ລັດຖະບານຕັ້ງເປົ້າໝາຍມູນຄ່າການຄ້າປີນີ້ໃຫ້ບັນລຸເກືອບ 80 ພັນຕື້ກີບ

     ເປັນຜົນພວງມາຈາກການຈັດຕັ້ງປະຕິບັດວຽກງານການນຳເຂົ້າ ແລະສົ່ງອອກສິນຄ້າໃນປີ 2017 ຜ່ານມາ, ທີ່ສາມາດປະຕິບັດໄດ້ຢ່າງມີບັນຍາກາດດີສົມຄວນດັ່ງນັ້ນ ໃນປີ 2018 ນີ້ ລັດຈຶ່ງຕັ້ງເປົ້າໝາຍການນຳເຂົ້າ ແລະສົ່ງອອກ ສິນຄ້າໃຫ້ບັນລຸທັງໝົດເກືອບ 80 ພັນຕື້ກີບໃນນັ້ນໄຟຟ້າ, ແຮ່ທາດ, ສິນຄ້າອຸດສາຫະກໍາ ແລະກະສິກໍາຈະເປັນຕົວຫຼັກໃນການສົ່ງອອກ.

 

     ອີງຕາມຂໍ້ມູນຈາກລັດຖະບານເປີດເຜີຍໃຫ້ຮູ້ວ່າ: ໃນປີ 2018 ນີ້ລັດຖະບານ ໄດ້ຕັ້ງເປົ້າໝາຍສູ້ຊົນມູນຄ່າການນໍາເຂົ້າ ແລະສົ່ງອອກສິນຄ້າກັບຕ່າງປະເທດ ໃຫ້ບັນລຸໄດ້ທັງໝົດ 9.993 ລ້ານໂດລາ ຫຼື ປະມານ 79.944 ຕື້ກີບ, ໃນນີ້ ການສົ່ງອອກໃຫ້ບັນລຸໄດ້ 5.015 ລ້ານໂດລາ, ສິນຄ້າທີ່ສົ່ງອອກຕົ້ນຕໍຍັງແມ່ນໄຟ ຟ້າ, ແຮ່ທາດ, ສິນຄ້າອຸດສາຫະກໍາ ແລະສິນຄ້າກະສິກໍາ, ສ່ວນມູນຄ່າການນຳ ເຂົ້າໃຫ້ປະຕິບັດໄດ້ 4.978 ລ້ານໂດລາຕົ້ນຕໍແມ່ນພາຫະນະ ແລະຊິ້ນສ່ວນອາໄຫຼ່, ນໍ້າມັນເຊື້ອໄຟ, ເຄື່ອງໃຊ້ໄຟຟ້າ, ອຸປະກອນກົນຈັກ ແລະອຸປະກອນເຄື່ອງກໍ່ສ້າງ ໂດຍທັງຕະຫຼາດນໍາເຂົ້າ ແລະສົ່ງອອກຕົ້ນຕໍຍັງແມ່ນບັນດາປະເທດທີ່ມີຊາຍແດນຕິດຈອດກັບ ສປປ ລາວ ຄື: ປະເທດໄທ, ສສ ຫວຽດນາມ ແລະສປ ຈີນ.

