ເຮືອນຊົງລາວຈັດຫຼາຍກິດຈະກຳໄລຍະປີໃໝ່

     ປີໃໝ່ລາວ ພສ 2561 ທີ່ຈະມາເຖິງນີ້ ເຮືອນຊົງລາວຢູ່ດ້ານຫຼັງພະທາດຫຼວງວຽງຈັນຈະຈັດຫຼາກຫຼາຍກິດຈະກຳເພື່ອໃຫ້ມວນຊົນໄດ້ເຂົ້າທ່ຽວຊົມເປັນຕົ້ນການຜູກແຂນໃນ 17 ໝູ່ບ້ານຂອງເມືອງໄຊເສດຖາ,

ການນຸ່ງຖືແບບປະເພນີລາວ, ພິທີສົມມາພໍ່ແມ່ຕາມຮີດຄອງປະເພນີ, ການຫົດສົງ ແລະອື່ນໆເພື່ອເປັນການສົ່ງເສີມວັດທະນະທຳລາວ ນອກນັ້ນ ຍັງມີສຽງຂັບສຽງລຳໃຫ້ຜູ້ທີ່ເຂົ້າມາທ່ຽວຊົມໄດ້ມີບັນຍາກາດແບບລາວໆ ໂດຍເລີ່ມໃຫ້ມວນຊົນເຂົ້າມາທ່ຽວຊົມ ນັບແຕ່ວັນທີ 13 ເມສາ ເປັນຕົ້ນໄປປະຈຸບັນບໍລິສັດຜູ້ລົງທຶນສ້າງເຮືອນຊົງລາວ ກະກຽມຄວາມພ້ອມຫຼາຍດ້ານເພື່ອສ້າງ ຄວາມເພີ່ງພໍໃຈໃຫ້ກັບຜູ້ເຂົ້າມາທ່ຽວຊົມ.

     ທ່ານນາງ ຈັນນະພາ ວົງສະໝໍລະພູມ ປະທານກຸ່ມບໍລິສັດຊີເອັນພີໃຫ້ສຳ ພາດວ່າ: ປີນີ້ເປັນປີທຳອິດທີ່ບໍລິສັດຊີ ເອັນພີ ໃນນາມຜູ້ສ້າງເຮືອນຊົງລາວຢູ່ດ້ານຫຼັງຂອງພະທາດຫຼວງວຽງຈັນຈະຈັດຫຼາກຫຼາຍກິດຈະກຳໃນຊ່ວງບຸນປີ ໃໝ່ລາວ ພສ 2561 ຢູ່ພາຍໃນເຮືອນ ຊົງລາວເປັນຕົ້ນມີການຜູກແຂນຕາມຮີດຄອງປະເພນີ, ຜູກແຂນຂອງ 17 ໝູ່ບ້ານ ເມືອງໄຊເສດຖາ, ການນຸ່ງຖືແບບປະເພ ນີລາວເດີມ, ພິທີສົມມາພໍ່ແມ່ ແລະຜູ້ຫຼັກຜູ້ໃຫຍ່ຕາມຮີດຄອງ, ການຫົດສົງແບບ ພື້ນບ້ານ ນອກນັ້ນຍັງມີສຽງຂັບສຽງລຳ ໝໍແຄນ ແລະອື່ນໆ ເພື່ອເປັນການອະນຸ ລັກຮີດຄອງປະເພນີລາວ.

     ພ້ອມນີ້ ຍັງມີພາຂວັນທີ່ກະກຽມໄວ້ ເພື່ອໃຫ້ຜູ້ທີ່ເຂົ້າມາທ່ຽວຊົມໄດ້ຜູກແຂນ ນຳຜູ້ເຖົ້າຜູ້ແກ່ອີກດ້ວຍ ສຳລັບຜູ້ທີ່ມີຄວາມສົນໃຈຢາກມາຈັດງານຜູກແຂນ ພາຍໃນເຮືອນຊົງລາວກໍສາມາດເຂົ້າໄປ ສຳຜັດກັບບັນຍາກາດແບບລາວໆໄດ້, ທັງນີ້ ພາຍໃນເຮືອນຊົງລາວຍັງມີຊຸດ, ເຄື່ອງນຸ່ງ, ເຄື່ອງເອ້ແບບລາວໆໄວ້ໃຫ້ ຜູ້ທີ່ສົນໃຈຢາກນຸ່ງຖື ຊຶ່ງມີລາຄາແຕກຕ່າງກັນ.

     ແນວໃດກໍດີ ສຳລັບດ້ານລາຄາເຂົ້າທ່ຽວຊົມແມ່ນ 10 ພັນກີບຕໍ່ຄົນ ພ້ອມກັບນຳດື່ມ ແລະດອກໄມ້, ເຮືອນຊົງລາວ ແມ່ນມີທັງໝົດ 8 ຫຼັງ ພາຍໃນສະຖານ ທີ່ດັ່ງກ່າວຍັງມີລົດຖີບ 3 ລໍ້, ຫ້ອງນ້ຳ ທີ່ສະອາດ, ອາຫານ ແລະອື່ນໆ ຊຶ່ງຈະເລີ່ມເປີດໃຫ້ແຂກເຂົ້າທ່ຽວຊົມໃນວັນທີ 13 ເມສາ ແລະຈະມີການເປີດພິທີຢ່າງເປັນທາງການໃນວັນທີ 14 ເມສາ ຊຶ່ງຄາດວ່າວັນທີ 15-16 ເມສາ ຈະມີມວນຊົນເຂົ້າທ່ຽວຊົມຫຼາຍທີ່ສຸດ.

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ

ຜູ້ໃຊ້ເຂົ້າສູ່ລະບົບ

ໄປເທິງສຸດ