ເມືອງທຸລະຄົມຈັດງານບຸນນະມັດສະການພະທາດມາຫຼ້າ

     ໃນວັນທີ 30 ມັງກອນ 2018 ຜ່ານມານີ້ ທີ່ວັດພະທາດມາຫຼ້າ ບ້ານນາຄອງ ເມືອງທຸລະຄົມ ແຂວງວຽງຈັນ ໄດ້ຈັດງານບຸນນະມັດສະການພະທາດມາຫຼ້າ ປະຈຳປີ 2018 ຂຶ້ນ ໂດຍການເຂົ້າຮ່ວມຂອງທ່ານ ຫຼັກຄຳ ບຸດດາພົມມະຫາໄຊ ທີ່ປຶກສາອົງການພຸດທະສາສະໜາແຂວງວຽງຈັນ,

ທ່ານ ພັອ ທອງເຄນ ບຸນໝັ້ນ ຫົວໜ້າກອງບັນຊາການ ປກສ ແຂວງວຽງຈັນ, ທ່ານ ເສດໄຊ ວິໄລໄຟ ເຈົ້າເມືອງໆທຸລະຄົມ ມີບັນດາພະສົງສາມະເນນພາຍເມືອງ, ການນຳຂັ້ນແຂວງ, ຂັ້ນເມືອງພໍ່ແມ່ປະຊາຊົນເຂົ້າຮ່ວມ.

     ທ່ານ ພັອ ທອງເຄນ ບຸນໝັ້ນ ໄດ້ກ່າວວ່າ: ການຈັດງານບຸນນະມັດສະການພະທາດມາຫຼ້າປະຈຳປີ 2018 ນີ້ ກໍ່ເພື່ອປະຕິບັດຕາມຮີດຄອງປະເພນີອັນດີງາມຂອງພີ່ນ້ອງຊາວເມືອງທຸລະຄົມ ທີ່ໄດ້ປະຕິບັດກັນມາແຕ່ບູຮານນະການອີກດ້ານໜຶ່ງກໍ່ເພື່ອ ເປັນການຕ້ອນຮັບປີທ່ອງທ່ຽວລາວ ທັງເປັນການສົມທົບທຶນຮອນໄວ້ບູລະນະພະທາດມາຫຼ້າໃຫ້ສວຍງາມເປັນທີ່ສັກກາລະບູຊາຂອງຊາວພຸດ ໄດ້ຂາບໄຫວ້ສືບທອດຕໍ່ໆໄປ.

     ພະທາດມາຫຼ້າ ເປັນພະທາດໜຶ່ງທີ່ມີຄວາມສວຍງາມ ແລະສັກສິດ ເຊິ່ງບັນພະບູລຸດໄດ້ນຳພາກໍ່ສ້າງໄດ້ຫຼາຍເຊັ່ນຄົນມາແລ້ວ ພ້ອມນີ້ ອົງພະທາດກໍ່ໄດ້ທຳການປະຕິສັງຂອນ ບູລະນະຫຼາຍຄັ້ງ ໂດຍສະເພາະກໍ່ແມ່ນປະຊາຊົນບ້ານນາຄອງ ແລະບ້ານອ້ອມຂ້າງ.

     ງານບຸນນະມັດສະການພະທາດມາຫຼ້າປະຈຳປີ 2018 ນີ້ ແມ່ນໄດ້ຈັດຂຶ້ນເປັນເວລາ 3 ວັນຄື: ວັນທີ 29 ມັງກອນ 2018 ກົງກັບມື້ຂຶ້ນ 13 ຄໍ່າເດືອນ 3 ລາວ ພສ 2560 ເປັນມື້ຫ້າງຫາກະກຽມປະດັບປະດາສະຖານທີ່ໃຫ້ຈົບງາມ, ວັນອັງຄານທີ 30 ມັງກອນ 2018 ກົງກັບມື້ ຂຶ້ນ 14 ຄໍ່າເດືອນ 3 ລາວ ພສ 2560 ຕອນເຊົ້າເຕົ້າໂຮມອອກຕົນຍາດໂຍມກະກຽມເຄື່ອງສັງຄະທານຕ່າງໆຕອນບ່າຍເວລາ 13:00 ໂມງ ສູດປະລິມຸງຄຸນຟັງທຳມະເທສະໜາ ເວລາ 15:00 ໂມງ ມີການກະກຽມຂະບວນແຫ່ຜາສາດເຜິ້ງ ແລະຕົ້ນກັນ ເຂົ້າສູ່ເດີນພະທາດມາຫຼ້າ ຕອນກາງຄືນມີການຄົບງັນ ແລະມ່ວນຊື່ນຕາມປະເພນີ ວັນພຸດ ທີ 31 ມັງກອນ 2018 ກົງກັບມື້ຂຶ້ນ 15 ຄໍ່າເດືອນ 3 ລາວ ພສ 2560 ຕອນເຊົ້າທຳພິທີຕັກບາດຖວາຍສັງ ຄະທານຕ່າງໆ, ຕອນກາງຄືນເວລາ 20:00 ໂມງ ມີການວຽນທຽນ ອ້ອມພະທາດຈູດທູບໄຫວ້ພະ ແລະມີການຄົບງັນມ່ວນຊື່ນ.

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ

ຜູ້ໃຊ້ເຂົ້າສູ່ລະບົບ

ໄປເທິງສຸດ