ຄຳມ່ວນ ຮ່ວມກັບນະຄອນພະນົມເປີດງານວາງສະແດງສິນຄ້າ

     ງານຕະຫຼາດນັດວາງສະແດງ ແລະຈຳໜ່າຍສິນຄ້າໂອດ໋ອບ-ໂອທ໋ອບ (ODOP–OTOP) ສາຍສໍາພັນສອງ ແຜ່ນດິນລະຫວ່າງ ແຂວງຄຳມ່ວນ ສປປ ລາວ ແລະແຂວງນະຄອນພະນົມ ລາຊະອານາຈັກໄທ ປະຈໍາປີ 2018 ແມ່ນ ໄດ້ຈັດຂຶ້ນໃນ ວັນທີ 5-9 ມັງກອນ 2018 ຢູ່ທີ່ເດີ່ນຕະຫຼາດຄຳມ່ວນ ເມືອງທ່າແຂກ.

ເປັນກຽດເຂົ້າຮ່ວມໃນພິທີເປີດ ງານໂດຍທ່ານ ບຸນມີ ພິມມະສອນ ຮອງ ເຈົ້າແຂວງໆຄຳມ່ວນ, ທ່ານ ສົມຊາຍ ວິດທະຍາດຳລົງ ຜູ້ວ່າ ຣາດຊະການ ຈັງຫວັດນະຄອນພະນົມ, ທ່ານເຈົ້າເມືອງໆທ່າແຂກ, ບັນດາພະແນກ ການອ້ອມຂ້າງ, ພາກສ່ວນທຸລະກິດທັງ ພາຍໃນ ແລະຕ່າງປະເທດຕະຫຼອດຮອດ ພໍ່ແມ່ປະຊາຊົນທັງ 2 ແຂວງເຂົ້າຮ່ວມ.

     ທ່ານ ບຸນໂຮມ ມຸກດາສັກ ຮອງຫົວໜ້າພະແນກອຸດສາຫະກໍາ ແລະການຄ້າ ແຂວງຄຳມ່ວນ ໄດ້ກ່າວລາຍງານເຖິງຈຸດປະສົງໃນການເປີດງານຕະຫລາດ ນັດວາງສະແດງສິນຄ້າ ໂອດ໋ອບ-ໂອທ໋ອບ ສາຍສໍາພັນສອງແຜ່ນດິນແມ່ນຈັດ ຂຶ້ນເພື່ອເປັນການຊຸກຍູ້ສົ່ງເສີມການຜະລິດເປັນສິນຄ້າ ໂອດ໋ອບ-ໂອທ໋ອບໃຫ້ນັບ ມື້ນັບຂະຫຍາຍຕົວ, ທັງເປັນການເປີດໂອກາດໃຫ້ທຸກພາກສ່ວນທຸລະກິດ ໂອດ໋ອບ-ໂອທ໋ອບ ພາກລັດຂອງ 2 ແຂວງ ຕະຫຼອດຮອດພໍ່ແມ່ປະຊາຊົນພາຍໃນ ແຂວງໃກ້ຄຽງໄດ້ນຳເອົາຜະລິດຕະພັນ ຂອງຕົນມາວາງສະແດງ ແລະຂາຍສິ່ງ ສຳຄັນອີກຢ່າງໜຶ່ງແມ່ນເພື່ອເປັນການພັດທະນາຄຸນນະພາບ, ມາດຕະຖານຜະລິດສິນຄ້າໃຫ້ເປັນທີ່ຍອມຮັບໃນລະດັບສາກົນ, ເພີ່ມຊ່ອງທາງໃນການຈຳໜ່າຍຊຸກຍູ້ໃຫ້ວຽກງານການຄ້າ, ການລົງທຶນ, ການທ່ອງທຽ່ວ ແລະມີໂອກາດພົບປະແລກປ່ຽນບົດຮຽນເຊິ່ງກັນ ແລະກັນ ເພື່ອເຊື່ອມໂຍງກັບບັນດາປະເທດຕ່າງໆ ໃນອະນຸພາກພຶ້ນກໍ່ຄືສາກົນໃຫ້ນັບມື້ນັບກວ້າງຂວາງ.

     ເຊິ່ງມີພາກສ່ວນຈາກກຸ່ມຜູ້ຜະລິດສິນຄ້າໂອດ໋ອບ-ໂອທ໋ອບ ຈຳນວນທັງໝົດ 3 ພາກສ່ວນ, ມີ 62 ຮ້ານທີ່ມາ ຈາກແຂວງຄຳມ່ວນ-ນະຄອນພະນົມ ແລະແຂວງໃກ້ຄຽງລວມມູນຄ່າສິນຄ້າທັງໝົດ 700 ກວ່າລ້ານກີບ. ງານຕະຫຼາດນັດຄັ້ງນີ້ນອກຈາກກິດຈະກຳຈັດງານຂາຍສິນຄ້າແລ້ວຍາມຄໍ່າຄືນຍັງມີ ການສະແດງສິລະປະວັດທະນະທຳຂອງ 2 ປະເທດຕື່ມອີກ.

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ

ຜູ້ໃຊ້ເຂົ້າສູ່ລະບົບ

ໄປເທິງສຸດ