ລັດຖະບານລາວ ແລະມຽນມາ ລົງນາມເອກະສານຮ່ວມມື 3 ສະບັບ

     ໂດຍຕອບສະໜອງຕາມຄຳເຊີນຂອງ ທ່ານ ອູ ຕິນ ຈໍ ປະທານາທິບໍດີ ແຫ່ງ ສສ.ມຽນມາ, ທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ, ພ້ອມດ້ວຍພັນລະຍາ ແລະຄະນະໄດ້ເດີນທາງຢ້ຽມຢາມ ສສ.ມຽນມາ ຢ່າງເປັນທາງການໃນລະຫວ່າງວັນ ທີ 15-16 ມັງກອນ 2018,

ຊຶ່ງເປັນການຢ້ຽມຢາມ ສສ. ມຽນມາ ຄັ້ງທໍາອິດ ພາຍຫຼັງດໍາລົງຕໍາເເໜ່ງເປັນນາຍົກລັດຖະມົນຕີ ແຫ່ງ ສປປ ລາວ, ເພື່ອສືບຕໍ່ເສີມຂະຫຍາຍສາຍພົວພັນມິດຕະພາບ ແລະການຮ່ວມມືອັນດີງາມລະຫວ່າງສອງປະເທດລາວ ແລະມຽນມາ ໃຫ້ແໜ້ນແຟ້ນຍິ່ງໆຂຶ້ນ.

     ໃນວັນທີ 15 ມັງກອນ 2018, ພິທີຕ້ອນຮັບຢ່າງເປັນທາງການໄດ້ຈັດຂຶ້ນຢ່າງອົບອຸ່ນ ແລະສົມກຽດທີ່ທຳນຽບປະ ທານາທິບໍດີ, ໂດຍການໃຫ້ກຽດຕ້ອນ ຮັບຂອງພະນະທ່ານ ອູ ຕິນ ຈໍ ປະທານາ ທິບໍດີແຫ່ງ ສສ.ມຽນມາ ແລະພັນລະຍາ. ພາຍຫຼັງສໍາເລັດພິທີຕ້ອນຮັບຜູ້ນຳທັງສອງຝ່າຍໄດ້ດຳເນີນການພົບປະ, ໂດຍສອງຝ່າຍໄດ້ຕີລາຄາສູງຕໍ່ການພົວພັນ ຮ່ວມມືທີ່ດີລະຫວ່າງສອງປະເທດ ເພື່ອນບ້ານໃກ້ຄຽງໃນກຸ່ມອາຊຽນ ໃນໄລຍະຜ່ານມາ, ຊຶ່ງເຫັນໄດ້ຈາກການ ແລກປ່ຽນການຢ້ຽມຢາມເຊິ່ງກັນ ແລະກັນ ຢ່າງເປັນປົກກະຕິຂອງການນຳຂັ້ນສູງຂອງສອງປະເທດ.

     ໃນໂອກາດນີ້, ທ່ານ ທອງລຸນ ສີສຸລິດ ໄດ້ສະແດງຄວາມຂອບໃຈຕໍ່ການ ຕ້ອນຮັບອັນອົບອຸ່ນ ແລະສົມກຽດຖານ ເພື່ອນມິດສະໜິດແໜ້ນ, ໄດ້ສະແດງ ຄວາມຊົມເຊີຍຕໍ່ຜົນສຳເລັດອັນໃຫຍ່ຫຼວງຂອງລັດຖະບານ ແລະປະຊາຊົນ ມຽນມາ ໃນການພັດທະນາປະເທດຊາດໃຫ້ກ້າວໜ້າຍິ່ງໆຂຶ້ນ, ພ້ອມນັ້ນ ທ່ານກໍ່ໄດ້ນຳເອົາຄວາມຢື້ຢາມຖາມຂ່າວຈາກທ່ານ ບຸນຍັງ ວໍລະຈິດ, ປະທານປະເທດ ແຫ່ງ ສປປ ລາວເຖິງທ່ານປະທານາທິບໍດີ ແຫ່ງ ສສ. ມຽນມາ.

