ທ່ານນາຍົກຢ້ຽມຢາມ ແລະໂອ້ລົມພະນັກງານເມືອງວັງວຽງ

     ໃນຕອນແລງວັນທີ 18 ມັງກອນ 2018 ນີ້, ທ່ານ ທອງລຸນ ສີສຸລິດ ກຳມະການກົມການເມືອງສູນກາງພັກ, ນາຍົກລັດຖະມົນຕີແຫ່ງ ສປປ ລາວ, ພ້ອມ ດ້ວຍຄະນະໄດ້ເດີນທາງຢ້ຽມຢາມ ແລະໂອ້ລົມ, ພະນັກງານ, ທະຫານ, ຕຳຫຼວດ ເມືອງວັງວຽງ, ແຂວງວຽງຈັນ, ໂດຍການຕ້ອນຮັບຢ່າງອົບອຸ່ນຈາກ ທ່ານ ວີດົງ ໄຊຍະສອນ ເຈົ້າແຂວງໆວຽງຈັນ, ມີທ່ານເຈົ້າເມືອງໆວັງວຽງ, ພ້ອມດ້ວຍການນຳ ແລະພະນັກງານຂອງເມືອງດັ່ງກ່າວ.

 

     ທ່ານ ຄຳຜອງ ດວງວິໄລ ເຈົ້າເມືອງໆວັງວຽງ ໄດ້ລາຍງານສະພາບການພັດທະນາເສດຖະກິດ-ສັງຄົມ ຂອງເມືອງໂດຍຫຍໍ້ ໂດຍສະເພາະປີ 2017 ຜ່ານມາ ສະພາບເສດຖະກິດຂອງເມືອງຍັງສືບຕໍ່ຂະຫຍາຍຕົວຢ່າງໝັ້ນທ່ຽງ ແລະຮັກສາອັດຕາການເຕີບໂຕຂອງເສດຖະກິດຢ່າງຕໍ່ເນື່ອງ, ລວມຍອດລາຍຮັບຂອງ ເມືອງປະຕິບັດໄດ້ 1.255 ຕື້ກວ່າກີບ, ສະເລ່ຍລາຍຮັບໃສ່ຫົວຄົນຕໍ່ປີໄດ້ເກືອບ 21 ລ້ານກີບ ຫຼື ເທົ່າກັບ 2.527 ໂດລາສະຫະລັດ, ສະເລ່ຍເຂົ້າກິນໄດ້ 439,5 ກິໂລເຂົ້າເປືອກຕໍ່ຄົນຕໍ່ປີ, ລວມຍອດການຈັດເກັບລາຍຮັບງົບປະມານບັນລຸໄດ້ 9.424 ຕື້ກີບ, ລວມຍອດລາຍຈ່າຍ

     ປະຕິບັດໄດ້ 12.574 ຕື້ກີບ, ອັດຕາການ ຊົມໃຊ້ນ້ຳສະອາດຂອງປະຊາຊົນບັນລຸໄດ້ 84,1%, ອັດຕາການຊົມໃຊ້ວິດ ຖ່າຍບັນລຸ 92%, ອັດຕາການເຂົ້າຮຽນ ສຸດທິບັນລຸໄດ້ 95,67%, ອັດຕາການຊົມໃຊ້ໄຟຟ້າບັນລຸໄດ້ 100% ຂອງຈຳ ນວນຄົວເຮືອນທັງໝົດ, ການແກ້ໄຂຄວາມທຸກຍາກຂອງປະຊົນຫຼຸດລົງ 49 ຄົວເຮືອນ, ປະຈຸບັນທົ່ວເມືອງມີຄົວ ເຮືອນທຸກຍາກ 74 ຄົວເຮືອນ, ເທົ່າກັບ 0,67% ຂອງຄົວເຮືອນທັງໝົດ, ບ້ານທຸກຍາກຍັງ 1 ບ້ານ, ກະກຽມປະເມີນ ຜົນ ແລະຈະລຶບລ້າງໃນປີ 2018 ນີ້, ທົ່ວເມືອງມີແຫຼ່ງທ່ອງທ່ຽວທຳມະຊາດ ທີ່ໄດ້ສຳຫຼວດແລ້ວ 43 ແຫ່ງ, ໄດ້ພັດ ທະນາ ແລະເປີດບໍລິການແລ້ວ 21 ແຫ່ງ, ໃນປີ 2017 ມີນັກທ່ອງທ່ຽວເຂົ້າມາ ເມືອງວັງວຽງທັງໝົດ 189.763 ຄົນ, ໃນນີ້ມີນັກທ່ອງທ່ຽວພາຍໃນ 40.349 ຄົນ, ຕ່າງປະເທດ 149. 414 ຄົນ, ສາມາດສ້າງລາຍຮັບໄດ້ 94 ຕື້ກວ່າກີບ.

