ເອກະຊົນລົງທຶນ 4 ຮ້ອຍລ້ານກວ່າກີບ ສ້າງສວນອາຫານຊິວກາເດັນ

     ວັນທີ 8 ມີນາ 2018 ທີ່ແຫຼ່ງທ່ອງທ່ຽວທຳມະຊາດດອນນ້ຳຄານຫາດຫ້ວຍສາ ບ້ານສວນຫຼວງ ເມືອງຊຽງເງິນ, ຄະນະຜູ້ປະກອບການທຸລະກິດບໍລິການສວນອາຫານ “ຊີວກາເດັນ” ຜູ້ສຳປະທານ,

ໄດ້ຈັດພິທີເປີດບໍລິການຢ່າງເປັນທາງການ ພາຍຫຼັງສຳເລັດການພັດທະນາດ້ວຍການລົງທຶນຂອງພາກເອກະຊົນ 400 ລ້ານກວ່າກີບ ແລະທົດລອງບໍລິການມາໄດ້ໄລຍະໜື່ງ, ໂດຍເປັນກຽດເຂົ້າຮ່ວມຂອງ ທ່ານ ວົງສະຫວັນ ເທບພະຈັນ ຮອງເຈົ້າແຂວງຫຼວງພະບາງ, ທ່ານ ສາຍສະໝອນ ທິດາກອນ ເຈົ້າເມືອງຊຽງເງິນ ແລະທ່ານນາງ ວຽນວິໄລ ດີລະພັນ ປະທານສະຫະພັນແມ່ຍິງແຂວງຫຼວງພະບາງ, ພ້ອມດ້ວຍແຂກຕະຫຼອດເຖິງນັກທ່ອງທ່ຽວເຂົ້າຮ່ວມຢ່າງຫຼວງຫຼາຍ.

     ທ່ານ ນາງ ບົວວັນ ພົງສະຫວັດ ຕາງໜ້າຜູ້ປະກອບການສວນອາຫານຊີວກາເດັນ ກ່າວວ່າ: ສວນອາຫານ “ຊີວກາເດັນ” ຕັ້ງຢູ່ແຄມທາງເລກ 13 ເໜືອເຂດບ້ານສວນຫຼວງ, ມີສະຖານທີ່ຈອດລົດກວ້າງຂວາງ ແລະປອດໄພ, ມີຮູບແບບການບໍລິການຂາຍອາຫານ-ເຄື່ອງດື່ມ, ພ້ອມທັງຮັບຈັດອາຫານງານລ້ຽງຕ່າງໆ, ມີຕູບພັກຜ່ອນຊົມທຳມະຊາດແມ່ນ້ຳຄານຈຳນວນ 65 ຫຼັງ, ສາມາດຮອງຮັບແຂກໄດ້ 700 ກວ່າຄົນ, ມີສະຖານທີ່ລອຍນ້ຳທຳມະຊາດ ນ້ຳຄານທີ່ໃສເຢັນດີ, ໃຫ້ບໍລິການລູກຄ້າເລີ່ມແຕ່ເວລາ 8 ໂມງຫາເວລາ 18 ໂມງຂອງທຸກວັນ, ມີໄລຍະສຳປະທານຕາມສັນຍາ 30 ປີ.

     ໂອກາດດຽວກັນ ທ່ານ ສາຍສະໝອນ ທິດາກອນ ເຈົ້າເມືອງຊຽງເງິນ, ໄດ້ເປັນກຽດຂຶ້ນກ່າວເປີດບໍລິການສວນອາຫານ “ຊີວກາເດັນ” ຢ່າງເປັນທາງການ, ໂດຍໄດ້ຮຽກຮ້ອງໃຫ້ຜູ້ປະກອບການທຸລະກິດສວນອາຫານຊີວກາເດັນ, ຕັ້ງໜ້າພັດທະນາການບໍລິການໃຫ້ດີ-ສ້າງຄວາມພໍໃຈແກ່ລູກຄ້າ ເພື່ອດຶງດູດນັກທ່ອງທ່ຽວທັງພາຍໃນແລະຕ່າງປະເທດ ໃຫ້ເຂົ້າມາທ່ຽວເມືອງຊຽງເງິນນັບມື້ຫຼາຍຂຶ້ນ.

     ຈາກນັ້ນ ຄະນະປະທານໄດ້ຮ່ວມກັນຕັດແຖບຜ້າປ່ອຍໝາກປຸມເປົ້າ, ເພື່ອເປັນສັນຍາລັກໃຫ້ແກ່ການເປີດບໍລິການແຫຼ່ງທ່ອງທ່ຽວສວນອາຫານ “ຊີວກາເດັນ” ຢ່າງເປັນທາງການ, ພ້ອມທັງຮ່ວມຊົມກິລາຊ່ວງເຮືອເພດຍິງເນື່ອງໃນໂອກາດ ສະເຫຼີມສະຫຼອງວັນແມ່ຍິງສາກົນ ຄົບຮອບ 108 ປີ, ດ້ວຍບັນຍາກາດຝົດຟື້ນມ່ວນຊື່ນ.

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ

ຜູ້ໃຊ້ເຂົ້າສູ່ລະບົບ

ໄປເທິງສຸດ