ນາເດຍຟາມ ສວນສັດແຫ່ງທີ 2 ຂອງປະເທດ

     ເພື່ອເປັນການ ຕ້ອນຮັບປີທ່ອງທ່ຽວລາວ 2018 ແລະທັງເປັນການເພີ່ມສີສັນໃໝ່ໃຫ້ກັບແຫຼ່ງທ່ອງທ່ຽວໃນລາວ ນັ້ນກໍຄືຂອງນະຄອນຫຼວງວຽງ ຈັນ (ນວ), ນາເດຍຟາມໄດ້ທຸ່ມທຶນພັດທະນາເນື້ອທີ່ດິນຈຳນວນ 15 ເຮັກຕາ ເພື່ອສ້າງເປັນ ສວນສັດແຫ່ງທຳອິດຂອງ ນວ ແລະເປັນແຫ່ງທີ 2 ຂອງປະເທດໄປຄຽງຄູ່ກັບການສົ່ງເສີມ ແລະອະນຸລັກທຳມະຊາດ.

 

     ທ່ານ ຄຳພັດ ບູລົມ ຜູ້ອຳນວຍການນາເດຍຟາມ ໃຫ້ສຳພາດເມື່ອບໍ່ດົນມາ ນີ້ວ່າ: ນາເດຍຟາມນັບວ່າເປັນຟາມແຫ່ງ ຫຼ້າສຸດຂອງນະຄອນຫຼວງວຽງຈັນ ທີ່ຫາ ກໍເປີດໃຫ້ບໍລິການພຽງແຕ່ 3 ເດືອນ, ພາຍຫຼັງທີ່ໄດ້ໃຊ້ເວລາໃນການບຸກເບີກ ແລະກໍ່ສ້າງທັງໝົດ 13 ເດືອນ ເພື່ອພັດ ທະນາສວນດັ່ງກ່າວໃນຈຳນວນເນື້ອທີ່ທັງໝົດ 15 ເຮັກຕາ, ໃຫ້ກາຍເປັນຟາມ ລ້ຽງສັດ ແລະການອະນຸລັກສັດທີ່ຫາ ຍາກ, ຂະຫຍາຍພັນເພື່ອຈຳໜ່າຍ, ທີ່ມີ ຫຼາກຫຼາຍຊະນິດ ແລະຫຼາກຫຼາຍສາຍພັນສັດ, ຊຶ່ງຖືເປັນສວນສັດແຫ່ງທຳອິດ ຂອງ ນວ ແລະເປັນແຫ່ງທີ 2 ຂອງປະ ເທດ, ທັງນີ້ກໍເພື່ອກະຕຸ້ນການທ່ອງທ່ຽວ ຂອງນະຄອນຫຼວງ ກໍຄືຂອງປະເທດ ລາວ, ພ້ອມທັງເປັນບ່ອນສ້າງລາຍຮັບ ເພີ່ມໃຫ້ແກ່ຊຸມຊົນ ແລະສ້າງເປັນສູນ ຮຽນຮູ້ທາງດ້ານວິຊາຊີບໃຫ້ກັບແຂກທີ່ມາທ່ຽວຊົມອີກດ້ວຍ.

     ນາເດຍຟາມ ເປັນແຫຼ່ງທ່ອງທ່ຽວໃນລັກສະນະການອະນຸລັກ ທີ່ໃຫ້ບໍລິການຫຼາກຫຼາຍຮູບແບບ ໂດຍສະເພາະປູກພືດ ຜັກສວນຄົວໃນການສະໜອງໃຫ້ແກ່ ຮ້ານອາຫານໃນຟາມ ແລະການປູກ ຫຍ້າເພື່ອລ້ຽງສັດ, ພ້ອມນັ້ນຍັງມີການລ້ຽງສັດຫຼາກຫຼາຍຢ່າງເພື່ອອະນຸລັກ ເປັນຕົ້ນແມ່ນ ກວາງ, ນົກກະຈອກເທດ, ແຂ້, ແກະ, ກະຕ່າຍ, ມ້າ ແລະສັດທີ່ ໃຊ້ເຂົ້າໃນການບໍລິໂພກຄື: ໝູ, ປາ, ໄກ່ ແລະເປັດ, ນອກນັ້ນ ພາຍໃນຟາມຍັງມີ ການບໍລິການຕູບຈຳນວນ 50 ຕູບ ແລະຫ້ອງສຳມະນາ ທີ່ສາມາດຮອງຮັບໄດ້ ເຖິງ 300 ຄົນ, ຮັບຈັດງານລ້ຽງງານ ສັງສັນຕ່າງໆ, ມີຈຸດຖ່າຍຮູບເຊັ່ນ: ລົດເກົ່າ, ຍົນ ແລະອື່ນໆຕື່ມ.

     ທ່ານ ຄຳພັດ ບູລົມ ໃຫ້ຮູ້ອີກວ່າ: ເພື່ອເຮັດໃຫ້ນາເດຍຟາມ ກາຍເປັນເປັນໃບໜ້າໃໝ່ຂອງ ນວ ແລະເປັນທາງເລືອກໃໝ່ແກ່ການພັກຜ່ອນຂອງແຂກ ທັງພາຍໃນ ແລະຕ່າງປະເທດທີ່ຈະເຂົ້າ ມາຢ້ຽມຢາມ ສປປ ລາວ, ນາເດຍຟາມ ຍັງຈະສືບຕໍ່ພັດທະນາ ແລະປັບປຸງຫຼາຍຈຸດຕື່ມເຊັ່ນ: ເພີ່ມສະລອຍນ້ຳ ແລະການ ປັບປຸງຈຸດຕ່າງໆ ເພື່ອໃຫ້ອຳນວຍຄວາມສະດວກແກ່ແຂກທີ່ມາທ່ຽວຊົມ, ສຳລັບຄ່າປະຕູໃນການເຂົ້າມາທ່ຽວຊົມແມ່ນ 17 ພັນກີບສະເພາະຜູ້ໃຫຍ່ ແລະ 10 ພັນກີບ ສຳລັບເດັກນ້ອຍ, ຊຶ່ງໃນປີ້ເຂົ້າ ຊົມນັ້ນຈະປະກອບມີ 3 ສ່ວນຄື: ຜ່ານປະຕູ, ສາມາດນຳໄປແລກເອົາອາຫານສັດ ແລະອີກສ່ວນໜຶ່ງເກັບສະສົມໄວ້ຄົບ 5 ປີ້ ສາມາດແລກເຂົ້າຊົມສວນໄດ້ອີກ 1 ປີ້, ນອກນັ້ນ ໃນຈຳນວນມູນຄ່າຂອງປີ້ ຍັງສາມາດເຂົ້າຊົມໄດ້ຫຼາຍໆບ່ອນເປັນຕົ້ນ ເບິ່ງເຮືອນຊົງລາວ, ຜະລິດຕະພັນຕ່າງໆ ລວມທັງທົດລອງຄົກຕຳເຂົ້າ, ລອງຕໍ່າຫູກ, ຫຼີ້ນເຄື່ອງຫຼີ້ນ ແລະຮ່ວມກິດຈະກຳຕ່າງໆພາຍໃນສວນອີກດ້ວຍ, ໂດຍສວນດັ່ງກ່າວ ຕັ້ງຢູ່ບ້ານນາຄູນນ້ອຍ ເມືອງນາຊາຍທອງ ນະຄອນຫຼວງວຽງຈັນ.    

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ

ຜູ້ໃຊ້ເຂົ້າສູ່ລະບົບ

ໄປເທິງສຸດ