ລາວປະດັບຫຼຽນກາມິດຕະພາບໃຫ້ທ່ານ ດຣ. ສະຕີເຟັນ ຣູດກາດ

     ຈາກຜົນງານການປະກອບສ່ວນ ຢ່າງຕັ້ງໜ້າ ຂອງທ່ານ ດຣ. ສະຕີເຟັນ ຣູດກາດ ຜູ້ຕາງໜ້າອົງການອາຫານ ແລະການກະເສດປະຈໍາລາວເຂົ້າໃນການພັດທະນາເສດຖະກິດ-ສັງຄົມຢູ່ ສປປ ລາວ ນັບແຕ່ປີ 2014 ເຖິງປະຈຸບັນເປັນຕົ້ນການພັດທະນາກະສິກໍາ-ປ່າໄມ້ ແລະຊົນນະບົດໂດຍສາມາດຍາດແຍ່ງທຶນເພື່ອຈັດຕັ້ງປະຕິບັດແຜນງານໂຄງການ ທັງໝົດມີ 18 ລ້ານໂດລາ,

ຜົນສໍາເລັດ ດັ່ງກ່າວກະຊວງກະສິກໍາ  ແລະປ່າໄມ້ໄດ້ຈັດພິທີປະດັບຫຼຽນກາມິດຕະພາບ ພ້ອມຍ້ອງຍໍຊົມເຊີຍຜົນງານໃນວັນທີ 6 ເມສາຜ່ານມາ ທີ່ນະຄອນຫຼວງວຽຈັນ.

     ທ່ານ ໄຊປລາເດດ ຈຸລາມະນີ ຫົວໜ້າກົມແຜນການ ແລະການເງິນໄດ້ຜ່ານ ສັງລວມຫຍໍ້ຜົນງານຂອງ ທ່ານ ດຣ. ສະຕີເຟັນ ຣູດກາດ ຜູ້ຕາງໜ້າອົງການ ອາຫານ ແລະການກະເສດ ປະຈໍາ ສປປ ລາວ ໃນໄລະການປະຕິບັດວຽກງານຢູ່ ສປປ ລາວ ນັບແຕ່ປີ 2014 ເຖິງປະຈຸບັນ ຊຶ່ງໄດ້ຍົກໃຫ້ເຫັນເຖິງບົດບາດສໍາຄັນໃນການຊ່ວຍຍາດແຍ່ງທຶນຮອນໂຄງການວິຊາການເພື່ອສະໜັບສະໜູນ ການຈັດຕັ້ງປະຕິບັດຫຼາຍແຜນງານ ຂອງຂະແໜງກະສິກໍາປ່າໄມ້ທັງໃນດ້ານນະໂຍບາຍ ແລະຍຸດທະສາດ, ລະບົບຂໍ້ມູນ ຂ່າວສານ, ເຕັກນິກການຜະລິດ, ການແກ້ໄຂບັນຫາໄພພິບັດ, ວຽກງານໂພຊະນາການ, ແລະວຽກງານຊັບພະຍາກອນທໍາມະຊາດໃນນັ້ນ ທ່ານ ສະຕີເຟັນ ຣູດກາດ ໄດ້ໃຫ້ການສະໜັບສະໜູນຊ່ຽວຊານ, ວິຊາການຊ່ວຍຮ່າງຍຸດທະສາດການພັດທະນາກະສິກໍາ 2016-2020, ຮ່າງຍຸດທະສາດການແນວພັນພືດ, ແນວພັນເຂົ້າ, ການລ້ຽງສັດ ແລະການປະມົງ ສະໜັບສະໜູນໂຄງການປະເມີນການປົກຫຸ້ມປ່າໄມ້, ເກັບກໍາຂໍ້ມູນທີ່ດິນກະສິກໍາ, ຍຸດທະສາດໄອທີ ຂອງກະຊວງ, ສໍາຫຼວດເກັບກໍາຂໍ້ມູນສະຖິຕິກະສິກໍາ, ສຶກສາຕ່ອງໂສ້ການຜະລິດກະສິກໍາເປັນສິນຄ້າ, ໂຄງການຍົກຜະລິດຕະພາບເຂົ້າໃນເຂດທົ່ງພຽງ, ໂຄງການເຝົ້າລະວັງພະຍາດໄຂ້ຫວັດສັດປີກປາກເປື່ອຍລົງເລັບ ແລະສະກັດກັ້ນການລະບາດຂອງ ຕັກແຕນ.

     ນອກຈາກນັ້ນ ທ່ານ ສະຕີເຟັນ ຣູດກາດ ຍັງໄດ້ສະໜັບສະໜູນໂຄງການເພື່ອ ຊ່ວຍກະກຽມຮ່າງໂພຊະນາການ 2016-2020 ໂດຍຮ່ວມມືກັບກະຊວງສາທາ ລະນະສຸກ ແລະກະຊວງກະສິກໍາ, ສະໜັບສະໜູນໂຄງການພັດທະນາລະບົບອຸຕຸນິຍົມ ແລະໂຄງການຮັບມືກັບການປ່ຽນແປງດິນຟ້າອາກາດໃນເຂດພາກໃຕ້ ໂດຍຮ່ວມມືກັບກະຊວງຊັບພະຍາກອນທຳມະຊາດ ແລະສິ່ງແວດລ້ອມ.

     ໃຫ້ກຽດເຂົ້າຮ່ວມປະດັບຫຼຽນກາມິດຕະພາບໃຫ້ແກ່ຜູ້ຕາງໜ້າອົງການອາຫານ ແລະການກະເສດປະຈໍາ ສປປ ລາວ ຂອງທ່ານ ລຽນ ທິແກ້ວ ລັດຖະມົນຕີກະຊວງກະສິກໍາ ແລະປ່າໄມ້ພ້ອມດ້ວຍຕາງໜ້າຄູ່ຮ່ວມພັດທະນາ ແລະຫົວໜ້າ-ຮອງກົມຈາກກະຊວງກ່ຽວຂ້ອງ.

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ

ຜູ້ໃຊ້ເຂົ້າສູ່ລະບົບ

ໄປເທິງສຸດ