ເຈົ້າໜ້າທີ່ຢຶດຊີ້ນເມີຍໜັກເຄິ່ງໂຕນຈາກຜູ້ລ່າສັດ

ເມືອງພູວົງ ແຂວງອັດຕະປື ໄດ້ຈັດພິທີຈູດທໍາລາຍຊີ້ນສັດປ່າຫວ່ງຫ້າມປະເພດຊີ້ນເມີຍ ນໍ້າໜັກ 530 ກິໂລກະຣາມ ຊຶ່ງຊີ້ນເມີຍດັ່ງກ່າວ ທາງເຈົ້າໜ້າທີ່ສະເພາະກິດຂອງເມືອງພູວົງໄດ້ ເຄື່ອນໄຫວປະຕິບັດໜ້າທີ່ຢຶດໄດ້ຈາກພວກກຸ່ມຄົນບໍ່ດີທີ່ເຄື່ອນໄຫວລ່າສັດປ່າໃນເຂດປ່າຜະລິດຂອງບ້ານວຽງໄຊ ເມືອງພູວົງ,

ສໍາລັບຜູ້ທີ່ກະທໍາຜິດທາງ ເຈົ້າໜ້າທີ່ໄດ້ກັກຕົວເພື່ອສືບສວນ-ສອບສວນ ແລະດໍາເນີນຄະດີຕາມລະບຽບກົດໝາຍ.

     ພິທີຈູດທໍາລາຍຊີ້ນສັດປ່າດັ່ງກ່າວໄດ້ຈັດຂຶ້ນ ໃນວັນທີ 9 ເມສາ 2018 ທີ່ເດີ່ນຫ້ອງການກະສິກໍາ-ປ່າໄມ້ຂອງ ເມືອງເຂົ້າຮ່ວມໃນພິທີຈູດທໍາລາຍມີທ່ານ ບຸນນາວ ຈັນດອນ ເຈົ້າເມືອງເມືອງພູວົງ, ມີການນໍາຂອງເມືອງ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

     ໂດຍອີງຕາມການເປີດເຜີຍຂອງທາງເຈົ້າໜ້າທ່ີຫ້ອງການກະສິກໍາ ແລະປ່າໄມ້ ເມືອງພູວົງ ໃຫ້ຮູ້ວ່າ: ເມີຍແມ່ນສັດປ່າທີ່ຈັດຢູ່ໃນປະເພດສັດຫວງຫ້າມທີ່ໄດ້ກໍານົດໄວ້ໃນບັນຊີໜຶ່ງເປັນສັດປ່າປະເພດທີ່ຫາຍາກໃກ້ສູນພັນມີຄຸນຄ່າສູງ ແລະມີຄວາມສໍາ ຄັນເປັນພິເສດຕໍ່ການພັດທະນາເສດຖະກິດ-ສັງຄົມສິ່ງແວດລ້ອມ ແລະການສຶກສາຄົ້ນຄວ້າທາງດ້ານວິທະຍາສາດ ດັ່ງນັ້ນຈຶ່ງຕ້ອງໄດ້ຮັບການຄຸ້ມຄອງກວດ ກາອະນຸລັກປົກປັກຮັກສາ ແລະພັດທະນາສ່ວນການນໍາໃຊ້ນັ້ນຕ້ອງໄດ້ຮັບອະ ນຸຍາດຈາກລັດຖະບານ, ນອກນັ້ນການລ່າສັດປ່າຫວງຫ້າມຖືວ່າຜິດຕໍ່ກົດໝາຍວ່າດ້ວຍສັດນໍ້າ-ສັດປ່າເລກທີ 07/ສພຊ ລົງວັນທີ 25 ທັນວາ 2007 ໃນໝວດທີ 5 ມາດຕາ 52 ໃນນັ້ນຜູ້ກະທໍາຜິດຈະໄດ້ຮັບໂທດທາງອາຍາຄື ຕັດອິດສະຫຼະພາບ ແຕ່ 3 ເດືອນຫາ 1 ປີ ແລະຈະຖືກປັບໃໝ ຕາມລະບຽບກົດໝາຍ.

ຄະແນນລາຍການນີ້
(2 votes)
ເຂົ້າລະບົບເພື່ອສະແດງຄຳເຫັນ

ຜູ້ໃຊ້ເຂົ້າສູ່ລະບົບ

ໄປເທິງສຸດ