮັບໃຫ້ແກ່ຊຸມຊົນທ້ອງຖິ່ນໄດ້ປະມານ 26 ລ້ານໂດລາສະຫະລັດຈາກການພັດທະນາກຸ່ມ ທຸລະກິດທ້ອງຖິ່ນ; ທັງໄດ້ລົງທຶນຫຼາຍກວ່າ 10 ລ້ານໂດລາສະຫະລັດເຂົ້າໃນໂຄງການພັດທະນາທ້ອງຖິ່ນ; ໄດ້ລົງທຶນ 46 ລ້ານໂດລາສະຫະລັດ ເຂົ້າໃນການ ກໍ່ສ້າງໂຄງລ່າງພື້ນຖານກໍຄືຕາໜ່າງໄຟຟ້າ ແລະເສັ້ນທາງຄົມມະນາຄົມ ແລະໄດ້ລົງທຶນຈຳນວນ 48 ລ້ານ ໂດລາສະຫະລັດ ເຂົ້າໃນການເກັບກູ້-ທຳລາຍລະເບີດບໍ່ທັນແຕກອັນໄດ້ປັບ ປຸງຊີວິດການເປັນຢູ່ ແລະຄວາມປອດໄພຂອງຊຸມຊົນໃຫ້ດີຂຶ້ນ.

     ລາງວັນໃນການດຳເນີນການປຸງ ແຕ່ງແຮ່ທາດທີ່ດີເລີດຍັງໄດ້ມີການຍ້ອງຍໍບັນດາບໍລິສັດໃນຂົງເຂດອາຊຽນ ລວມທັງບໍ່ແຮ່ທາດນີແກນ ໃນປະເທດຟີລິບປີນ (ຂອງ Rio Tuba), ບໍ່ແຮ່ຄຳໃນປະເທດອິນໂດເນເຊຍ (ຂອງ PT Nusa Halmahera) ແລະບໍ່ຫີນ ປູນໃນປະເທດໄທ (ຂອງ Siam Cement); ບໍລິສັດປຸງແຕ່ງແຮ່ເຫຼັກ ແລະ ແຮ່ນິແກນໃນປະເທດອິນໂດເນເຊຍ (ຂອງ PT Antam), ບໍລິສັດປຸງແຕ່ງແຮ່ຄຳ ໃນປະເທດຟີລິບປີນ (ຂອງ Oceana Gold) ແລະບໍລິສັດຂຸດຄົ້ນ-ປຸງແຕ່ງ-ຜະລິດແຜ່ນທອງ ໃນ ສປປ ລາວ (ຂອງ MMG LXML Sepon).

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ

ຜູ້ໃຊ້ເຂົ້າສູ່ລະບົບ

ໄປເທິງສຸດ