ເປີດນຳໃຊ້ເປັນທາງການຂົວມິດຕະພາບລາວ-ຍີ່ປຸ່ນ ແຂວງເຊກອງ

     ພິທີມອບ-ຮັບ ແລະເປີດໃຊ້ຢ່າງເປັນທາງການໂຄງການກໍ່ສ້າງຂົວມິດຕະພາບລາວ-ຍີ່ປຸ່ນແຂວງເຊກອງໄດ້ຈັດຂຶ້ນໃນຕອນເຊົ້າຂອງວັນທີ 12 ກຸມ ພານີ້ທີ່ຂົວດັ່ງກ່າວ,

ໃຫ້ກຽດເຂົ້າຮ່ວມ ມີທ່ານ ບຸນທອງ ຈິດມະນີ ຮອງນາຍົກ ລັດຖະມົນຕີ, ປະທານອົງການກວດກາລັດຖະບານ, ຫົວໜ້າອົງການຕ້ານການ ສໍ້ລາດບັງຫຼວງຂັ້ນສູນກາງ, ທ່ານ ຄຳເຜີຍ ບຸດດາວຽງ ເຈົ້າແຂວງໆເຊກອງ, ທ່ານ ທາເຄຊິ ຣິຄີ ຮາຣະເອກອັກຄະລາຊະທູດຍີ່ປຸ່ນປະຈຳລາວ, ພ້ອມນີ້ກໍມີບັນດາລັດຖະມົນຕີ, ຮອງລັດຖະມົນຕີ, ຜູ້ຕາງໜ້າອົງການໄຈກ້າປະຈຳລາວ ແລະພາກສ່ວນກ່ຽວຂ້ອງເຂົ້າຮ່ວມ.

     ທ່ານ ແພງ ດວງເງິນ ຫົວໜ້າກົມຂົວທາງກະຊວງໂຍທາທິການ ແລະຂົນສົ່ງ ໄດ້ລາຍງານຫຍໍ້ຄວາມເປັນມາ ແລະຜົນການກໍ່ສ້າງຂົວມິດຕະພາບລາວ-ຍີ່ປຸ່ນຂອງແຂວງເຊກອງໃຫ້ຮູ້ວ່າ: ໂຄງການດັ່ງກ່າວເປັນໂຄງການບູລິມະສິດ ຂອງລັດຖະບານ, ໂຄງການກໍ່ສ້າງຂົວ ແຫ່ງນີ້ນອນຢູ່ໃນເສັ້ນທາງຫຼວງແຫ່ງ ຊາດເລກທີ 16B ຊຶ່ງມີຈຸດເລີ່ມຕົ້ນຈາກເທສະບານແຂວງເຊກອງຫາເມືອງ ດາກຈຶງຊາຍແດນລາວຫວຽດນາມມີຄວາມຍາວ 116 ກິໂລແມັດ, ຂົວຂ້າມນໍ້າເຊ ກອງມີຄວາມຍາວ 300 ແມັດ: ໄດ້ອອກ ແບບກໍ່ສ້າງຕາມມາດຕະຖານເຕັກນິກ ຂອງສາກົນ, ເປັນຂົວເບຕົງເສີມເຫຼັກອັດ ແຮງແບບປະສົມລະຫວ່າງສາຍກາບ ຖ່ວງດຶງ ແລະຂາງແບບຮູບກັບ 4 ຫຼ່ຽມ, ສາມາດຮັບນໍ້າໜັກໄດ້ 80 ໂຕນ, ມີເສົາກາງນໍ້າ ແລະເສົາຫົວຂົວ 2 ເສົາ, ລະບົບຮາກຖານຈໍານວນໜຶ່ງຕອກດ້ວຍ ເສົາເຂັມ, ມີຈໍານວນ 17 ຕົ້ນ, ມີ 4 ຊ່ວງ, ຊ່ວງກາງນໍ້າທີ່ກວ້າງ 110 ແມັດ, ຄວາມກວ້າງຂອງຂົວ 11 ແມັດ, ໜ້າທາງລົດແລ່ນ 8 ແມັດ, ທາງຍ່າງເບື້ອງລະ 1,5 ແມັດ, ໜ້າຂົວປູດ້ວຍ ຢາງຂົ້ວ, ໜາ 8 ຊັງຕີແມັດ, ມີທາງເຂົ້າຂົວ 2 ເບື້ອງ, ຍາວລວມ 527 ແມັດ, ກວ້າງ 10 ແມັດ, ປູດ້ວຍຢາງ ຂົ້ວໜາ 10 ຊັງຕີແມັດ, ມີລະບົບໄຟ ເຍືອງທາງ ແລະຂົວຄົບຊຸດເພື່ອຮັບປະກັນຄວາມປອດໄພໃນເວລາສັນຈອນຕອນກາງຄືນ; ໂດຍໄດ້ຮັບທຶນຊ່ວຍເຫຼືອຈາກອົງການໄຈກ້າ 121,55 ຕື້ກີບ, ໂດຍແມ່ນບໍລິສັດໄຕເຊະຈາກປະເທດຍີ່ປຸ່ນເປັນຜູ້ຮັບເໝົາກໍ່ສ້າງ, ໂດຍສັນຍາ ໃນເບື້ອງຕົ້ນແມ່ນ 29 ເດືອນ ແລະໄດ້  ຕໍ່ສັນຍາຕື່ມອີກ 10 ເດືອນ, ລວມເວລາການກໍ່ສ້າງແມ່ນ 39 ເດືອນ ໂດຍໄດ້ຮັບການໃກ້ຊິດຈາກຄະນະພັກ-ລັດ, ອຳນາດການປົກຄອງ ແລະຜູ້ໃຫ້ທຶນ ແລະໄດ້ຮັບການສະໜັບສະໜູນ, ການ ຮ່ວມໄມ້ຮ່ວມມືຈາກອຳນາດການປົກຄອງທຸກຂັ້ນຕະຫຼອດຮອດພໍ່ແມ່ປະຊາຊົນຢູ່ທ້ອງຖິ່ນກໍຄືແຂວງເຊກອງຈິ່ງເຮັດໃຫ້ການກໍ່ສ້າງສຳເລັດ ແລະໄດ້ເປີດການນໍາໃຊ້ຢ່າງເປັນທາງການ.