     ໃນໂອກາດນີ້ ທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ ກໍ່ໄດ້ໃຫ້ກຽດໂອ້ລົມເຊິ່ງທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ເມືອງວັງວຽງສ້າງໄດ້ໃນໄລຍະຜ່ານມາ, ພ້ອມນີ້ທ່ານຍັງໄດ້ເນັ້ນບາງບັນຫາທີ່ເຫັນວ່າເມືອງວັງວຽງຈະຕ້ອງໄດ້ສືບຕໍ່ແກ້ໄຂເປັນຕົ້ນແມ່ນໃຫ້ເອົາໃຈໃສ່ປົກປັກຮັກສາສະພາບແວດລ້ອມພາຍໃນເມືອງໃຫ້ມີຄວາມສວຍງາມຢູ່ສະເໝີ, ຕ້ອງມີການອະນຸຮັກປ່າໄມ້, ຮັກສາມູນເຊື້ອວັດທະນະທຳຂອງເມືອງໃຫ້ ເປັນເອກະລັກ, ເຮັດໃຫ້ພາຍໃນເມືອງມີຄວາມສະຫງົບປອດໄພ, ເຈົ້າໜ້າທີ່ທຸກ ພາກສ່ວນພາຍໃນເມືອງຕ້ອງເຮັດໜ້າທີ່ ຂອງຕົນຕາມພາລະບົດບາດ, ສິດ, ໜ້າ ທີ່ຂອງຕົນ, ຕ້ອງມີການຮັກສາຄວາມ ສະອາດຈົບງາມພາຍໃນຕົວເມືອງ, ຖະໜົນຫົນທາງ, ແມ່ນ້ຳລຳເຊ ແລະສະຖານ ທີ່ທ່ອງທ່ຽວ, ຮັບປະກັນດ້ານຄວາມ ປອດໄພຂອງນັກທ່ອງທ່ຽວ, ພ້ອມທັງ ສຶກສາອົບຮົມໃຫ້ປະຊາຊົນຮູ້ຈັກຮັກສາ ສະຖານທີ່ທ່ອງທ່ຽວ, ຕ້ອງກວດກາເຂັ້ມ ງວດຕໍ່ນັກທ່ອງທ່ຽວທີ່ສ້າງຄວາມ ເສື່ອມເສຍໃຫ້ແກ່ເມືອງວັງວຽງ, ຕ້ອງມີການຈັດກອງປະຊຸມປຶກສາຫາລືປົກ ກະຕິລະຫວ່າງພາກລັດ ແລະເອກະຊົນ, ການສ້າງອາຄານ, ສະຖານທີ່ຄວນມີມາດຕະການຄຸ້ມຄອງຢ່າງຮັດກຸມເພື່ອ ບໍ່ໃຫ້ສິ່ງກໍ່ສ້າງຕ່າງໆ ກະທົບຕໍ່ສິ່ງແວດ ລ້ອມ ແລະບັງທິວທັດທຳມະຊາດພາຍ ໃນເມືອງ.

     ໃນໂອກາດມາຢ້ຽມຢາມເມືອງວັງວຽງຄັ້ງນີ້, ທ່ານນາຍົກລັດຖະມົນຕີ, ພ້ອມດ້ວຍຄະນະຍັງໄດ້ມອບເງິນສົດຈຳນວນ 30 ລ້ານກີບ ແລະຄອມພິວເຕີ ຈຳນວນ 3 ເຄື່ອງໃຫ້ກັບເມືອງວັງວຽງຕື່ມອີກ.

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ

ຜູ້ໃຊ້ເຂົ້າສູ່ລະບົບ

ໄປເທິງສຸດ