ມອບ-ຮັບສິ່ງເສດເຫຼືອທະຫານອາເມລິກາເສຍຊີວິດປາງສົງຄາມ

     ວັນທີ 9 ເມສາ 2018, ທີ່ສະໜາມບິນສາກົນປາກເຊ, ແຂວງຈໍາປາສັກ ໄດ້ມີການຈັດພິທີມອບ-ຮັບສິ່ງເສດເຫຼືອຂອງທະຫານອາເມລິກາທີ່ໄດ້ເສຍຊິີວິດໃນປາງສົງຄາມຢູ່ລາວທີ່ໄດ້ຄົ້ນພົບຈາກການປະຕິບັດງານຮ່ວມໃນພາກ ສະໜາມລະຫວ່າງລາວ-ອາເມລິກາຄັ້ງ ທີ 2 ແລະ 3 ປະຈໍາສົກປີ 2017-2018 ຢູ່ເຂດແຂວງຄໍາ ມ່ວນ.

 

     ເປັນກຽດເຂົ້າຮ່ວມໃນພິທີມອບ-ຮັບໃນຄັ້ງນີ້, ກ່າວມອບຕາງໜ້າໃຫ້ແກ່ລັດຖະບານແຫ່ງ ສປປ ລາວ, ໂດຍແມ່ນທ່ານ ແສງເພັດ ຮຸ່ງບຸນຍວງ, ຮອງລັດຖະມົນຕີກະຊວງການຕ່າງປະເທດ, ຜູ້ຊີ້ນຳວຽກງານ MIA ແລະຕາງໜ້າກ່າວຮັບໃຫ້ແກ່ລັດຖະບານແຫ່ງສະຫະລັດອາເມລິກາ, ໂດຍແມ່ນທ່ານ Michael FanklinKleine, ອຸປະທູດແຫ່ງສະຫະລັດອາເມລິກາປະຈຳ ສປປ ລາວ ໂດຍຊ້ອງໜ້າການເຂົ້າຮ່ວມເປັນສັກຂີພະຍານຂອງພາກສ່ວນທີ່ກ່ຽວຂ້ອງທັງ ສອງຝ່າຍ.

     ໂດຍສືບຕໍ່ປະຕິບັດນະໂຍບາຍມະນຸດ ສະທຳອັນສະເໝີຕົ້ນສະເໝີປາຍຂອງລັດຖະບານແຫ່ງ ສປປ ລາວ ທີ່ມີຕໍ່ຄອບຄົວ ກໍ່ຄືຍາດພີ່ນ້ອງຂອງທະຫານອາເມລິກາ ຜູ້ຫາຍສາບສູນໃນປາງສົງຄາມຢູ່ລາວ ແລະອີງຕາມການຮ້ອງຂໍຂອງລັດຖະບານອາເມລິກາໃນການແກ້ໄຂບັນຫາ ດັ່ງກ່າວ, ຕະຫຼອດໄລຍະເວລາ 30 ກວ່າປີ ແຫ່ງການຮ່ວມມືສອງຝ່າຍລາວ-ອາເມລິກາໃນການດໍາເນີນການສໍາຫຼວດ ແລະຂຸດຄົ້ນ ເພື່ອຊອກຫາຮ່ອງຮອຍ ແລະສິ່ງເສດເຫຼືອຂອງທະຫານອາເມລິກາທີ່ ຫາຍສາບສູນໃນປາງສົງຄາມຢູ່ລາວ ໄດ້ຮັບຜົນເກືອບ 50% ຂອງຈໍານວນ ຜູ້ຫາຍສາບສູນທັງໝົດ, ອີງຕາມຕົວເລກ ທີ່ຝ່າຍອາເມລິກາແຈ້ງໃຫ້ຝ່າຍລາວ ຊາບ, ທະຫານອາເມລິກາທີ່ຫາຍສາບສູນ ໃນປາງສົງຄາມຢູ່ລາວທັງໝົດມີ 573 ຄົນ, ມາຮອດປະຈຸບັນ, ລັດຖະບານລາວ ໄດ້ມອບສິ່ງເສດເຫຼືອທະຫານອາເມລິກາ ທີ່ໄດ້ເສຍຊີວິດຢູ່ລາວທີ່ສັນນະສູດໄດ້ ແລ້ວຈຳນວນ 281 ຄົນ ໃຫ້ແກ່ຝ່າຍອາ ເມລິກາ ແລະຍັງອີກ 292 ຄົນ ທີ່ຍັງ ເຫຼືອແມ່ນຈະໄດ້ຮ່ວມກັນສືບຕໍ່ຄົ້ນຫາ ໃນການປະຕິບັດງານຄັ້ງຕໍ່ໄປ.

     ການທີ່ທັງສອງຝ່າຍ ລາວ-ອາເມລິກາ ໄດ້ຮັບຜົນສຳເລັດອັນດີດັ່ງກ່າວໃນວຽກງານການສໍາຫຼວດ ແລະຂຸດຄົ້ນກໍ່ ຍ້ອນຄວາມເອົາໃຈໃສ່ຢ່າງຈິງໃຈຂອງລັດຖະບານ ແລະເຈົ້າໜ້າທີ່ຂອງລາວທຸກໆຂັ້ນແຕ່ສູນກາງຈົນຮອດທ້ອງຖິ່ນ ແລະການຮ່ວມມືອັນດີຂອງປະຊາຊົນ ບັນດາເຜົ່າ.

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ

ຜູ້ໃຊ້ເຂົ້າສູ່ລະບົບ

ໄປເທິງສຸດ