ໄຟຟ້າຫົງສາ ມອບເງິນສົມທົບທຶນໃຫ້ໂຮງໝໍສອງເມືອງ

     ໂດຍອີງໃສ່ແນວທາງການຮ່ວມ ມືທາງດ້ານການພັດທະນາທ້ອງຖິ່ນລະຫວ່າງ ບໍລິສັດໄຟຟ້າຫົງສາຈຳກັດ ກັບເມືອງຫົງສາ ແລະເມືອງເງິນ ທີ່ມີເປົ້າໝາຍຮ່ວມກັນເພື່ອພັດທະນາໃຫ້ ໂຮງໝໍເມືອງຫົງສາ ແລະເມືອງເງິນ ມີຄວາມເຂັ້ມແຂງຮັບປະກັນໃຫ້ປະຊາຊົນສອງເມືອງດັ່ງກ່າວ ໄດ້ຮັບການຄຸ້ມຄອງທາງດ້ານສຸຂະພາບ ແລະພະລານາໄມສິ່ງແວດລ້ອມທີ່ດີ.

 

     ໃນວັນທີ 18 ມັງກອນ 2018 ນີ້. ທີ່ສະໂມສອນໃຫຍ່ຂອງເມືອງຫົງສາ ແຂວງໄຊຍະບູລີ ໄດ້ຈັດພິທີມອບ-ຮັບທຶນຊ່ວຍເຫຼືອໃຫ້ແກ່ໂຮງໝໍເມືອງຫົງສາ ແລະເມືອງເງິນ. ໂດຍເປັນກຽດເຂົ້າຮ່ວມຂອງທ່ານນາງ ດາວວິນ ລາດຊະກິດ ຮອງເຈົ້າເມືອງໆຫົງສາ, ທ່ານ ທະນະວັດ ນຸກູນການ ຮອງຜູ້ອຳນວຍການໃຫຍ່ ບໍລິສັດໄຟຟ້າຫົງສາ ຈໍາກັດ, ມີຕາງໜ້າພະແນກສາທາລະນະສຸກແຂວງໄຊຍະບູລີ, ຕາງໜ້າບໍລິສັດຜູ້ຮັບເໝົາໂຄງການໄຟຟ້າປາກບໍ່ແຮ່ຫົງສາ, ມີຫົວໜ້າຫ້ອງການ, ລັດວິສາຫະກິດພາຍ ໃນເມືອງຫົງສາ ພ້ອມຫົວໜ້າຫ້ອງການສາທາລະນະສຸກ-ໂຮງໝໍເມືອງຫົງສາ ແລະເມືອງເງິນເຂົ້າຮ່ວມ.

     ໃນພິທີ ທ່ານ ນາງສຸລານີ ພູສຸວັນ ຫົວໜ້າພະແນກພັດທະນາສັງຄົມບໍລິສັດ ໄຟຟ້າຫົງສາ ຈໍາກັດ ກໍ່ໄດ້ຂຶ້ນກ່າວເຖິງຄວາມເປັນມາຂອງເງິນທຶນບໍລິຈາກດັ່ງກ່າວ ແລະເງື່ອນໄຂໃນການນຳໃຊ້ງົບ ປະມານຕໍ່ທີ່ປະຊຸມ. ຊຶ່ງໃນຊຸມປີຜ່ານມາ, ທາງບໍລິສັດໄຟຟ້າຫົງສາ ແລະບັນດາບໍ ລິສັດຜູ້ຮັບເໝົາໄດ້ສົມທົບກັບອຳນາດການປົກຄອງເມືອງຫົງສາ ແລະເມືອງ ເງິນຈັດງານສະເຫຼີມສະຫຼອງວັນສ້າງຕັ້ງໂຮງງານໄຟຟ້າຫົງສາ ແລະວັນຕ້ານເອດສາກົນ. ໃນນັ້ນ, ກໍ່ໄດ້ສ້າງ ກິດຈະກຳແລ່ນມາລາທອນເພື່ອການກຸສົນຂຶ້ນທຸກໆປີ ແລະປີນີ້, ກໍ່ເປັນປີທີ ສອງທີ່ສືບຕໍ່ຮ່ວມຈັດງານດັ່ງກ່າວ ແລະສາມາດລະດົມທຶນໄດ້ທັງໝົດຈຳນວນ 71.650.000 ກີບ. ເງິນທັງໝົດເຫຼົ່ານີ້, ກໍ່ຈະໄດ້ມອບໃຫ້ໂຮງໝໍເມືອງຫົງສາ ແລະໂຮງໝໍເມືອງເງິນ ເພື່ອນຳໄປຈັດຊື້ອຸປະກອນການແພດ ແລະເຄື່ອງມືທີ່ ຈຳເປັນຕ່າງໆ ໃຊ້ເຂົ້າໃນການບົ່ງມະຕິ ແລະປິ່ນປົວພະຍາດ.

     ຈາກນັ້ນ ທ່ານ ທະນະວັດ ນຸກູນການ ກໍ່ໄດ້ຂຶ້ນມອບເງິນຈຳນວນ 71.650.000 ກີບ ໃຫ້ໂຮງໝໍສອງເມືອງ ແລະກ່າວຮັບໂດຍທ່ານ ດຣ ນາງ ບຸນປັນ ໂພທິລັກ ຕາງໜ້າພະແນກສາທາລະນະສຸກແຂວງໄຊຍະບູລີ. ພ້ອມນັ້ນ, ທ່ານກໍ່ໄດ້ມອບຕໍ່ໃຫ້ໂຮງໝໍສອງເມືອງ ໂດຍກ່າວຮັບຂອງທ່ານນາງ ດາວວິນ ລາດຊະກິດ ຮອງເຈົ້າເມືອງໆຫົງສາ.

     ພ້ອມດຽວກັນນີ້ ທາງເມືອງຫົງສາ ກໍ່ໄດ້ມອບໃບຍ້ອງຍໍ ແລະໃບສົມມະນາ ບຸນຄຸນໃຫ້ຜູ້ປະກອບສ່ວນຄັ້ງນີ້ຄື: ບໍລິສັດໄຟຟ້າຫົງສາ ຈຳກັດ, ບໍລິສັດຊີພີອີ, ບໍລິສັດ ເຈວີເອວດີເອສ, ບໍລິສັດ ສະຫະກົນ ມະຫາຊົນ ແລະບໍລິສັດ ອິຕາລຽນໄທ-ຫົງສາ ຕື່ມອີກ.

 

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ

ຜູ້ໃຊ້ເຂົ້າສູ່ລະບົບ

ໄປເທິງສຸດ