ສສງ ຫົວແຊຈະເລີນ ສະຫຼຸບວຽກງານປະຈຳປີ

     ໃນປີ 2017 ຜ່ານມາສະຫະກອນສິນເຊື່ອ ແລະເງິນຝາກປະຢັດຫົວ ແຊຈະເລີນ ໄດ້ມີຜົນສໍາເລັດໃນການປະກອບທຸລະກິດຢ່າງໜ້າເພິ່ງພໍໃຈ ສາມາດ ສ້າງຜົນກໍາໄລສູງເຖິງ 1.589 ລ້ານກີບ ພ້ອມຕັ້ງເປົ້າປີນີ້ຈະສູ້ຊົນເຮັດໃຫ້ຜົນກໍາໄລໃຫ້ເພີ່ມຂຶ້ນໃນລະດັບ 20%.

 

     ກອງປະຊຸມສະຫຼຸບຜົນການເຄື່ອນໄຫວປະຈໍາປີ 2017 ແລະທິດທາງແຜນ ການປີ 2018 ຂອງສະຫະກອນສິນເຊື່ອ ແລະເງິນຝາກປະຢັດຫົວແຊຈະເລີນ ສສງ, ໄດ້ມີຂຶ້ນໃນວັນທີ 9 ມີນາ 2018 ທີ່ບ້ານໜອງນໍ້າຂາວ ເມືອງບາຈຽງຈະເລີນສຸກ ແຂວງຈໍາປາສັກ, ໃຫ້ກຽດເຂົ້າຮ່ວມຂອງທ່ານ ໂສມ ບຸດຕະ ກຸນ ເຈົ້າເມືອງໆບາຈຽງຈະເລີນສຸກ, ມີບັນດາທ່ານແຂກຜູ້ທີ່ກ່ຽວຂ້ອງ, ທ່ານປະທານສະຫະກອນ, ພ້ອມດ້ວຍພະນັກງານ, ວິຊາການຕະຫຼອດຮອດສະມາຊິກ ເຂົ້າຮ່ວມຢ່າງພ້ອມພຽງ.

     ໃນກອງປະຊຸມທ່ານ ຫຸມພັນ ອິນທະວົງ ປະທານສະຫະກອນສິນເຊື່ອ ແລະເງິນຝາກປະຢັດຫົວແຊຈະເລີນໄດ້ກ່າວວ່າ: ໃນປີ 2017 ຜ່ານມາ ສສງ ໄດ້ເອົາໃຈໃສ່ໃນການເຄື່ອນໄຫວວຽກງານຕາມທິດທາງນະໂຍບາຍຂອງພັກ-ລັດວາງອອກ, ໃນນັ້ນແມ່ນໄດ້ສຸມໃສ່ສອງວຽກງານໃຫຍ່ເປັນຕົ້ນຕໍຄື: ໜຶ່ງວຽກງານລະດົມທຶນສສງມີແຫຼ່ງທຶນຕົ້ນຕໍສອງແຫລ່ງຄື: ທຶນຮຸ້ນຂອງສະມາຊິກ ແລະເງິນຝາກ, ຮອດທ້າຍປີ 2017 ມີແຫຼ່ງທຶນຮຸ້ນຂອງສະມາຊິກຈໍານວນ 2,6 ຕື້ກີບ, ເທົ່າກັບ 2,68 ແສນຮຸ້ນ, ທຽບໃສປີ 2016 ເພີ່ມຂຶ້ນ 25%, ທຽບ ໃສ່ແຜນການປະຕິບັດໄດ້ລື່ນແຜນ 7%, ໃນນັ້ນຈໍານວນສະມາຊິກເພີ່ມຈາກ 1,5 ພັນຄົນມາເປັນ 1,5 ພັນຄົນ, ສໍາລັບແຫຼ່ງ ທຶນເງິນຝາກ ສສງ ໄດ້ລົງເຄື່ອນໄຫວລະດົມທຶນຈາກສະມາຊິກໃໝ່ກຸ່ມເປົ້າໝາຍ ເພື່ອເພີ່ມຍອດເງິນຝາກດ້ວຍຫລາຍຮູບການເຊັ່ນ: ແຈກຢາຍແຜນໂຄສະນາ, ລົງໂຄສະນາຕາມກົມກອງ ແລະຈຸດຊຸມຊົນ ຕ່າງໆ ມາຮອດປະຈຸບັນມີສະມາຊິກຝາກເງິນລວມທັງໝົດ 9,5 ຕື້ກີບ, ທຽບໃສປີ 2016 ເພີ່ມຂຶ້ນ 33% ຊຶ່ງຖືວ່າປະຕິບັດໄດ້ລື່ນແຜນການ 4%.

     ນອກຈາກນີ້ ສສງ ແມ່ນໄດ້ເອົາໃຈໃສ່ໃນການສະໜອງສິນເຊື່ອໃຫ້ສະມາຊິກ ແລະລູກຄ້າເປົ້າໝາຍ ເປັນກຸ່ມຢູ່ເຂດຊຸມຊົນ, ສາມາດສະໜອງແຫລ່ງທຶນໄປຕາມຄວາມຕ້ອງການຂອງສະມາຊິກ ຜູ້ທີ່ບໍ່ສາມາດເຂົ້າເຖິງແຫຼ່ງທຶນທະນາຄານທຸລະກິດ, ຊຶ່ງຮອດທ້າຍປີ 2017 ຍອດສິນເຊື່ອປ່ອຍໃຫ້ປະຊາຊົນກູ້ຢຶມທັງ ໝົດຈໍານວນ 10,17 ຕື້ກີບ, ທຽບໃສ່ປີ 2016 ເພີ່ມຂຶ້ນ 22%, ຖ້າທຽບໃສ່ແຜນການແມ່ນປະຕິບັດໄດ້ຕາມແຜນທີ່ວາງໄວ້ ແລະມາຮອດທ້າຍປີ 2017 ສສງມີກໍາໄລຈາກການດໍາເນີນທຸລະກິດທັງ ໝົດ 1,5 ຕື້ກີບ, ທຽບໃສປີ 2016 ເພີ່ມ ຂຶ້ນ 55%.

ໃນກອງປະຊຸມສະຫຼຸບປະຈໍາປີດັ່ງກ່າວທາງ ສສງ ຍັງໄດ້ມີການຈົກສະຫຼາກມອບຂອງລາງວັນໃຫ້ກັບສະມາຊິກ, ໃນນັ້ນມີພັດລົມ 10 ໜ່ວຍ, ໂທລະພາບ 3 ໜ່ວຍ ແລະຕູ້ເຢັນອີກ 1 ໜ່ວຍ, ໃຫ້ກຽດມອບລາງວັນໃຫຍ່ໂດຍ ທ່ານ ໂສມ ບຸດຕະຄຸນ ເຈົ້າເມືອງໆບາຈຽງຈະເລີນສຸກ.

 

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ

ຜູ້ໃຊ້ເຂົ້າສູ່ລະບົບ

ໄປເທິງສຸດ