     ໃນໂອກາດດຽວກັນ, ທ່ານປະທານາ ທິບໍດີ ອູຕິນ ກໍ່ໄດ້ສະແດງຄວາມຍິນດີຕ້ອນຮັບອັນອົບອຸ່ນ ແລະໄດ້ຕີລາຄາສູງຕໍ່ການຢ້ຽມຢາມຢ່າງເປັນທາງ ການຢູ່ ສສ.ມຽນມາ ຂອງທ່ານທອງລຸນ ສີສຸລິດ ແລະຄະນະ ຊຶ່ງຈະເປັນການຊຸກຍູ້ສົ່ງເສີມສາຍພົວພັນ ແລະການຮ່ວມມືລະຫວ່າງສອງປະເທດໃຫ້ຂະຫຍາຍຕົວຍິ່ງໆຂຶ້ນໄປ. ພ້ອມກັນນັ້ນ, ທ່ານ ປະທານາທິບໍດີກໍ່ໄດ້ຝາກຄວາມຢື້ຢາມຖາມຂ່າວໄປຍັງທ່ານປະທານປະເທດ ແຫ່ງ ສປປ ລາວ ແລະອວຍພອນ ໃຫ້ທ່ານນາຍົກລັດຖະມົນຕີ ພ້ອມດ້ວຍ ຄະນະຈົ່ງໄດ້ຮັບຜົນສຳເລັດໃນການຢ້ຽມຢາມ ສສ.ມຽນມາ ຢ່າງເປັນທາງການໃນຄັ້ງນີ້.

     ໃນວັນດຽວກັນ, ທ່ານ ທອງລຸນ ສີສຸລິດ ຍັງໄດ້ພົບປະສອງຝ່າຍກັບ ທ່ານນາງ ອອງຊານຊູຈີ ທີ່ປຶກສາແຫ່ງລັດແຫ່ງ ສສ.ມຽນມາ ທີ່ທຳນຽບປະ ທານາທິບໍດີ ສອງຝ່າຍໄດ້ແຈ້ງສະພາບ ການພັດທະນາເສດຖະກິດ-ສັງຄົມ ຢູ່ພາຍໃນປະເທດຂອງຕົນໃຫ້ກັນຊາບ, ພ້ອມໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ຜົນການຮ່ວມມືສອງຝ່າຍໃນດ້ານຕ່າງໆທີ່ມີບາດກ້າວຂະຫຍາຍຕົວທີ່ດີໃນໄລຍະຜ່ານມາ, ເປັນຕົ້ນແມ່ນ ທາງດ້ານການເມືອງ, ດ້ານປ້ອງກັນປະ ເທດ, ດ້ານປ້ອງກັນຄວາມສະຫງົບ, ວຽກງານຊາຍແດນ, ດ້ານຄົມມະນາຄົມ ແລະຂົນສົ່ງ, ດ້ານພະລັງງານໄຟຟ້າ, ດ້ານການສຶກສາ, ດ້ານວິທະຍາສາດ ແລະເຕັກໂນໂລຊີ, ດ້ານການຄ້າ-ການ ລົງທຶນ ແລະດ້ານອື່ນໆ. ນອກນັ້ນ, ສອງຝ່າຍລ້ວນແຕ່ເຫັນດີພ້ອມກັນວ່າສອງ ປະເທດມີທ່າແຮງບົ່ມຊ້ອນຫຼາຍທີ່ຈະຮ່ວມມືກັນໃນຫຼາຍດ້ານ ເປັນຕົ້ນແມ່ນດ້ານການທ່ອງທ່ຽວ ໂດຍສະເພາະປີທ່ອງທ່ຽວລາວ 2018 ຈະສືບຕໍ່ຮ່ວມ ມືກັນແລກປ່ຽນເຊິ່ງກັນ ແລະກັນ ແລະຊຸກຍູ້ການໄປມາຫາສູ່ກັນລະຫວ່າງປະຊາຊົນສອງປະເທດນຳກັນຫຼາຍຂຶ້ນ.

