ແຂວງວຽງຈັນວາງແຜນໂຄງການຄຸ້ມຄອງປ່າສະຫງວນພູມືດ-ພູສັນເຂື່ອນ

     ແຂວງວຽງຈັນໂດຍແມ່ນພະແນກກະສິກຳ ແລະປ່າໄມ້ ໄດ້ເຊີນເອົາບັນດາເມືອງ ແລະພະແນກການທີ່ກ່ຽວຂ້ອງຂັ້ນແຂວງເຂົ້າປຶກສາຫາລືເພື່ອກຽມຈັດຕັ້ງປະຕິບັດໂຄງການຄຸ້ມຄອງປ່າສະຫງວນພູມືດ-ພູສັນເຂື່ອນແບບມີສ່ວນຮ່ວມຂອງຊຸມຊົນນັບແຕ່ນີ້ຮອດປີ 2020

ຊຶ່ງການຫາລືໃນເທື່ອນີ້ມີຂຶ້ນ ໃນວັນທີ 22 ທັນວາ 2017ຢູ່ພະແນກກະສິກຳແລະປ່າໄມ້ແຂວງ ໂດຍການເປັນປະທານຂອງທ່ານ ສົມອົກ ໜໍ່ສະຫວັນ ຮອງຫົວໜ້າພະແນກກະສິກຳ ແລະປ່າໄມ້ແຂວງວຽງຈັນ.

     ທ່ານ ບຸນເພັດ ດວງໂດດ ຜູ້ປະສານງານໂຄງການຄຸ້ມຄອງປ່າສະຫງວນພູມືດ-ພູສັນເຂື່ອນແບບມີສ່ວນຮ່ວມ ຂອງຊຸມຊົນ ກ່າວວ່າ: ແຂວງວຽງຈັນມີເນື້ອທີ່ປ່າໄມ້ທັງໝົດ 676.961 ເຮັກຕາ ໃນນີ້ເປັນ ເນື້ອທີ່ປ່າສະຫງວນ 223.691 ເຮັກຕາ, ເນື້ອທີ່ປ່າຜະລິດ 211.309 ເຮັກຕາ. ສະເພາະປ່າສະຫງວນພູມືດ-ພູສັນເຂື່ອນ ມີເນື້ອທີ່ 24.307 ເຮັກຕາ ຫ່າງຈາກເທສະບານເຂວງໄປທາງທິດເໜືອ 50 ກິໂລແມັດເຊິ່ງປ່າສະຫງວນແຫ່ງນີ້ໄດ້ຮັບ ການສ້າງຕັ້ງຂຶ້ນໃນສົກປີ 1996-97 ທິດເໜືອຕິດກັບອ່າງນ້ຳງື່ມ 1 ເຂດເມືອງວັງວຽງທິດໃຕ້ຕິດກັບສາຍນ້ຳງື່ມ ແລະສາຍນ້ຳລີກເຂດເມືອງແກ້ວອຸດົມ ແລະເມືອງໂພນໂຮງທິດຕາເວັນອອກຕິດກັບ ອ່າງນ້ຳງື່ມ 1 ເຂດເມືອງແກ້ວອຸດົມ, ທິດ ຕາເວັນຕົກຕິດກັບທາງຫຼວງແຫ່ງຊາດ 13 ເໜືອ ເຂດເມືອງຫີນເຫີບກວມເອົາ 18 ບ້ານໃນ 4 ເມືອງ ຊຶ່ງມີປະຊາກອນອາໄສຢູ່ເຂດດັ່ງກ່າວ 16.000 ກວ່າຄົນ.

     ທ່ານກ່າວຕໍ່ວ່າ: ເຫດຜົນທີ່ເລືອກເອົາປ່າສະຫງວນແຫ່ງນີ້ເປັນບ່ອນຈັດຕັ້ງປະຕິບັດໂຄງການຍ້ອນວ່າມີຄວາມອຸດົມສົມບູນໄປດ້ວຍຊັບພະຍາກອນທຳມະຊາດເປັນຕົ້ນແມ່ນປ່າໄມ້ ແລະເຄື່ອງປ່າຂອງດົງ, ມີຄວາມຫຼາກຫຼາຍດ້ານ ສັດນ້ຳ-ສັດປ່າ ແລະຍັງມີສັດປ່າປະເພດ ສັດໃຫຍ່ຄື: ງົວປ່າກະທິງທີ່ເປັນສັດລ້ຽງລູກດ້ວຍນ້ຳນົມປະເພດຫວງຫ້າມໃນອາຊີ ແລະໃນ ສປປ ລາວ ທີ່ເປັນສັດປ່າທີ່ຫາຍາກ ແລະໃກ້ຈະສູນພັນຢູ່ໃນໂລກ, ມີຄວາມສຳຄັນຕໍ່ລະບົບນິເວດວິທະຍາ. ມີຮ່ອງຮອຍປະຫວັດສາດ, ວັດທະນະ ທຳ ແລະທຳມະຊາດ (ເຊັ່ນ: ດານຫີນ ເອລິກົບ, ຖ້ຳລູກຕິ່ງ, ນ້ຳຕົກຕາດຫ້ວຍດອກໄມ້, ມີຄວາມເໝາະສົມໃນການສ້າງເປັນແຫຼ່ງທ່ອງທ່ຽວທາງດ້ານວັດທະນະທຳ, ປະຫວັດສາດ ແລະທຳ ມະຊາດໃນອະນາຄົດ ເພາະເປັນເຂດ ເຊື່ອມຕໍ່ແຫຼ່ງທ່ອງທ່ຽວເຂດເມືອງວັງວຽງ ແລະອ່າງນ້ຳງື່ມ 1, ເປັນບ່ອນຮັກ ສາສິ່ງແວດລ້ອມ, ແຫຼ່ງນ້ຳສະໜອງ ໃຫ້ແກ່ເຂື່ອນໄຟຟ້າ (ນ້ຳລີກ, ນ້ຳງື່ມ) ແລະນ້ຳໃຊ້, ເປັນແຫຼ່ງອາຫານ ແລະເຄື່ອງໃຊ້ສອຍຕອບສະໜອງຕໍ່ການດຳ ລົງຊີວິດຂອງປະຊາຊົນທີ່ຢູ່ອ້ອມຂ້າງ.

     ໂຄງການນີ້ໄດ້ຮັບການຊ່ວຍເຫຼືອ ຈາກກອງທຶນປົກປັກຮັກສາສິ່ງແວດລ້ອມ-ສັງຄົມຈາກທະນາຄານໂລກໃນ ມູນຄ່າ 499.998 ໂດລາສະຫະລັດ.

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ

ຜູ້ໃຊ້ເຂົ້າສູ່ລະບົບ

ໄປເທິງສຸດ