ອາກອນວຽງຈັນ ເກັບລາຍຮັບໄດ້ລື່ນແຜນ 25,10%

     ສ່ວຍສາອາກອນປະຈຳແຂວງວຽງຈັນ ໃນປີ 2017 ຜ່ານມາສາມາດຈັດເກັບໄດ້ທັງໝົດ 190 ຕື້ກວ່າກີບ ເທົ່າກັບ 125,10% ຂອງແຜນການປີເນື່ອງ ມາຈາກຫຼາຍຂະແໜງການເປັນຕົ້ນບັນດາຫົວໜ່ວຍທຸລະກິດ,

ໂຄງການສ້າງພື້ນຖານໂຄງລ່າງ, ສາຂາໂທລະຄົມ ແລະອື່ນໆທີ່ມີລາຍຮັບໃນການຊ່ວຍຍູ້ໃຫ້ສາມາດປະຕິບັດໄດ້ລື່ນແຜນການຂະນະທີ່ ປີນີ້ຕົວເລກເກັບລາຍຮັບແມ່ນ 175 ຕື້ກວ່າກີບຜ່ານການຈັດເກັບເດືອນກວ່າປະຕິບັດໄດ້ແລ້ວ 10,76% ຂອງແຜນການປີ ແລະເທົ່າກັບ 59,76% ຂອງແຜນ 3 ເດືອນຕົ້ນປີ.

     ທ່ານ ພູເຂົາທອງ ທອງສະຫວັນ ຮອງຫົວໜ້າສ່ວຍສາອາກອນປະຈຳ ແຂວງວຽງຈັນໃຫ້ສຳພາດຕໍ່ໜັງສືພິມເສດຖະກິດ-ສັງຄົມວ່າ: ຄະນະນຳສ່ວຍ ສາອາກອນປະຈຳແຂວງໄດ້ເອົາໃຈໃສ່ ສຶກສາອົບຮົມການເມືອງແນວຄິດໃຫ້ແກ່ສະມາຊິກພັກ-ພະນັກງານທີ່ຢູ່ໃນຄວາມຮັບຜິດຊອບຕົນເປັນປົກກະຕິ, ປັບປຸງທັດສະນະຫຼັກໝັ້ນແບບແຜນການນຳພາ, ວິທີເຮັດວຽກ, ເອົາໃຈໃສ່ບໍລິຫານ ວຽກດ້ວຍຄວາມວ່ອງໄວ, ໂປ່ງໃສ, ຕີຖອຍປາກົດການຫຍໍ້ທໍ້ຕ່າງໆໃນຂະແໜງສ່ວຍສາອາກອນໃຫ້ຫຼຸດລົງເທື່ອລະກ້າວ, ຂຸດຄົ້ນລາຍຮັບເຂົ້າງົບປະມານໃຫ້ຖືກຕ້ອງ, ຄົບຖ້ວນ, ຈຶ່ງສາມາດປະຕິບັດລາຍຮັບໄດ້ຕາມຄາດໝາຍ ແລະລື່ນ ແຜນການທີ່ວາງໄວ້.

     ສະເພາະໃນປີ 2017 ຜ່ານມາແຜນການຈັດຕັ້ງປະຕິບັດການເກັບລາຍຮັບເຂົ້າງົບປະມານຂອງສ່ວຍສາອາກອນປະຈຳແຂວງວຽງຈັນທັງໝົດ 152 ຕື້ກີບ ຜ່ານການຈັດຕັ້ງປະຕິບັດການຈັດ ເກັບຕົວຈິງສາມາດບັນລຸໄດ້ 190 ຕື້ກວ່າກີບ ເທົ່າກັບ 125,10% ຂອງແຜນການປີລື່ນແຜນການ 25,10% ໃນນັ້ນ ອາກອນປົກກະຕິ 152 ຕື້ກວ່າກີບ ເທົ່າກັບ 134,17%, ລາຍຮັບວິຊາການ 23,7 ຕື້ກີບ ເທົ່າກັບ 109%, ທີ່ດິນ 11,77 ຕື້ກີບ ປະຕິບັດໄດ້ 81,20% ແລະລາຍຮັບຈາກຄ່າທຳນຽມປະຕິບັດ ໄດ້ 2,58 ຕື້ກີບ ເທົ່າກັບ 102%.

     ທ່ານ ພູເຂົາທອງ ທອງສະຫວັນ ກ່າວຕື່ມວ່າ: ລາຍຮັບຂອງຂະແໜງ ສ່ວຍສາອາກອນທີ່ປະຕິບັດໄດ້ລື່ນແຜນ ຄືດັ່ງກ່າວນັ້ນແມ່ນເປັນຜົນມາຈາກການເດີນສຳຫຼວດເກັບກຳຂໍ້ມູນຖານລາຍຮັບຄືນໃໝ່, ການເພີ່ມຂຶ້ນຂອງຫົວໜ່ວຍທຸລະກິດ, ໂຄງການກໍ່ສ້າງພື້ນຖານໂຄງລ່າງ, ສາຂາໂທລະຄົມ, ໄຟຟ້າ, ການຂຸດຄົ້ນແຮ່ທາດ, ເຄື່ອນຍ້າຍແຮ່ທາດ, ຫີນຊາຍ, ໂຄງການທາງລົດໄຟ, ໂຄງການຊີມັງໄດ້ຈາກການຄຸ້ມຄອງ ແລະການ ບໍລິການ.

     ສຳລັບປີ 2018 ນີ້ສ່ວຍສາອາກອນປະຈຳແຂວງວຽງຈັນຈະໄດ້ເອົາໃຈໃສ່ ໃນການຈັດເກັບລາຍຮັບໃຫ້ເຂັ້ມງວດ ແລະມີຄວາມໂປ່ງໃສເພື່ອເຮັດໃຫ້ລາຍ ຮັບບັນລຸໄດ້ຕາມແຜນການທີ່ໄດ້ຮັບມອບໝາຍ ຊຶ່ງຕົວເລກຈັດເກັບລາຍຮັບ ທັງໝົດຂອງປີນີ້ 175 ຕື້ກວ່າກີບ ໃນນັ້ນອາກອນປົກກະຕິ 138 ຕື້ກວ່າກີບ, ຄ່າທຳນຽມ 3 ຕື້ກີບ, ວິຊາການ 23 ຕື້ກວ່າກີບ ແລະລາຍຮັບຈາກທີ່ດິນ 11 ຕື້ກວ່າກີບ, ໂດຍຜ່ານການຈັດຕັ້ງປະຕິບັດການຈັດເກັບລາຍຮັບໃນເດືອນກວ່າຜ່ານມາສາມາດເກັບໄດ້ທັງໝົດ 18,92 ຕື້ກີບ ເທົ່າກັບ 59,76% ຂອງແຜນ 3 ເດືອນຕົ້ນປີ ແລະເທົ່າກັບ 10,76% ຂອງແຜນການໝົດປີ ຄາດວ່າໝົດປີນີ້ ຈະສາມາດເກັບລາຍຮັບໄດ້ລື່ນແຜນ ການປະມານ 5%.

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ

ຜູ້ໃຊ້ເຂົ້າສູ່ລະບົບ

ໄປເທິງສຸດ