     ໃນໄລຍະຜ່ານມາ ສປປ ລາວ ແລະ ສສ.ມຽນມາ ໄດ້ມີການລົງນາມສັນຍາ ແລະບົດບັນທຶກຄວາມເຂົ້າໃຈຮ່ວມກັນ ຫຼາຍກວ່າ 30 ສະບັບ, ຊຶ່ງສອງຝ່າຍເຫັນດີວ່າຄວນຊຸກຍູ້ໃຫ້ພາກສ່ວນກ່ຽວຂ້ອງປະຕິບັດຕາມສັນຍາ ແລະບົດບັນທຶກ ຄວາມເຂົ້າໃຈທີ່ໄດ້ເຊັນກັນແລ້ວນັ້ນ ໃຫ້ມີປະສິດຕິຜົນຫຼາຍຂຶ້ນກວ່າເກົ່າ, ພ້ອມທັງເຫັນດີຊຸກຍູ້ໃຫ້ບັນດາຂະແໜງການເຫຼົ່ານັ້ນ ເພີ່ມທະວີປຶກສາຫາລື ແລະຊອກຊ່ອງທາງການຮ່ວມມືນຳກັນ ໃຫ້ຫຼາຍຂຶ້ນຕື່ມ. ພ້ອມກັນນັ້ນ, ທ່ານນາ ຍົກລັດຖະມົົນຕີ ທອງລຸນ ສີສຸລິດ ຍັງ ໄດ້ເຊື້ອເຊີນ ທ່ານນາງ ອອງຊານ ຊູຈີ ຢ້ຽມຢາມທາງການທີ່ ສປປ ລາວ ເພື່ອເສີມຂະຫຍາຍສາຍພົວພັນມິດ ຕະພາບລະຫວ່າງສອງປະເທດລາວ ແລະມຽນມາໃຫ້ແໜ້ນແຟ້ນຍິ່ງໆຂຶ້ນ.

     ພາຍຫຼັງສຳເລັດການພົບປະ ທ່ານ ທອງລຸນ ສີສຸລິດ ນາຍົກລັດຖະມົນຕີ ແລະທ່ານນາງ ອອງຊານ ຊູຈີ ກໍ່ໄດ້ ເຂົ້າຮ່ວມເປັນສັກຂີພິຍານໃນພິທີລົງນາມເອກະສານສຳຄັນ 3 ສະບັບຄື: ບົດບັນທຶກຄວາມເຂົ້າໃຈ ວ່າດ້ວຍການ ຮ່ວມມືດ້ານພະລັງງານໄຟຟ້າລະຫວ່າງ ກະຊວງພະລັງງານ ແລະບໍ່ແຮ່ ແຫ່ງ ສປປ ລາວ ແລະກະຊວງໄຟຟ້າ ແລະພະລັງງານ ແຫ່ງ ສສ.ມຽນມາ, ບົດບັນທຶກຄວາມເຂົ້າໃຈວ່າດ້ວຍການຮ່ວມມືດ້ານວິທະຍາສາດ ແລະເຕັກໂນ ໂລຊີລະຫວ່າງ ກະຊວງວິທະຍາສາດ ແລະເຕັກໂນໂລຊີ ແຫ່ງ ສປປ ລາວ ແລະ ກະຊວງສຶກສາ (ວິທະຍາສາດ ແລະ ເຕັກໂນໂລຊີ) ແຫ່ງ ສສ. ມຽນມາ, ບົດບັນທຶກຄວາມເຂົ້າໃຈ ວ່າດ້ວຍການຮ່ວມມືດ້ານການຕ້ານການສໍ້ລາດບັງຫຼວງ ລະຫວ່າງອົງການກວດກາລັດຖະບານ ແລະຕ້ານການສໍ້ລາດບັງຫຼວງແຫ່ງ ສປປ ລາວ ແລະຄະນະກຳມະການຕ້ານການສໍ້ລາດບັງຫຼວງແຫ່ງ ສສ. ມຽນມາ.

     ໃນໂອກາດຢ້ຽມຢາມ ສສ. ມຽນມາ ຄັ້ງນີ້, ທ່ານນາຍົກລັດຖະມົນຕີແຫ່ງ ສປປ ລາວ, ພ້ອມດ້ວຍພັນລະຍາ ແລະຄະນະຈະໄປຢ້ຽມຢາມນະຄອນຢັ້ງກຸ້ງ, ເຂດເສດຖະກິດພິເສດທີລາວາ ແລະພະທາດສະເວດາກ໋ອງ.

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ

ຜູ້ໃຊ້ເຂົ້າສູ່ລະບົບ

ໄປເທິງສຸດ