ສຳມະນາວິທະຍາສາດບັ້ນຮົບປົດປ່ອຍຜາຖີ່ ຄົບຮຮອບ 50 ປີ

     ກອງປະຊຸມສຳມະນາວິທະຍາສາດເພື່ອລະນຶກບັ້ນຮົບປົດປ່ອຍຜາຖີ່ຄົບຮອບ 50 ປີ ໄດ້ດຳເນີນມາເປັນເວລາ 1 ວັນໄດ້ສຳເລັດລົງຕອນແລງວັນທີ 9 ມີນານີ້ ທີ່ຖ້ຳຊ້າງລອດເຂດທີ່ໝັ້ນຂອງ ການປະຕິບັດເມືອງວຽງໄຊ ແຂວງຫົວ ພັນດ້ວຍບັນຍາກາດຄຶກຄຶ້ນ, ມີຄວາມ ໝາຍອັນເລິກເຊິ່ງ ແລະມີຜົນສຳເລັດອັນຈົບງາມ.

 

     ໃນເວລາດຳເນີນກອງປະຊຸມບັນດາສະຫາຍນັກສຳມະນາກອນ ແລະພະຍານ ປະຫັວດສາດ ໄດ້ສຸມສະຕິປັນຍາ ແລະມີຄວາມຮັບຜິດຊອບສູງ ພ້ອມກັນຄົ້ນ ຄ້ວາປະກອບຄຳຄິດຄຳເຫັນຕໍ່ບັນດາ ເນື້ອໃນເອກະສານຈຳນວນ 15 ບົດທີ່ ໄດ້ສະເໜີຕໍ່ກອງປະຊຸມ ດັ່ງກ່າວຊຶ່ງໄດ້ສ່ອງແສງເຖິງມູນເຊື້ອແລະຜົນງານການຕໍ່ສູ້ຢ່າງພິລະອາດຫານຂອງກອງ ທັບແລະປະຊາຊົນບັນດາເຜົ່າຊາວແຂວງຫົວພັນ.

     ກອງປະຊຸມວິທະຍາສາດບັ້ນຮົບປົດປ່ອຍຜາຖີ່ຄັ້ງນີ້ແມ່ນເປັນການຫວນຄືນນ້ຳໃຈອົງອາດກ້າຫານ ຕໍ່ສູ້ບໍ່ຍອມຈຳນົນຂອງກອງທັບ ແລະປະຊາຊົນບັນດາເຜົ່າແຂວງຫົວພັນ ທັງເປັນການປະກອບສ່ວນປຸກລະດົມຈິດໃຈຄຽດແຄ້ນ ຕໍ່ໂທດກຳຂອງພວກສັດຕູ. ປຸກລະດົມນ້ຳໃຈຮັກຊາດອັນສຸງສົ່ງ ທີ່ມີຄວາມໝາຍອັນສຳຄັນເຂົ້າໃນການສຶກສາອົບຮົມໃຫ້ແກ່ພະນັກງານ, ທະຫານ, ຕຳຫຼວດ ແລະປະຊາຊົນບັນດາເຜົ່າແຂວງ ຫົວພັນ ເປັນຕົ້ນແມ່ນຄົນລຸ້ນໜຸ່ມທີ່ເປັນໜໍ່ແໜງກຳລັງແຮງຂອງຊາດ ເຫັນໂທດ ກຳຂອງສັດຕູ ແລະ ຜົນງານອັນລ້ຳເລີດໃນການສູ້ຮົບ, ຄວາມອົງອາດກ້າຫານເດັດດ່ຽວ, ເດັດຂາດຂອງກອງທັບ ແລະປະຊາຊົນແຂວງຫົວພັນ.

     ບັນດາຄຳຄິດເຫັນທີ່ນັກສຳມະນາກອນ ແລະພະຍານປະຫວັດສາດ ສະເໜີມານັ້ນແມ່ນໄດ້ປະກອບສ່ວນອັນໃຫຍ່ຫຼວງ ແລະເປັນຂໍ້ມູນທີ່ເດັ່ນຊັດ, ທ່ີໄດ້ ສັງລວມມາຈາກເຫດການຕົວຈິງ ແລະວິທະຍາສາດທີ່ສຸດໃນການໝູນໃຊ້ຍຸດທະບັ້ນຮົບ ຍຸດທະວິທີເຂົ້າໃນການສູ້ຮົບຕົວຈິງ.

     ໃນໂອກາດກອງປະຊຸມສຳມະນາຄັ້ງນີ້ ທ່ານພົນໂທ ຈັນສະໝອນ ຈັນຍາລາດ ກຳມະການກົມການເມືອງສູນກາງພັກລັດຖະມົນຕີກະຊວງປ້ອງກັນປະເທດໄດ້ ມີຄຳໂອ້ລົມກອງປະຊຸມດັ່ງກ່າວ ເຊິ່ງທ່ານໄດ້ຍົກໃຫ້ເຫັນຫຼາຍບັນຫາທີ່ສຳຄັນເປັນຕົ້ນ ໄຊຊະນະບັ້ນຮົບປົດປ່ອຍຜາຖີ່ ແມ່ນການເສີມຂະຫຍາຍມູນເຊື້ອຮັກຊາດນ້ຳໃຈສູ້ຮົບພິລະອາດຫານຕໍ່ສູ້ບໍ່ຍອມຈຳນົນຂອງກອງທັບ ແລະປະຊາຊົນລາວບັນດາເຜົ່າເວົ້າສະເພາະແມ່ນປະຊາຊົນແຂວງຫົວພັນວິລະຊົນ. ພາຍໃຕ້ການນຳພາຂອງພັກປະຊາຊົນປະຕິບັດລາວແມ່ນໄຊຊະນະແຫ່ງການນຳໃຊ້ຍຸດທະສາດ-ຍຸດໂທບາຍຢ່າງຖຶກ ຕ້ອງສະຫຼາດສ່ອງໃສຂອງພັກ ແມ່ນໄຊ ຊະນະແຫ່ງຄວາມສາມັກຄີຮ່ວມສຳພັນສູ້ຮົບແບບພິເສດລະຫວ່າງສອງພັກ, ຂອງກອງທັບປະຊາຊົນສອງຊາດລາວ-ຫຽດນາມອ້າຍນ້ອງ.

     ເຂົ້າຮ່ວມກອງປະຊຸມໃນຄັ້ງນີ້ມີບັນດາທ່ານລັດຖະມົນຕີ, ຮອງລັດຖະມົນຕີກະຊວງປ້ອງກັນປະເທດ ແລະກະຊວງຕ່າງໆອ້ອມຂ້າງສູນກາງພະນັກງານປະຕິວັດອາວຸໂສນັກຮົບແຂ່ງຂັນວິລະຊົນ ແຫ່ງຊາດບັນດາສະຫາຍທີ່ມາຈາກສູນກາງ ຜູ້ແທນມາຈາກແຂວງຕ່າງໆທົ່ວປະເທດອະດີດຊ່ຽວຊານທະຫານອາ ສາສະໝັກຫວຽດນາມ ນັກສຳມະນາກອນຕ່າງໆຈາກສູນກາງ ແລະແຂວງ ເຂົ້າຮ່ວມນຳ.

 

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ

ຜູ້ໃຊ້ເຂົ້າສູ່ລະບົບ

ໄປເທິງສຸດ