     ໂອກາດດັ່ງກ່າວທ່ານ ທາເຄຊິ ຣິຄີ ຮາຣະ ໄດ້ກ່າວມອບໂຄງການກໍ່ສ້າງຂົວ ມິດຕະພາບລາວ-ຍີ່ປຸ່ນແຂວງເຊກອງ ໃຫ້ກັບລັດຖະບານລາວ, ຈາກນັ້ນທ່ານ ບູນຈັນ ສິນທະວົງ ລັດຖະມົນຕີກະຊວງໂຍທາທິການ ແລະຂົນສົ່ງໄດ້ກ່າວຮັບ ແລະມອບຕໍ່ໃຫ້ການນຳພັກ-ລັດ ແລະປະຊາຊົນແຂວງເຊກອງເປັນຜູ້ຄຸ້ມຄອງນຳໃຊ້ ແລະປົກປັກຮັກສາ ແລະທ່ານ ຄຳເຜີຍ ບຸດດາວຽງ ກໍ່ໄດ້ກ່າວຮັບ ແລະສັນຍາວ່າຈາກເງື່ອນໄຂ ແລະທ່າແຮງ ດັ່ງກ່າວແຂວງເຊກອງຈະສຸມທຸກຄວາມ ສາມາດເພື່ອນຳໃຊ້ໃຫ້ເກີດປະໂຫຍດສູງສຸດເພື່ອກະຕຸກຊຸກຍູ້ການພັດທະນາເສດຖະກິດ-ສັງຄົມຂອງແຂວງໃຫ້ມີການພັດທະນາດີຂຶ້ນກວ່າເກົ່າ.

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ

ຜູ້ໃຊ້ເຂົ້າສູ່ລະບົບ

ໄປເທິງສຸດ