ເປີດສູນເຂົ້າເຮັດວຽກ ແລະສິ້ນສຸດການຈັດງານຢູ່ມຸກດາຫານ

     ເພື່ອອຳນວຍຄວາມສະດວກໃຫ້ ແກ່ແຮງງານລາວທີ່ຈະເດີນທາງເຂົ້າໄປເຮັດວຽກຢູ່ປະເທດໄທ, ຜູ້ໃຊ້ແຮງງານ ແລະຫົວໜ່ວຍທຸລະກິດທີ່ຕ້ອງການແຮງງານຕ່າງປະເທດ, ທັງເປັນການປົກປ້ອງຜົນປະໂຫຍດໃຫ້ກັບຜູ້ໃຊ້ແຮງງານ ແລະຜູ້ອອກແຮງງານໃຫ້ເປັນໄປຕາມລະບຽບກົດໝາຍຂອງສອງປະເທດ,

ໃນວັນທີ 4 ເມສາຜ່ານມານີ້, ໄດ້ມີພິທີເປີດ ສູນຕ້ອນຮັບເຂົ້າເຮັດວຽກ ແລະສິ້ນສຸດການຈ້າງງານຢູ່ແຂວງມຸກດາຫານປະເທດໄທ ໂດຍການເຂົ້າຮ່ວມຂອງທ່ານ ຄຳແພງ ໄຊສົມແພງ ລັດຖະມົນຕີກະຊວງແຮງງານ ແລະສະຫວັດດີການສັງຄົມ, ທ່ານ ພົນຕໍາຫຼວດເອກ ອະດູນແສງ ສິງແກ້ວ ລັດຖະມົນຕີວ່າການກະຊວງແຮງງານແຫ່ງຣາຊະອານະຈັກໄທ, ພ້ອມດ້ວຍຄະນະທັງສອງຝ່າຍເຂົ້າຮ່ວມ.

     ສູນຕ້ອນຮັບເຂົ້າເຮັກວຽກ ແລະສິ້ນສຸດການຈ້າງງານເປັນສະຖານທີ່ກວດສອບ ແລະຄັດກອງແຮງງານກ່ອນອະນຸຍາດໃຫ້ເດີນທາງເຂົ້າໄປເຮັດວຽກຢູ່ປະເທດໄທເພື່ອປ້ອງກັນບັນຫາການຄ້າມະນຸດ, ຝຶກອົບຮົມແຮງງານຕ່າງປະເທດທີ່ເຂົ້າມາຕາມລະບົບ MOU ກ່ຽວກັບການເຮັດວຽກ, ການດຳລົງຊີວິດຢູ່ ໃນປະເທດໄທ ແລະເປັນສູນຮັບແຮງງານເພື່ອລໍຖ້າຜູ້ໃຊ້ແຮງງານເດີນທາງມາຮັບເອົາແຮງງານໄປເຮັດວຽກ ແລະກັບປະເທດໃນກໍລະນີສິ້ນສຸດການຈ້າງງານ ລວມທັງເປັນສູນປະສານງານລະຫວ່າງຜູ້ໃຊ້ແຮງງານ ແລະຜູ້ອອກແຮງງານ ແລະເປັນສະຖານທີ່ອອກໃບອະນຸຍາດເຮັດວຽກ (E-Work Permit).

     ທ່ານ ອະດູນ ແສງສິງແກ້ວ ກ່າວວ່າ: ລັດຖະບານໄທ ໄດ້ໃຫ້ຄວາມສໍາຄັນກັບແຮງງານຕ່າງດ້າວທີ່ເຂົ້າມາ ເຮັດວຽກໃນປະເທດໄທ ຊຶ່ງຄະນະລັດຖະມົນຕີໄດ້ມີມະຕິ ໃນວັນທີ 26 ກໍລະ ກົດ 2016 ໃຫ້ຕັ້ງສູນຕ້ອນຮັບເຂົ້າເຮັດວຽກ ແລະສິ້ນສຸດການຈ້າງງານໃນ 3 ຈັງຫວັດຄື: ຕາກ, ສະແກ້ວ ແລະໜອງຄາຍ, ສະເພາະມຸກດາຫານເປັນ ຈັງຫວັດທີ 4 ໂອກາດດຽວກັນນັ້ນ, ທ່ານ ຄໍາແພງ ໄຊສົມແພງ ກໍໄດ້ສະແດງຄວາມຍິນດີ, ຊົມເຊີຍ ພ້ອມທັງກ່າວວ່າ: ການເປີດສູນຕ້ອນຮັບເຂົ້າເຮັດວຽກ ແລະສິ້ນສຸດການຈ້າງງານ ແຂວງມຸກດາຫານ ເພີ່ມອີກ 1 ແຫ່ງ, ແມ່ນມີຄວາມ ສຳຄັນຫຼາຍຕໍ່ແຮງງານລາວຜູ້ທີ່ມີຄວາມປະສົງຢາກໄປເຮັດວຽກຢູ່ປະເທດໄທ ຊຶ່ງກາຍເປັນສູນໜຶ່ງທີ່ເຮັດໜ້າ ທີ່ໃນການຕ້ອນຮັບແຮງງານລາວນັບ ທັງເຂົ້າໄປເຮັດວຽກ ແລະກັບຄືນສູ່ປະເທດລາວ ພາຍຫຼັງສິ້ນສຸດການເຮັດວຽກ ຢູ່ປະເທດໄທ, ທັງແມ່ນໝາກຜົນຕົວຈິ່ງ ແຫ່ງການພົວພັນຮ່ວມມືດ້ານແຮງງານ ລະຫວ່າງສອງປະເທດກໍຄືສອງກະຊວງ ແຮງງານລາວ-ໄທ ເປັນໝາກຜົນແຫ່ງການສານຕໍ່ເຈດຕະນາລົມຂອງສອງລັດຖະບານກໍຄືສອງກະຊວງແຮງງານ ລາວ-ໄທ ໃນການຈັດຕັ້ງຜັນຂະຫຍາຍ ແລະປະຕິບັດບົດບັນທຶກຄວາມເຂົ້າໃຈ ວ່າດ້ວຍການຮ່ວມມືດ້ານແຮງງານ ລາວ-ໄທ ທີ່ໄດ້ຮ່ວມກັນລົງນາມໃນປີ 2016 ແລະຂໍ້ຕົກລົງວ່າດ້ວຍການຮ່ວມມືດ້ານການຈ້າງງານທີ່ໄດ້ຮ່ວມກັນລົງ ນາມໃນປີ 2017.

ຄະແນນລາຍການນີ້
(0 votes)
ເຂົ້າລະບົບເພື່ອສະແດງຄຳເຫັນ

ຜູ້ໃຊ້ເຂົ້າສູ່ລະບົບ

ໄປເທິງສຸດ