ສະບຽງອາຫານ ນວ ຮັບປະກັນດ້ານສະໜອງຊີ້ນປີໃໝ່

     ອີກບໍ່ເທົ່າໃດມື້ກໍ່ເຖິງໄລຍະປີໃໝ່ລາວຖືເປັນເທດສະການໜຶ່ງທີ່ໃຫຍ່ ແລະສືບທອດ ກັນມາແຕ່ລະປີກໍ່ໄດ້ມີການສະເຫຼີມສະຫຼອງກັນດ້ວຍບັນຍາກາດຄຶກຄື້ນມ່ວນຊື່ນຫຼາຍກຸ່ມຄົນກໍ່ມີການພົບປະສ້າງສັນຊຸມແຊວ

ແຕ່ເຮັດໃຫ້ພໍ່ແມ່ປະຊາຊົນຈຳນວນຫຼາຍເປັນຫວ່ງລາຄ້າສິນຄ້າຕາມທ້ອງຕະຫຼາດໂດຍສະເພາະແມ່ນປະເພດຊີ້ນຢ້ານມີແມ່ຄ້າຈຳນວນໜຶ່ງສວຍໂອກາດຂຶ້ນລາຄາ ຊຶ່ງຕໍ່ບັນຫານີ້ທາງບໍລິສັດວິສາຫະກິດສະບຽງອາຫານ ນະຄອນຫຼວງວຽງຈັນຢືນຢັນຈະບໍ່ມີການຂຶ້ນລາຄາ ຊີ້ນທຸກປະເພດ ແລະມີການຮອງຮັບໄວ້ຕະຫຼາດພຽງພໍ ພ້ອມເນັ້ນຊີ້ນທີ່ຮັບປະກັນຄຸນນະພາບໃຫ້ສັງຄົມບໍລິໂພກ.

     ທ່ານຄຳຫຼ້າ ແສງດາລາ ຜູ້ອຳນວຍການລັດວິສາຫະກິດສະບຽງອາຫານ ນະຄອນຫຼວງວຽງຈັນ ໃຫ້ສຳພາດທີມຂ່າວເສດຖະກິດ-ສັງຄົມວ່າ: ບຸນປີໃໝ່ລາວທາງໂຮງງານຂ້າສັດດອນດູ່ໄດ້ມີການກະກຽມຄວາມພ້ອມທຸກດ້ານເປັນຕົ້ນແຮງງານ ແລະສັດ ໂດຍສະເພາະປະເພດຊີ້ນໝູ, ງົວ ແລະຄວາຍເພື່ອສະໜອງໃຫ້ແມ່ຄ້າຊາວ ຂາຍຊີ້ນຕາມທ້ອງຕະຫຼາດພາຍໃນນະ ຄອນຫຼວງວຽງຈັນພຽງພໍກັບຄວາມຕ້ອງ ການຂອງຜູ້ບໍ່ລິໂພກ ພິເສດແມ່ນເພື່ອປະກອບສ່ວນເຮັດໃຫ້ປີທ່ອງທ່ຽວລາວມີບັນຍາກາດຄຶກຄັກ.

     ສຳລັບການຕອບສະໜອງສະບຽງອາ ຫານໃຫ້ພໍ່ແມ່ປະຊາຊົນ ໃນຊວງໄລຍະປີໃໝ່ທາງໂຮງງານແມ່ນຂ້າສະໜອງໃຫ້ ກັບຕະຫຼາດໝູ 200 ໂຕ ສ່ວນງົວ ແລະ ຄວາຍປະມານ 20-30 ໂຕຕໍ່ມື້ ສ່ວນລາຄາແມ່ນຮັກສາໃຫ້ຢູ່ລະດັບປົກກະຕິ ແລະຈະບໍ່ມີການຂຶ້ນເດັດຂາດໃນຊ່ວງໄລຍະບຸນປີໃໝ່ ຍົກເວັ້ນແມ່ຄ້າບາງຈຳນວນ ອາດຈະສວຍໂອກາດຂຶ້ນລາຄາໃນຊວງນັ້ນ ແຕ່ຜູ້ບໍລິໂພກແມ່ນມີທາງເລືອກ ໂດຍສາມາດໄປຊື້ຊີ້ນໄດ້ຢູ່ຕາມຮ້ານຄ້າ ທົ່ວໄປທີ່ໂຮງງານຮອງຮັບໄວ້ເປັນຈຳ ນວນຫຼາຍ.

     ທ່ານ ຄຳຫຼ້າ ແສງດາລາ ໃຫ້ຮູ້ຕື່ມວ່າ: ສຳລັບການຊື້ຂາຍໄລຍະປີໃໝ່ແທ້ຄວາມ ຕ້ອງການອາດແມ່ນມີຈຳນວນຫຼຸດລົງ 20 ຫາ 30 % ແຕ່ກ່ອນປີໃໝ່ ແລະຫຼັງປີໃໝ່ ທິດໜຶ່ງຄວາມຕ້ອງການບໍລິໂພກຊີ້ນອາດ ເພີ່ມຂຶ້ນເໝືອນກັບທຸກປີຜ່ານມາ.

     ຂະນະທີ່ປະຈຸບັນທາງ ໂຮງງານຂ້າ ສັດດອນດູ່ ໄດ້ມີການປັບປຸງຫຼາຍຢ່າງໂດຍສະເພາະໄດ້ນຳເຄື່ອງຈັກທີ່ທັນສະໄໝຮັກສາໄດ້ຄວາມສະອາດ ສາມາດຂ້າສັດມື້ໜຶ່ງໄດ້ເພີ່ມຂຶ້ນເຖິງ 100-200 ໂຕເພື່ອເຮັດໃຫ້ການສະໜອງຊີ້ນທັນກັບຄວາມຕ້ອງການຂອງຜູ້ບໍລິໂພກໃນແຕ່ລະມື້ ໂດຍໂຮງງານດອນດູ່ນອກຈາກ ຂ້າສັດເພື່ອສະໜອງແກ່ແມ່ຄ້າຈຳໜ່າຍ ໃຫ້ພໍ່ແມ່ປະຊາຊົນໄດ້ບໍລິໂພກແລ້ວ ຍັງຮັບບໍລິການຂ້າສັດທົ່ວໄປ, ສະນັ້ນຫາກ ພາກສ່ວນໃດທີ່ມີຄວາມຕ້ອງການກໍ່ສາມາດເຂົ້າພົວພັນ ຊຶ່ງຫ້ອງການໃຫຍ່ ຕັ້ງຢູ່ຖະໜົນສາມແສນໄທ ບ້ານສີຫອມ ຫຼື ຈະມາພົວພັນທີ່ໂຮງງານບ້ານດອນດູ່ເມືອງ ຫາດຊາຍຟອງ ນະຄອນຫຼວງວຽງຈັນ.

 

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ

ຜູ້ໃຊ້ເຂົ້າສູ່ລະບົບ

ໄປເທິງສຸດ