     ແນວໃດກໍດີ ຕາມຂໍ້ມູນຈາກກົມພາສີກະຊວງການເງິນ ແລະຫ້ອງການກະ ຊວງພະລັງງານ ແລະບໍ່ແຮ່ແຈ້ງໃຫ້ຮູ້ວ່າ: ໃນ 9 ເດືອນປີ 2017 ມູນຄ່າການ ນໍາເຂົ້າ ແລະສົ່ງອອກຂອງລາວ ສາມາດບັນລຸໄດ້ທັງໝົດ 6.942 ລ້ານໂດລາ, ເມື່ອທຽບໃສ່ໄລ ຍະດຽວກັນຂອງປີກ່ອນແມ່ນເພີ່ມຂຶ້ນ 10,2%, ໃນນັ້ນ ມູນຄ່າການສົ່ງອອກ ປະຕິບັດໄດ້ 3.615,6 ລ້ານໂດລາ, ເພີ່ມຂຶ້ນ 13,4%, ສ່ວນສິນຄ້າທີ່ສົ່ງອອກ ທັງໝົດ ລວມມີ 749 ລາຍການ, ໃນນີ້ ສົ່ງອອກຕົ້ນຕໍແມ່ນໄຟຟ້າ, ແຮ່ທາດ (ທອງ ແລະຄໍາປະສົມ), ອຸດສາຫະກໍາປຸງແຕ່ງປະກອບມີໂຄງຮ່າງກ້ອງ ບັນທຶກພາບ, ເຄື່ອງນຸ່ງຫົ່ມ, ເຄື່ອງໃຊ້ ໄຟຟ້າ ແລະນໍ້າຕານ, ສະເພາະສິນຄ້າ ກະສິກໍາທີ່ສົ່ງອອກແມ່ນໝາກກ້ວຍ, ມັນຕົ້ນ, ກາເຟ, ຢາງພາລາ, ສາລີ ແລະເຂົ້າ ເພື່ອສົ່ງອອກສິນຄ້າໄປຍັງ 74 ປະເທດໃນໂລກ, ໃນນີ້ຕະຫຼາດຕົ້ນຕໍແມ່ນປະເທດໄທ, ສປ ຈີນ, ສສ ຫວຽດນາມ, ອິນເດຍ, ຍີ່ປຸ່ນ, ເຢຍລະມັນ ແລະສະຫະລັດອາເມລິກາຊຶ່ງກວມເອົາ 46,9%, 24,5%, 23,6%, 13,6%, 3,8%, 1,6%, 1,2% ຕາມລຳດັບ.

     ສ່ວນມູນຄ່າການນໍາເຂົ້າກໍສາມາດບັນລຸໄດ້ 3.401 ລ້ານໂດລາ, ເພີ່ມຂຶ້ນ 9,5% ເມື່ອທຽບໃສ່ໄລຍະດຽວກັນຂອງປີກ່ອນສິນຄ້ານໍາເຂົ້າທັງໝົດ 4.227 ລາຍການຕົ້ນຕໍແມ່ນພາຫະນະ ແລະຊິ້ນສ່ວນອາໄຫຼ່, ນໍ້າມັນເຊື້ອໄຟ (ນໍ້າມັນແອັດຊັງ, ກາຊວນ ແລະກາດ), ເຄື່ອງໃຊ້ໄຟຟ້າ, ເຫຼັກ ແລະອຸປະກອນທີ່ເຮັດ ດ້ວຍເຫຼັກ, ອຸປະກອນກົນຈັກຈາກບັນດາ 72 ປະເທດໃນໂລກ, ແຕ່ການນໍາເຂົ້າ ຫຼາຍກວ່າໝູ່ແມ່ນມາຈາກປະເທດເພື່ອນບ້ານ ເຊັ່ນ: ປະເທດໄທ, ສປ ຈີນ ແລະສສ ຫວຽດນາມ, ນອກນັ້ນ, ຍັງນໍາເຂົ້າມາຈາກ ຍີ່ປຸ່ນ, ສ. ເກົາຫຼີ, ອິນ ໂດເນເຊຍ, ສິງກະໂປ ແລະເຢຍລະມັນ ຈຳນວນໜຶ່ງ.

     ຈາກຂໍ້ມູນທີ່ກ່າວມານັ້ນ, ຄາດວ່າມູນຄ່າການນຳເຂົ້າ ແລະສົ່ງອອກທັງໝົດຂອງປີ 2017 ຈະສາມາດປະຕິບັດ ໄດ້ທັງໝົດປະມານ 9.345 ລ້ານໂດລາ, ເພີ່ມຂຶ້ນ 10,5% ເມື່ອທຽບໃສ່ປີ 2016, ໃນນີ້ ມູນຄ່າການສົ່ງອອກຄາດ ວ່າຈະບັນລຸ 4.803 ລ້ານໂດລາ, ເພີ່ມຂຶ້ນ 13,4% ແລະມູນຄ່າການນໍາເຂົ້າຈະປະຕິບັດໄດ້ 4.542 ລ້ານໂດລາ ເພີ່ມຂຶ້ນ 7,6%.

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ

ຜູ້ໃຊ້ເຂົ້າສູ່ລະບົບ

ໄປເທິງສຸດ